Borgar-línan sig ...???

Komið budget á borgarlínu
hjá borginni.
Samt er það bara pinku pínu
pons af heildinni.

Viðtal við borgarstjórann

Hinn þjáði & þreytti dr. Gylforce hefir lítt sést í vögnunum undanfarið vegna flensu, hvar hann þarf að gera bragarbót á því. Nema hvað.

Doksi kallinn verður að hætta þessu gaufi & fara að gefa vögnunum - vinum vorum - meiri gaum. En ekki hvað???

Doka, dunda, tvínóna, 
drattast, gaufa. 
Slóra, slæpast & lóna 
slugsa, paufa.

Í eymingsskap sínum sá dr.-inn gott viðtal við borgarstjórann sinn, hvar hann sagði frá því að á fimmta milljarð króna væru eyrnamerkt Borgarlínunni á næstu árum. 

Sú tala gæti aukinheldur hækkað ef ríkið kæmi inn með framlag á móti.

Það eru spennandi tímar framundan & vonandi heldur samstaða sveitarfélaganna á höfuðborgarsvæðinu áfram, hvað Borgarlínuna varðar, eptir kosningarnar í maí 2018. Maður lifandi!


Afmæli ...

lisa jones studio birthday bus cardÍ dag boðar dr. Gylforce mikinn fögnuð, hvar hann hefir í 12 ár bloggað um vagnaferðir sínar. Maður lifandi!!!

Síðurnar eru þrjár talsins, sú fyrsta liggur reyndar niðri en sú sem hér er ku vera bráðlifandi!

Fyrsta síðan, www.straeto.blogcentral.is, er vitaskuld geymd enda gleymir netið víst öngvu.

Hægt er að sjá hana á http://wayback.vefsafn.is/wayback/20091121013029/http://straeto.blogcentral.is/eldra/2007/12/

Hin, www.dr-inn.blog.is, er sprelllifandi. Sem og þessi.

Hvað um það.

Dr.-inn mun að sjálfsögðu halda upp á daginn. Nema hvað - en ekki hvað???


Jólavagninn ...

23799881_1457777484291843_3378811690544368989_oUnaður þessi Ivecó
í okkar jólastúss.
Gylforce-ins geðfró
góður eptir einn sjúss.

Jólavagninn



Minni mengun í Mekka ...

imagesEi er strætó í straffi
í stórborginni hlýju.
Keyra nú um á kaffi-
korg, tólg & olíu.

Kaffivagnar

Hin unaðslega borg & Mekka doktorsins, Lundúnir, heldur áfram að bera höfuð & herðar yfir aðrar borgar, hvar vagnarnir sumir hverjir ganga nú fyrir kaffi! En ekki hvað???

171a73e0b9951750c9522b26f13b4d42London hefur upp á að bjóða rúmlega 9500 vagna á degi hverjum, með yfir 700 leiðum & ríflega 6 milljónir vagnverja sem ferðast með þessum unaði daglega. Spáum í því vagnverjar!

Nú hafa þeir haldið áfram að þróa vistvæna orkugjafa á vagnana & getur dr.-inn vart beðið eptir næstu ferð sinni til Mekka.

Maður lifandi!


Nudd við Nýbýlin ...

20140831123626 d110170aHinn hollvætti & hárbeitti dr. Gylforce fékk hroll & hrein eins & stunginn grís, hvar hinn huggulegi Irisbus Karosa á leið 4 lenti í smá nuddi við gamlan skrjóð á annatíma síðdegis í gær. Nema hvað.

Dr.-inn hélt heim úr mennta- & menningarsetrinu & hugði á fína ferð frá Hamraborg þeirra Kópvæginga yfir í Mjódd okkar Breiðhyltinga. En ekki hvað???

Ferðin sóttist vel uns vagninn rann niður Túnbrekkuna & ætlaði að beygja inn Nýbýlaveg til austurs. Komst hann þá hvorki lönd né strönd því gamall Bens var bilaður á veginum. Komu þar nokkrir galvaskir gaurar & ýttu honum aðeins til hliðar. 

Það reyndist þó ekki nóg því 161 Karosavagninn nuddaðist aðeins í hliðina á skrjóðnum & varð úr hin mesta töf en skemmdir urðu óverulegar - góðu heilli.

Dr.-inn var vitaskuld miður sín yfir þessu enda leitt að sjá vini sína rispast & skemmast. Doksi kallinn reyndi að halda andlitinu & eptir drjúga stund gat vagninn haldið loks áfram leið sinni. Hvað um það.

Við Nýbýlin nuddaðist
við nöturlegan skrjóð.
Hræið atarna asnaðist
að enda sína slóð.

Grautfúll varð Gylforce-inn
í grátinn há brast.
Féllu tár á föla kinn
fékk hann æðiskast.


Hver er þessi dr. Gylforce ...???

AlbumImage (1)I.
Í árdaga urðu menn þess varir í kópvægskri laut einni, kennda við Stúta, að kona var með barni. Liðu svo tímar & lagðist hún á gólf & fæddi sveinbarn; feitt & fráleitt frítt. Sveinn þessi var vatni ausinn & nefndur Gylforce; doktor Gylforce. 

Dr.-inn varð snemma vörpulegur á velli, hreyfingarléttur & kvikull; mikill vexti en þó aumur að afli; mikið þótti hann undarlegur & fábreytinn í lund; snemma sýndi Gylforce-inn græðgi & girnd mikla þegar gúmmídekk fjögur voru annars vegar, en talaði hann þó tepru- & tilgerðarlega & héldu flestir hann vitlítinn vera.

Doktorinn á vagnavacht
vellíðanin streymir.
Á þá horfir með andakt
- amstri dagsins gleymir.


Svartur sunnudagur ....

1008108Eldhnötturinn á lopti lágt
ljósgeislarnir blinda.
Bílstjórarnir áttu bágt
brátt þeir urðu úrvinda.

Svartur sunnudagur

Hinn sanni & sanngjarni dr. Gylforce horpði upp á svartan sunnudag, hvar einn vina hans lenti í slæmum árekstri við vörubifreið.

Góðu heilli eru bílstjórinn & vagnverjarnir ekki alvarlega slasaðir en vagninn var á leið 11 áleiðis upp í Mjódd okkar Breiðhyltinga. 

Dr.-inn sendir vagnstjóranum & verjunum batakveðjur en vagn þessi er í eigu Hópbíla sem annast akstur á leið 11. Vonandi verða þeir allir komnir á stjá áður en langt um líður.

Ást & friður.


Mynd: mbl.is/Hari


Á vit vagna ...

20891230_10155019189038348_666653514_nÍ vögnum kraumar kraptur
kraptbirting tær.
Doksi þeim enn & aptur
ásjónu sína ljær.

Hinn spakvitri & sparhaldni dr. Gylforce viðraði sitt spikfeita sálartetur um helgina, hvar hann vitaskuld hélt á vit ævintýranna með því að halda í vagna. En ekki hvað???

AlbumImage (3)Einn spakur spekingur sagði eitt sinn að vér mennirnir skyldum safna miklu spiki á sálina en halda líkamanum flottum & fitt; ríma spakmæli sú ágætlega við dr.-inn, hvar hann finnur hvernig fitan flæðir meir & meir innra með honum eptir því sem vagnaferðunum fjölgar. Maður lifandi!

Dr. Gylforce tók hús á hinum huggulega fjarka hér í grennd við Stútulautarselið. Það gleður ætíð hið gamla hró dr.´s hve vel er setið í leið 4, sérstaklega frá Mjódd okkar Breiðhyltinga yfir í Hamraborg þeirra Kópvæginga. Hvað um það.

Rúntur doksa karlsins var stuttur að þessu sinni, hvar hann hoppaði út í Hamraborginni & hélt í helgarvinnu sína við mennta- & menningarsetrið. Nema hvað.


Rafspennan magnast ...

Hömruð til hlýðni
hér á landi á.
Tíu mínútna tíðni
tveimur leiðum hjá.

Hinn kjarnyrti & kjaftfori dr. Gylforce kann því vel & hlakkar mjög til, hvar leiðir 1 & 6 verða með 10 mínútna tíðni eptir áramótin. Það er ótrúlega mikill munur á því að hafa vagna á kortersfresti & svo aptur með tíu mínútna tíðninni. Maður lifandi, líki því vart saman.

Þjónustuaukning Strætó bs. kallar augljóslega á endurnýjun vagnaflotans. Það gefur augaleið & minnir dr.-inn á rafvagnana níu sem byggðasamlagið hefir fest kaup á. Hvar eru þeir nú en þeir áttu að vera löngu komnir í gagnið???

http://www.mbl.is/frettir/innlent/2017/11/13/rafmagnsvagnar_a_nyju_ari/

Þau gleðitíðindi hafa & borist að nú loksins grillir í rafvagnana frá Kína. Framleiðendurnir telja sig hafa leyst vandann varðandi yfirbygginguna & megum vér vagnverjar búast við rafvögnum í þjónustuaukningunni en núþegar hefir það verið gefið út að þeir verði á leiðum 4 & 6. Örugglega munum við sjá þá á fleiri leiðum.

Yfirbygging úr áli
- algjört spé!
Stöndugir úr stáli
sterkir sem tré.
 


Leið leiðanna - snögg & snör ...

23482965_10155228284143348_1627627148_oÍ bæinn fór úr blogginu
brölti í einn vagn.
Snjall hann var í snattinu
snöggur að gera gagn.

Hinn taktfasti & tímanlegi dr. Gylforce tók andköf við mennta- & menningarsetrið hér við Fannborg í gær, hvar hann uppgötvaði að hann bráðvantaði að komast í verslun eina við Laugarveg.

Dr.-inn var ekki lengi að losa sig við ungviðð & einhenti sér á vit vagna. Góðu heilli er leið leiðanna, leið 1, með 10 mínútna tíðni á annatíma & því ekki lengi að koma. 

Skemmst er frá því að segja að dr. Gylforce tókst að renna í miðbæ okkar Reykvíkinga, arka inn í verslun eina & komast tilbaka í mennta- & menningarsetrið á rúmum klukkutíma.

Munar þar mestu að hafa vagninn á 10 mínútna fresti. Svo bætist leið 6 við í þessari dásemd eptir áramótin.

Vel gert vagnar - þið eruð án efa vinir okkar!


Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband