Chronicles membrum vehiculo - annáll vagnverjans

Hinn vel fægði & fágaði dr. Gylforce hefir verið að líta yfir farinn veg & vagn undanfarna daga hvar ekki úr vegi að gjöra slíkt þegar nýtt unaðslegt ár gengur í garð. Nema hvað.

Það bar helst til tíðinda á undangengnu ári að Engeyingar, undir merkjum Kynnisferða, hófu innrás sína af krapti inn í hið lostfagra leiðakerfi höfuðborgarsvæðisins. Þeir höpðu reyndar áður séð um akstur í Voginum fagra en bæta nú vel í & aka nú um 8 strætisvagnaleiðum með 35 vögnum innanborðs.

Engeyingar gerðu þó vel í að festa kaup á fjörutíu nýjum vögnum til þess að annast aksturinn. Þeir leituðu víða fanga eptir hentugum drossíum & enduðu á að fá til sín 30 VDL-vagna frá Hollandi & 10 minni Iveco Crossway frá Frakklandi. Hvað um það.

Það er ekki auðvelt að sjá í reikningum Kynnisferða hvað vagnarnir kostuðu því þeir festu aukinheldur fjár í nokkrum rútum frá VDL verksmiðjunum. Það er hinsvegar ljóst að verðið á þeim er mun lægra en á Iveco Crossway vögnunum sem Strætó bs. hefir verið að fá til undanfarin ár.

Niðurlöndin búin að ná
nokkuð mörgum leiðum.
Engeyingar glotta þá 
úr sínum silfurskeiðum.

Það má með sanni segja að almenningssamgöngur hafi loksins komist á kortið á síðasta ári. Sveitarfélögin á höfuðborgarsvæðinu hafa sammælst um að koma upp svokallaðri Borgarlínu sem verður annaðhvort léttlestar- eða hraðvagnakerfi.


Borgarstjóri Reykvíkinga er brattur & áætlar að kerfið verði komið að einhverju leyti í gagnið innan 5-10 ára.



Vonandi reynist hann sannspár.