Vagnverji virtur að vettugi ...

Virtur að vettugi
vont er ómakið.
Bílstjóri syndugi
segðu afsakið.

Virtur að vettugi

Það bárust ekki góðar fréttir af vagnstjóra einum - líklega á leið leiðanna, leið 1 - varðandi samskipti hans við vagnverja einn. Sá er bundinn hjólastól og vildi vitaskuld taka sér far með vinum vorum, vögnunum. 

Vagnstjórinn hafnaði því & taldi sig ekki þurfa að aðstoða verjann við að komast inn í vagninn. Það er gegn vinnureglum Strætó og veit dr.-inn mætavel að byggðasamlagið mun bregðast hratt og örugglega í þessu máli.

Góðu heilli heyra svona leiðindaatvik til undantekninga.

Yfir&út!

Þrennd í grennd ...

Með Gylforce-inn í grennd
gleður hal & sprund.
Þokkaleg var mín þrennd
þessa góðu stund.

Dr. Gylforce var á vappi við Ægisíðu þeirra Reykvíkinga í enn einu blíðviðrinu, hvar hann endaði í þremur yndislegum vögnum með þremur indælum leiðum. Nema hvað.

Ellefan með bros á brá
bætir mína glóru.
Huggulegur ilmur frá
hennar pústum stóru.

Gylforce-inn ætlaði að mjaka sér með leið 11 frá Ægisíðunni að Mjódd en eins & opt áður breytti hann um kúrs á miðri leið. En ekki hvað???

Dr. Gylforce sté út við Hlemmtorgið & spígsporaði þar drykklanga stund í blíðunni. Doksi kallinn skáskaut sér svo inn í fjarkann að Hamraborg þeirra Kópvæginga. 

Tímaáætlanir vagnanna voru til fyrirmyndar enda ekki margir vagnverjar á ferð að þessu sinni aukinheldur sem opt reynist rólegt yfirbragð yfir þessum gulu vinum okkar á sunnudögum. Hvað um það.

Til þess að komast í Stútulautarselið hóaði dr. Gylforce í leið 28 & gekk greiðlega úr Voginum fagra yfir í gettóið á mettíma.

Vagnaunaðurinn ríður ekki við einteyming - maður lifandi!

Víndrukkinn vagnverji ...

Fullur af víni var hann
vitlaust þetta geim.
Laganna verðir - löggan 
lullaði með hann heim.

Víndrukkinn vagnverji 

Dr. Gylforce, sem hvorki er haldinn þröngsýni né þurrafúa, þaut á vit vagna um leið & færi gafst í mildu og fallegu veðri hér í höfuðborginni. En ekki hvað???

Dr.-inn sá ekki betur en að flestir vagnverjarnir væru allsgáðir - góðu heilli - en doksi kallinn nældi sér í ljúfar langdvalir með leiðum 12 & 18 að þessu sinni. Nema hvað.

Dr. Gylforce komst enn & aptur i kynni við rafvagna á leið 18. Hann nýtti sér heiðgulu körfuna & setti þar allar vörur sínar (sem voru nú ekki ýkja margar!). Hvað um það.

Dr.-inn þrýsti sér í þrásetu góða á leið 12 frá Ártúni að Hlemmtorgi.

Það gladdi hans gamla hró að sjá hve vel vagninn var nýttur en hin tólfta leið er orðin sú næst fjölmennasta í hinu lostfagra leiðakerfi okkar.

Amen.

Rafvagnar á randi ...

Rafvagnar á randi
rétt náðum í þá.
Veit að þeirra vandi
viðbótin´að fá.

Hinn ungi & aldni vagnverji héldu í unaðsrúnt frá selinu góða að Mjódd okkar Breiðhyltinga í gær. Nema hvað.

Vitaskuld fengu feðgarnir rafvagn, hvar hann skilaði þeim á hárréttum tíma á kórréttan stað. En ekki hvað???

Fleiri rafvagnar litu dagsins ljós í Mjóddinni. Enn bólar þó ekkert á hleðslustöðvum fyrir þá og meðan svo er geta þessir umhverfisvænu vinir okkar úr Austri ekki verið í fullri notkun. Illu heilli.

Að vissu leyti skilur maður stöðu byggðasamlagsins varðandi hleðslu á rafvögnunum. Hvar á hún að vera? Í fyrstu hlýtur Hlemmur að vera hentugur staður en erfitt gæti verið að réttlæta kostnaðinn við að koma upp hleðslustöð þar þvi flutningur vagnanna þaðan stendur fyrir dyrum á allra næstu árum.

Í Mjóddinni stoppa leiðirnar stutt við svo erfitt gæti verið að hafa hleðslustöðina þar.

Þá eru til svokallaðar þakhleðslustöðvar sem ná að hlaða vagninn í allt að 80% á undraskömmum tíma. Slíkar stöðvar útheimta þó mikið rafmagn og eru eflaust dýrar í uppsetningu.

Hvað sem því líður er heldur slappt að rafvagnarnir nái ekki að vera í notkun frá morgni til miðnættis en skipta þarf þeim út á miðjum degi og hlaða þá uppi á Hesthálsi.

Lítið hróflað við leiðakerfinu ...

Fátt er um fína drætti
fyrir veturinn.
Byggðasamlagið mætti
bæta afköstin.

Byggðasamlagið Strætó hefir kynnt vetraráætlunina á heimasíðu sinni. Við lauslega skoðun er aðeins um eina breytingu að ræða, hvar leið 8 er sett á laggirnar og leið 5 stytt á móti. Á það bara við um virka daga.

Vetraráætlun 2019-2020

Að vissu leyti eru það vonbrigði að ekki sé að finna fleiri breytingar á hinu lostfagra leiðakerfi. Það þarf að vera lifandi eins & sagt er & taka eðlilegum breytingum.

Dr. Gylforce saknar enn að ekki skulu ráðist í breytingar í Firðinum. Leiða má líkur að því að kjörnir fulltrúar þar hnjóti um kostnaðaraukann sem fylgir en nýtt leiðakerfi fyrir Gaflara er nánast tilbúið á teikniborðinu hjá Strætó.

Þar kemur til kasta starfsmanna Strætós að sannfæra bæjarfulltrúana í Firðinum um ágæti þessara breytinga og "selja" þeim hugmyndina; einfaldara leiðakerfi, betri þjónusta og tengingar, bæjarbúum til heilla.

Reitt til reiði ...

Ritstýra Fréttablaðsins reit á dögunum beittan leiðara hvar hún taldi Íslendinga vera hálf bílóða þjóð; hvergi má takmarka umferð einkabílsins án þess að bíleigendur rísi upp á apturlappirnar & tali um aðför. 

Ritstýran hefir því líklega reitt nokkra þeirra til reiði því urmul athugasemda má sjá í hinu svokallaða kommentakerfi fyrir neðan leiðarann. Hvað um það. 

Bíleigendur ávallt angraðir 
aðför bílsins er þreytt.
Við bílaæði nú bendlaðir
bíllinn er númer eitt!

Ritstjóri reitir til reiði

Víða í evrópskum borgum er bílumferð takmörkuð í miðbæjum, jafnvel bönnuð. Á Íslandi sýnist sitt hverjum um slíkar ráðstafanir. 

Hvað sem því líður finnst dr. Gylforce fátt betra en að taka vini vora - vagnana - í miðbæinn; graðka í sig gómsætum mat, gæla við þann görótta í skemmtilegum félagsskap & hafa öngvar áhyggjur af bifreiðum, bílastæðum & þeirri vá að þurfa að halda sér edrú!

Yfir&út! 

Skemmtileg skreytilist ...

Þeysist hann um á tvist & þrist
þjónar næturgestum.
Skemmtileg þessi skreytilist
skemmtir okkur flestum.

Nýjasti skreytti strætisvagn bæjarins er afar vel heppnaður & ekki spillir fyrir að um rafvagn er að ræða - maður lifandi!

Fagurlega skreyttir vagnar kosta sitt en því verður ekki neitað að þeir setja ákaflega skemmtilegan blæ á hina fjölskrúðugu vagnaflóru. Nema hvað.

Vonandi ekur hann sem flestar leiðir en rafvagnar hafa reyndar verið afar fátíðir á leið leiðanna, leið 1.

Kannski fær þessi eins & einn rúnt frá Völlunum að Hlemmtorgi - hvur veit???

Gaman væri nú að hitta á þann rúnt - en ekki hvað???



Mynd: Strætó

Drepa á dreif ...???

Opt er sagt að hún ku vera skrýtin tík þessi pólitík. Þótt það sé frasi er það hverju orði sannara. Sem dæmi um það lagði borgarfulltrúi Flokks fólksins fram í borgarráði á dögunum fyrirspurn í níu liðum varðandi Borgarlínuna.

Það er vitaskuld gott & blessað að velta vel fyrir sér jafn viðamiklu verkefni og Borgarlínan er. Hinsvegar hepði borgarfulltrúinn hæglega getað fengið svör við mörgum spurningum sínum einfaldlega með þvi að fara á síðuna borgarlinan.is:

Borgarfulltrúa blaður
bölvanlegt er þvaður.
Málflutningur bjagaður
brátt sér það hver maður.

Þrjár spurningar fulltrúans meika einhvern sens & þarfnast betri svara: 

Þvaður

6. Hver á að reka hana (Borgarlínuna)? Strætó? Ríkið? Sveitarfélög? Allir saman? Aðrir? 
7. Hvar er hægt að sjá rekstrar- og tekjuáætlun borgarinnar fyrir borgarlínu? 
9. Hvað þýðir þetta í skattaálögum á almenning?

Hinar spurningar eru annaðhvort ekki tímabærar eins og fjöldi vagna í Borgarlínunni, það fer væntanlega eptir tíðninni, eða svörin eru að finna á borgarlinan.is.

Vonandi hefir umhverfis- & skipulagssvið bein í nefinu og bendir borgarfulltrúanum einfaldlega á heimasíðu Borgarlínunnar og vonast eptir því héreptir að pólítískt kjörnir fulltrúar séu færir um að afla sér sjálfir upplýsinga á hinu svokallaða alneti.

Eða er það kannske ekki málið?

Kann að vera að hér sé verið að drepa málinu á dreif??? Af borgarfulltrúa Flokks fólksins??? Getur það verið??? Humm, humm ...

Tafir & tálmanir ...

Núna út um borg & bý
bikað - mikið streð.
Tafir vagna æ & sí
ergja doktors geð.

Hinn fráleitt mélkisulegi & ávallt munúðlegi dr. Gylforce hélt í mikinn & margslunginn rúnt meðal vina sinna, vagnanna, hvar hann lagði í glaum & gleðskap í borg óttans. Maður lifandi!

Dr. Gylforce vafraði vallprúður & veglegur inn í rafvagn einn eptir unaðsstund í miðbæ Reykjavíkur í yndislegum félagsskap. Sá umhverfisvæni var á leið 3 & á heimleið með hinn bísperrta Breiðhylting.

Illu heilli tafðist rafvagnsunaðurinn vegna mikilla malbikunarframkvæmda út um borg & bý. Vagnstjórinn varð t.d. að aka um Barónsstíg & beygja inn Eiríksgötu sem er alltof þröng fyrir fallegan 12 metra vagn. Dr.-inn var mjög taugaóstyrkur meðan á þessu stóð & hapði stöðugar áhyggjur af 75 milljón króna rafvagninum. Hvað um það.

Aukinheldur hefir verið mikið um lokanir í Skógarselinu, hvar dr. Gylforce á nú til að hoppa inn & út í unaðslega vagna.

Sumsé, tafir & tálmanir um gervalla borg eins & vera ber um hásumar & um að gera að fylgjast vel með tilkynningum frá byggðasamlaginu - en ekki hvað??? 

Nýir en notaðir ...

Stjórn Strætó bs. hefir samþykkt kaup á tveimur notuðum strætisvögnum í staðinn fyrir klúðrið sem varð í útboði á fimm vetnisvögnum á dögunum. Strætó fékk 95 milljóna styrk frá Evrópusambandinu fyrir vetnisverkefnið en meinbugir reyndust á útboðinu og því spurning hvað verður um þá fjármuni. Nema hvað.

Þetta kemur fram í fundargerð hjá byggðasamlaginu.

Augljóslega koma tveir notaðir strætisvagnar ekki í staðinn fyrir fimm nýja vagna. Ástæðan fyrir þessu er líklega sú að kaup á notuðum vögnum krefst ekki útboðs með tilheyrandi töfum og veseni. Þá er aukinheldur líklegt að vagnarnir tveir verði knúnir dísilolíu en ekki með umhverfisvænum orkugjöfum. Illu heilli. Hvað um það.

Tveir nýir en notaðir
á næsta leiti.
Rándýrir rafmagnaðir
reyndin eldsneyti.

Í dag er þriðjungur vagnaflota Strætós bs. 12 ára eða eldri og ljóst að endurnýjunar er þörf - & það fljótt. Sextán vagnar af 86 eru knúnir umhverfisvænum orkugjöfum sem er um 19% flotans. Ef verktakar eru teknir með í reikninginn dettur prósentan niður í um 10%. Maður lifandi - aðgerða er þörf!!!

Strætó bs. á að vera leiðandi í notkun á umhverfisvænum strætisvögnum & verður á næstu mánuðum og misserum að marka sér almennilega stefnu í þeim efnum. 

Koma svoooooo!