Vanmætti vagna ...

Hinn magnstola & máttvana dr. Gylforce var mæddur mjög eptir ferðir gærdagsins, hvar hann kom inn á Hlemm með leið 6 & blasti þar við honum ófögur sjón. Maður lifandi.

Dr. Gylforce hapði fyrr um daginn náð unaðsferðum með glænýjum Iveco vagni á leið 24 upp í Spöng & þaðan fékk hann líka glæstan Iveco Crossway vagn númer 187 á leið 6. Nema hvað.

Dr.-inn kom með leið 6 um sexleytið inn að Hlemmi hvar vesaldómurinn & volæðið æpti á hinn aldna vagnverja. Hinn sænskættaði & jafnan trausti 110 Omnilink var bilaður á stæði leiðar 6.

Dr.-inn sté út úr sinni sexu & hugðist taka leið leiðanna, leið 1 upp í Hamraborg okkar Kópvæginga. Tók þá ekki betra við; hinn 15 ára gamli 101 Scania Omnilink hreyfði hvorki dekk né drif & fór hvergi. 


Góðu heilli fara leiðir 2 & 4 líka upp í Hamraborg aukinheldur sem ekki var langt í næsta vagn á leið leiðanna. Doksi kallinn ákvað að einhenda sér í leið 2 & settist inn í hinn frakkneska 161 Irisbus Karosa vagn. 

& enn héldu vandræðin áfram. Vagninn sá drap alltaf á sér í hvert skipti sem vagnstjórinn þurfti að stöðva. Brá hann þá á það ráð að skella vagninum í hlutlausan & gefa honum vel inn! Sá frakkneski náði með naumindum að komast í Hamraborgina hvar dr.-inn sté út & var ansi feginn að komast í glænýjan & glæstan vagn frá Kynnisferðum á leið 35!

Já, það var ekki heilla dagur í gær; að halda á vit vagna; að halda á vit sænskra vagna - & frakkneska! Maður lifandi.

Þeir orðnir eru úrvinda
örmagna voru í röð.
Varð að láta mér þá lynda
- á leið á endastöð?