Sænskættuð jól ...

 Gleðileg vagnajól vagnverjar!

Dapurt í dimmviðrinu ...

Hinn jólglaði en fráleitt jóðlaði dr. Gylforce jók gleði sína þennan daginn hvar henn skellti sér í einn unaðshring með einum sænskættuðum á leið 35. Færðin hér í Voginum er með þokkalegu móti þótt 310 Volvovagninn hafi skrölt hringinn sinn með nokkrum látum. Nema hvað.

Vagninn kom um þremur mínútum of seint - eða klukkan 12:13 - hér við mennta- & menningarsetrið vestur á Kársnesi. Vagnstjórinn bauð dr. Gylforce góðan dag með virktum & var allur hinn kurteisasti. Hann lagði sig svo allan fram við að halda áætlun en kom öngvu að síður upp í Hamraborg kl. 12:35 eða um 5 mínútum of seinn.

Þegar leið 35 beygði frá Vogatungunni í átt að Hamraborginni lögðu leiðir 1,2, & 4 af stað áleiðis í miðbæinn. Þeir sem voru með doksa í vagninum misstu því af þeim vögnum. Enda þótt nú sé slæmt tíðafar & erfitt að halda áætlun er ansi blóðugt ef vagnarnir geta ekki beðið í eina mínútu. Vagnstjórarnir á leiðum 1,2 & 4 sáu leið 35 koma & virtust vera slétt sama. Það er ansi dapurt & ekki leiðakerfinu til framdráttar. Hvað um það.

Góðu heilli fyrir Gylforce-inn átti hann ekki leið niður í bæ að þessu sinni en fann mikið til með þeim vagnverjum sem þangað ætluðu.

Dimmviðri úti; dimm él
drungi á aðventu.
Doksa varð ekki um sel;
eigi þeir bíða nenntu.

Funheitt í fimbulkulda ...

Það er vert að minnast þess nú í fimbulkuldanum, mínir virðulegu vagnverjar, að fáir vagnar ylja betur en hinir engilsaxnesku MAN vagnar (eða MAN vagn öllu heldur).

Verktakinn vestur á Kárnesi hefir átt tvo slika vagna en undanfarið hefir aðeins einn þeirra verið gangfær. Sá er opt & einatt á leið 35. Aðrir vagnar geta verið heldur hryssingslegir í kuldanum, meira að segja hinir sænskættuðu Scania & Volvo.

Upp á trú & æru
unaðslegt er span.
Kópvægingar kæru
komið inn í MAN.


Mynd: citybus.piwigo.com

Nýtt plan í pípunum ...

Talsverðar breytingar standa fyrir dyrum á leiðakerfi Strætó bs. hinn 4. janúar næstkomandi. Ber þar eflaust hæst að vagnarnir hefja akstur fyrr á sunnudagsmorgnum & er það eitt & sér fagnaðarefni.

Dr. Gylforce hefir eigi leiðst þrásetan & langdvalirnar með leiðum 2 & 4 en frá & með 4. jan koma þær til með að breytast sem & leið 35 sem verður með 15 mínútna tíðni á annatíma virka daga.

Þá sætir það tíðindum að breyta númeri á leið 19 í leið 5 & hafa hana sem eina af stofnleiðunum sex. Gamla leið 5 fær númerið 16 & fer vel á því að endurvekja þá góðu tölu.

Að öðru leyti er hægt að lesa um breytingarnar á heimasíðu Strætó eða bara á linknum
http://www.straeto.is/um-straeto/frettir/nr/793

Leiðir öðlast líf sitt nýtt
leiðir það til bóta.
Nýir vegir, breitt & vítt
sem vagnverjarnir njóta.

Strambur & strekkingur ...

Hinn ákafi en þó fráleitt ofsafengni dr. Gylforce endasentist á vagnavachtina í gærkvöldi hvar hann fékk tvær sérferðir aukinheldur sem vagnarnir voru af ýmsum toga. Nema hvað.

Það sem helst bar til tíðinda var að í Mjódd þeirra Breiðhyltinga var skipt um vagn á leið 4. Ugglaust vekur það ekki furðu en klukkan var 22:51 & stutt eptir af vacht vagnanna þegar 132 Citelisvagninn dró sig í hlé & inn á vígvöllinn kom hinn sænskættaði 104 Omnilink. Góðu heilli.

Aukinheldur kom dr.-inn auga á eitt athyglisvert. Það var nýr vagn frá þeim Fjarðarmönnum á leið 12; spánnýr Irisbus Crossway sem bar númerið 219. Því miður var vagn dr.´s að skríða af stað þegar sá nýi kom í Mjóddina en þennan vagn verður doksi að kanna. Það er morgunljóst.

Dr. Gylforce fékk sérferð með leið 35 í gærkvöldi frá Stútulaut sinni. Sænskættaður 303 Volvovagn kom & keyrði hringinn & var það heldur hvimleitt að vagnstjórinn var yfirleitt á undan áætlun. Þannig var vagninn þremur mínútum fyrr á ferðinni eystur í Engihjalla en vant er & skrýtið að vagnstjórinn skyldi hvergi tímajafna vagninn. Hvað um það.

Dr.-inn fékk aptur sérferð með sænskættuðum á leið 28 frá Dalvegi áleiðis að Hálsatorgi. Því næst lá leiðin í meginlandsvagn númer 123 á leið 4 & hélt Gylforce-inn með honum að Mjódd þeirra Breiðhyltinga.

Eptir kvöldið er óhætt að segja að yfirburðir Svíans hafi verið algerir. Nú sem fyrr. Enda þótt dr.-inn sé spenntur fyrir 20 nýjum Crossway vögnum sem koma eftir áramótin, þýðir koma þeirra ugglaust að hinum sænskættuðu vögnum fækki ennfrekar á vígvöllum veganna, sérstaklega um kvöld & helgar. Það er eigi tilhlökkunarefni.

Út um vígvöll vagnar þjást
víða mjöll á götu.
Knúsum þá með kærleiksást
eins& Krist í jötu.


Mynd:citybus.piwigo.com

Hið lostfagra leiðakerfi 2015 ...

Dr. Gylforce hjó eptir því á einum samfélagsmiðlanna að hið framkvæmdastjóralausa byggðasamlag, Strætó bs., hygðist senda frá sér tilkynningu um breytingar á leiðakerfinu. Þær taka væntanlega gildi 4. janúar 2015 - eða eptir akkúrat mánuð - & því orðið tímabært að kynna okkur vagnverjum hvað i vændum er. Nema hvað.

Það hefir borist til eyrna að auka eigi akstur í hverfum höfuðborgarsvæðisins á annatímum. Það er vel. T.d. fær doksi kallinn leið 35 með korterstíðni & ljóst að bæta þarf við einum vagni í flotann hér í Voginum.

Einnig eru verulegar breytingar á leiðum 5 & 19 & þær sameinaðar að miklu leyti. Aukinheldur er ætlunin að láta leið 4 aka um Háaleitisbraut & vestur Miklubraut áleiðis í Hamraborg.

Þá munu Suðurnesin tengjast leiðakerfi Strætó sem er mikið fagnaðarefni.

Þetta mun allt saman skýrast um leið & Strætó bs. sendir frá sér tilkynningu þar að lútandi & bíður dr. Gylforce vitaskuld spenntur eptir að sjá þessar breytingar.

Vagn minn, gef mér vænleg jól
& vísaðu mér á Svía.
Lýstu myrkrið með lífsins sól
& ljáðu mér vagna nýja.

Vagnverjans vé ...

Á níu ára afmæli síðnanna, www.gylforce.blog.is & www.straeto.blogcentral.is heimsótti dr. Gylforce vitaskuld friðland farþegans, griðland Gylforceins, vagnverjans vé; Hlemminn.

Dr.-inn bar að gerði seint um kvöld & því voru fáir vagnverjar á ferli, því miður. 

En, njótið, njótið!

Vagnverjans vé
vinalegt hús
svart sauðfé
syngjandi blús

Geð guma ...

Hinn týslegi en þó fráleit tornæmi dr. Gylforce tísti af stað í eina af sínum alþekktu þriðjudagsþrumum hvar hann sat í einum fjórum vögnum þegar upp úr síðasta vagninum var staðið. Nema hvað.

Það gladdi hið gamla hró dr. Gylforce hvar hinn engilsaxneski & funheiti 305 MAN vagn var enn & aptur kominn á vígvelli veganna. Vagnstjórinn var af erlendu bergi brotinn & einn af þessum sem stöðvar ekki vagninn fyrir oss vagnverjum nema að við séum nánast límdir við biðskýlið. Sú týpan. Hvað um það.

Doksi kallinn hóaði í 126 Citelisvagninn á leið 4 við fjölmenninguna eystur í Engihjalla & hélt með honum stutta leið að Mjódd þeirra Breiðhyltinga. Þar langaði dr.-inn í leið 21 & kíkja aðeins á þann stað þar sem vagninn fór af leið um daginn & hafnaði inn á plani hjá SORPU. Dr. Gylforce fékk hinn stutta 249 Heuliezvagninn sér til fulltingis í för þessa en vhann var optsinnis á leið 24 hér forðum daga. 

Dr.-inn fylgdist með af athygli & sá verksummerki eptir vagninn við SORPU. Sá stutti leið ljúflega um lendur Garðbæinga & Fjarðarbúa hvar hann áði loksins í Firðinum. Þar gaf að líta fleiri stutta Heuliezvagna, t.a.m. 250 & 251 á leiðum 43 & 44 sem doksi á enn eptir að kanna. En ekki hvað???

Dr. Gylforce lauk þessari þrumu á þriðja degi vikunnar hvar hann skáskaut sér inn í 3ja hásinga sænskættaðan dreka á leið leiðanna, leið 1, & brunaði í hina kópvægsku Hamraborg.

Dr.-inn lokaði svo hringnum með sama vagni & í upphafi sem færði hann dr.-inn fagurlega í fegurstu laut jarðarkringlunnar, Stútulautina.

Þriðjudagsþruma
þægileg er.
Bætir geð guma
hvert Gylforce fer.

Gylforce-inn hinn geðþekkni ...

Hinn viðfelldni & viðkunnanlegi dr. Gylforce hefir verið í góðum & vænum gír undanfarið hvar henn hefir hringsólað huggulega með leið 35. Kynnisferðir, sem annast akstur leiðarinnar, hafa boðið upp á margvíslega vagna þessa dagana & svo virðist sem hinn engilsaxneski & funheiti MAN 305 vagn sé kominn í góða viðhaldsskoðun. 

 

Í stað 305 MAN vagnsins hafa hinir sænskættuðu Volvo-vagnar, 302, 303 & 309, tekið hringinn holla hér um hinn kópvægska vog. Eitthvað vagnahallæri er þó að hrjá Kynnisferðirnar hvar þeir hafa fengið lánsvagn, 237 Irisbus Karosa, suður úr Firði. Fróðlegt verður að sjá hvernig þeir ætla að haga sínum málum þegar þeir þurfa að bæta einum vagni við á leið 35 eptir áramótin.

Doksi kallinn hefir hinsvegar tekið grimmt leið 11 síðustu daga. Enda þótt öngvir sænskættaðir séu þar á ferðinni er leiðin vel vögnum búin af hálfu þeirra Fjarðarmanna en þar eru aðallega meginlandsvagnarnir, 201, 206 & 209 Crossway ásamt hinum glæstu þýsku Mercedes Benz vögnum, 222 & 223.

Leið 11, Seltjarnarnes-Mjódd veitir hugarró & hvíld hvar hún líður um Bústaðaveg, Háaleitisbraut & framhjá Miðbænum, í gegnum Háteigsveg, niður á Hlemm & dántán; svá vestur Hagatorg & hringinn hugljúfa hjá Seltirningum. Nema hvað.



Vagnverjinn í vænum gír
væflast milli leiða.
Huggulegur - ávallt hýr
með hlýja brosið breiða.


Myndir: citybus.piwigo.com

Omni-afmælis-link ...

Hinn borubratti & borginmannlegi dr. Gylforce brá sér vitaskuld út meðal vagnanna á afmælisdag síðunnar, 25. nóvember síðastliðinn - en ekki hvað??? Doksi kallinn fór marga unaðshringi meðal vagnanna en upp úr stóð þráseta góð í 102 Omnilink á leið leiðanna, leið 1. Nema hvað.

Dr. Gylforce lék kunnugleg stef út úr Stútulaut sinni enda ekkert annað hægt en að kalla á leið 35 þar um slóðir. Hinn engilsaxneski MAN 305 vagn var til taks & verður fróðlegt að sjá hvaða vagn kemur til með að aka með honum eftir áramót þegar auka á tíðni leiðarinnar á annatímum. Það verður spennandi.

Dr. Gylforce stóð eins & spjátrungur & buxnaskjóði í Mjódd þeirra Breiðhyltinga þetta annars milda þriðjudagskvöld. Byggðasamlagið lokar biðstöðinni á kvöldin & megum vér vagnverjar gera okkur það að góðu að hírast útivið í bið okkar eptir vinum vorum. Hvað um það. Dr.-inn tók sér far með 205 Crossway vagninum sem var á leið 24 & fékk sérferð með honum alla leið að Ásgarði þeirra Garðbæinga. Þar upphófst dýrðin.

Hinn áreiðanlegi & öruggi 102 Omnilink var á leið leiðanna - leið 1 - & hoppaði dr.-inn inn með mikilli gleði. Þessi vagn hefir verið á vígvöllum veganna frá árinu 2001 en það er vart að sjá & finna. Fimleikinn & mýktin var alger & sat doksi vitaskuld vinstra megin í vagninum & naut ferðarinnar til hins ýtrasta. Vagninn þaut um víðar lendur Garðbæinga, eðalhverfi Arnarnesinga, hvanngræna hvammana & upp rampinn að Hamraborg okkar Kópvæginga. 

& áfram hélt stuðið. Omnilink leið um fögur engi Fossvogsins, framhjá Kringlunni & ók svo áfram í átt að miðbæ Reykvíkinga á ljósrauðu akreininni uns hann staðnæmdist við Hlemminn.

Dr.-inn hélt svo áfram með 102 vagninum & fór til baka að Hamraborginni háu & fögru. Þvílíkur eðall, þvílíkt afmæli! 



Í sænskættuðum snilldarlegum
setu góða afmælis.
Gylforce-inn á gæfuvegum
glaður leitar þar hælis.

Mynd 3: citybus.piwigo.com