Nýsköpunarvagninn ...

Huga skal nú að nýsköpun
njóta jöfra andans.
Forðast alla eftiröpun
auka hróður landans.

Gleðilega páska!

Dymbilvikan var dásamleg
dýrðleg & án gáska.
Með glaum´ & gleði segi ég:
Gleðilega páska!

Spígsporað & spekúlerað ...

Í heiðríkju ég hélt af stað
í Hamraborginni ljóða.
Getur Borgarlínan blómstrað
í bænum mínum góða???

Dr. Gylforce var óðara kominn í Hamraborgina háu & fögru þennan annars skýlitla en svala laugardag. Nema hvað.

Dr.-inn velti fyrir sér svæðinu eins & það verður með tilkomu Borgarlínunnar margumtöluðu. 

Í gegnum hjarta þeirra Kópvæginga koma tvær leiðir Borgarlínunnar til með að fara. Önnur þeirra ekur frá miðbæ að Vatnsenda, í gegnum hið fagra Kársnes, um Smáralind, sala- & kórahverfi. 

Hin leiðin kemur til með að aka frá miðborginni alla leið að Völlunum í Firðinum. Það er ekki ósvipað leið leiðanna, leið 1, í núverandi leiðakerfi Strætós.

Aukinheldur verða tvær hefðbundnar strætisvagnaleiðir sem koma til með að stoppa í Hamraborginni. Þetta verða leið frá Ásgarði í Garðabæ, sem fer um Fífuhvammsveg, Dalveg og Hlíðarhjalla, í Hamraborgina, yfir brúna væntanlegu & endar í Háskólanum í Reykjavík.

Hin leiðin fer frá Hamraborg að Vatnsenda en í gegnum Nýbýlaveg, Mjódd, hluta af Seljahverfi & minnir seinni hluti leiðarinnar um margt á leið 2 nú til dags.

Í dag stöðva 6 leiðir í Hamraborginni en þeim verður fækkað niður í 4 (2 Borgarlínurleiðir & 2 strætisvagnaleiðir) en tíðni & ferðatími miklu miklu betri en við vagnverjar eigum að venjast.

Spennandi!

Flatpakkningavagninn fagri ...

Flatpakkningar framleiðir
fylgihluti og mat.
Ódýrar lausnir útbreiðir
í IKEA-vagni sat.

Hinn hjartahlýi & hugljúfi dr. Gylforce hefir haft áhyggjur af því undanfarnar vikur að ná ekki að njóta bláa vagnsins svokallaða sem ekur aðeins á leið 21, Mjódd-Fjörður-Háholt Hfj.

Jújú, hér á Gylforce-inn við IKEA-vagninn sem kemur skemmtilega á óvart, sérstaklega að innan hvar stjörnur eru í loptinu ásamt ýmsu fleiru fallegu.

Líklegt má telja að í janúar hverfi þessi fallega skreyting á braut & því gott að hafa komist í kynni við vagn þennan.

Aukinheldur gladdi það hið gamla hró dr.´s að sjá að suður i Hafnarfirði er búið að koma upp forgangsljósum fyrir vagnana sem flýtir för þeirra til & frá Firði.

Vel gert - yfir&út! 

Mínútur máli skipta ...

Mínútur máli skipta
miklu fyrir þig.
Götunni ætl´að lyfta
gjarnan á hærra stig.

Gamla hró dr. Gylforce gladdist hvar hann var á vappi suður í Firði þennan fallega & blíðláta sunnudag. Nema hvað. 

Doksi kallinn sá að í bígerð er að breyta götunni við Fjörðinn, setja umferðarljós & hleypa vinum vorum - vögnunum - strax til vinstri frá Firði.

Það mun stytta ferðatíma vagna & löngu tímabært að mati dr´s.

Vonandi lýkur þessum framkvæmdum sem fyrst svo vagnarnir geti ekið þarna um & "grætt" örlítinn tíma.

Yfir&út!

Skemmtilega skreytt skýli ...

Doktorinn hinn háfleygi
hoppaði út við EffBé.
Skemmtilegt í skammdegi
sem skreytir mín helgu vé. 

Stóð í stappi ...

Grímulausir, glatað þrugl
gildir um ykkur sama.
Upp með maskann ekkert rugl
& endum þetta drama.

Grímulaus grínari???

Það berast ekkert sérstaklega góðar fréttir af sumum vagnverjum, hvar þeir kjósa að nota ekki grímur inn í vinum vorum, vögnunum. Bera þeir því við að þeir hafi nú þegar fengið veiruna skæðu.

Hvernig á vagnstjórinn að vita það??? Það er ógjörningur.

Þess vegna verða allir verjar - nær & fjær - að setja á sig andlitsgrímu þegar þeir ferðast með unaðinum.

Koma svoooo - þetta er lítið mál!

Afarkostur yfirvofandi ...???

Skelfilegt er ef skerða á
skjótt á næstu misserum.
Þvílíkt lengi það tók að ná
þangað sem við erum.

Skerðing? NEI TAKK!

Í ljósi faraldurs & fárs kemur ekki á óvart að uppi séu hugmyndir um að skerða þjónustu Strætós. Illu heilli. 

Byggðasamlagið stendur frammi fyrir miklu tekjufalli sem jafnvel kemur til með að hlaupa á tugum milljónum, ef ekki meir. Hvað skal taka til bragðs?

Eitt er að eigendurnir, sveitarfélögin, leggi meira fé til rekstursins. Eflaust eru þau ekki spennt fyrir því hvar tekjur þeirra allra eru væntanlega að dragast saman. 

Þá er hinn möguleikinn; að skerða þjónustuna. Vonandi verður það þó ekki raunin eða í versta falli í svo litlu mæli að fáir vagnverjar finni fyrir því.

Vonum það besta.

Amen.

Nýtt leiðakerfi nyrðra ...

Góðar fréttir berast oss nú frá Oddeyringum, hvar hinir regluföstu Akureyringar hafa hug á að einfalda leiðakerfið sitt & auka tíðnina. Vel gert!

Nyrðra hlýða allir reglum

Dr. Gylforce hefir nokkuð opt hér fjallað um leiðirnar norðan heiða & jafnvel minnst á óreiðukenninguna í því sambandi.

Enda þótt ókeypis sé í vagnana er það ekki nóg; huga þarf vel að leiðakerfinu & tíðninni sem & þeir hyggjast nú gera. & hafa m.a. fengið sérfræðinga að sunnan sér til fulltingis, SAS-ara!!! Heyr á endemi - hvur átti von á því??? 

Aukin tíðni -   einfaldara kerfi

Aukum tíðni eins & í denn
eftirspurnina neglum.
Allir vita að Norðanmenn
alfarið fylgja reglum.

Brjóst & þristur - Jesús Kristur ...

Kominn er nú Kristur
í krappan dans.
Mun nú minn þristur
mynda hann sem trans.

Mikið fjaðrafok er nú þessa dagana vegna auglýsingar Þjóðkirkjunnar um Sunnudagaskólann yndislega. 

Frumkvöðlafræðingurinn frægi, Margrét Friðriksdóttir, finnur auglýsingu þessari flest allt til forráttu & til að bíta höfuðið af skömminni - að hennar mati - á að setja þessa auglýsingu á strætisvagna!

Dr. Gylforce er ekki sammála frumkvöðlafræðingnum & hlakkar einfaldlega til þess að sjá hinn brjóstgóða & fallega Krist veifa honum á vögnunum í Stútulautarselinu. 

Yfir&út!

Magga Frið gefur öngvum grið