Fólk og ferðamynstur ...

Um þriðjungur vel þráir
þrengsli á akrein.
Og íhaldsmenn heiðbláir
hausnum berj´í stein.

Þriðjungur velur einkabílinn

Könnun fyrirtækisins Maskínu á ferðahögum fólks var birt í vikunni & er allra athygliverð. Heldur betur - maður lifandi!

Rúmlega helmingur aðspurðra vilja komast til & frá vinnu með vagninum, hjólandi eða gangandi. & aðeins rúmlega þriðjungur, eða um 35%, vill notast við einkabílinn.

Aukinheldur kemur fram í könnuninni að yngra fólk er viljugra til þess að notast við fjölbreyttari ferðamáta heldur en þeir sem eldri eru. Það rímar nokkuð vel við það sem dr. Gylforce hefir sagt á þessum vettvangi.

Dr.-inn hefir sagt það margopt hér & endurtekur enn sína speki: Í hvert sinn er hann sest upp í óvininn - einkabílinn - spyr hann sig þessarar spurningar: Er möguleiki á því að komast þessa ferð með öðrum hætti???

& svarið kemur kannski sumum á óvart - en það er nefninlega JÁ!

Kyrrlát kollvörpun ...

Rafvagn & rafskúta
rosalegt er geim.
Mögnuð hver mínúta
mig langar ekki heim.

Það er óhætt að segja að alger bylting hafi orðið í framboði á leigu á rafskútum á ákveðnu svæði í henni Reykjavík. Heldur betur!

Enda þótt dr. Gylforce hafi ekki gert nógu mikið af því í sumar þá fer það einstaklega vel saman að vera í vögnunum & leiga sér rafskútu í miðbænum. Maður lifandi!

Þetta kann að vera fyrirmyndar ferðamáti framtíðarinnar enda hefir orðið alger sprenging í rafskútum og er nú t.d. hægt að leiga um 1100 slíkar í höfuðborginni.

Svo er vitaskuld hægt að eiga sína eigin - en ekki hvað???

Kyrrlát kollvörpun

Vesældarlegur vagnverji ...

Vagnstjóri á vakt
vesen & þrugl.
Ástand allsérstakt
andskotans rugl!

Vesenisvagnverji

Vagnstjóri á leið 14 frá verktakanum inn við sundin blá lenti í kröppum dansi á vaktinni í gær við Hlemmtorgið.

Í vagninn komu þrír vagnverjar & hapði einn sig mest í frammi með ókurteisi & ósvífni. Steininn tók þó úr þegar hann hrækti á vagnstjórann enda durtur þessi HIV-smitaður & með lifrarbólgu C.

Góðu heilli er atvik á borð við þetta ekki algengt í vögnunum - vinum vorum - en samt finnst dr.-num hann heyra alltof mikið um svona ruddamennsku. 

Burt með þessa hegðun - strax!

Tækifæri fyrir fyrirtæki ...

Yndisleg heilauglýsing
eða afturendi.
Fyrirtækja er freisting
augljós fyrir hendi.

Auglýsingar á vögnunum

Dr. Gylforce vonar innilega að fyrirtæki landsins taki við sér & sjái hag sinn í að auglýsa á vinum vorum, vögnunum. 

Þarna fá grafískir hönnuðir sem og textagerðamenn á auglýsingastofum gott tækifæri til þess að sýna hvað í þeim býr & hvursu skapandi þeir geta verið. Maður lifandi!

Nokkur mjög vel heppnuð skilaboð eru í umferð núna. Góðu heilli. Sum eru kostuð af fyrirtækjum & stofnunum eins & Origo & Biskupsstofu en önnur eru t.a.m. Gagna- & Transvagninn.

Já, vonandi verður gott & mikið framhald á þessu. 

Firma þessa lands - koma svoooooooooo!!!

Leitin að Jesú(vagninum) ...

Enn virðast kirkjunnar menn hafa brjóst í sér til þess að finna fallegu auglýsingunni frá Sunnudagaskólanum allt til foráttu af hinum síðhærða Jesú Kristi, brosandi & með andlitsfarða. Nema hvað.

Vissulega mega sálnahirðar & sálusorgarar þessa lands segja það þeim býr í brjósti. En ekki hvað?? 

Það er ekki Gylforce-ins að skipta sér af því svo sem. En hann kennir örlítið í brjósti um þá sem æsa sig yfir þessari saklausu mynd af Frelsaranum.

Doksi kallinn vonar bara að hinn fagri Jesúvagn fái að vera í friði á vígvöllum veganna næstu misseri.

& talandi um Jesúvagninn. Dr. Gylforce varð viðþolslaus heimavið, varð að valhoppa á næstu stoppistöð & fara góða ferð með Kristi. En ekki hvað???

Ég valhoppaði viðþolslaus
varð að finna Krist.
Eptir mikið röfl & raus
rambaði ég á tvist.

Öngvinn Kristur, varð kolvitlaus
kannaði marga vagna.
Ég reyndi samt að halda haus
halda kjafti & þagna.

Illu heilli fann dr.-inn ekki Jesúvagninn þetta annars ágæta kvöld. Reynir aptur á morgun.

Amen.

Kristur kominn á leið ...

Auglýsingin af Kristi
ekki var á þristi
Sá hann túra á tvisti
taumlaust mig þá missti.

Amen.

Dr. Gylforce var spenntur fyrir því að hitta fyrir Jesúvagninn en nýjasta myndin af honum gerir honum mjög auðvelt að líta í eigin barm. Nema hvað.

Illu heilli fannst vagninn ekki á leið 3 heldur leið 2 & mátti sjá þennan fagra rafvagn renna um efri byggðir Kópavogs með fallegum hætti.

Vonandi nær dr.-inn að komast í betra návígi við vagninn hið fyrsta.

Amen (aptur).

Rauðgulu gleymdir & grafnir ...???

Rauðgulu farnir - ekkert feik
fötluðum til góðs???
Pantakstur nú kominn á kreik
en kannski til hnjóðs???

Í sumar var ferðaþjónustu fatlaðra breytt & tekin upp síða er ber einfaldlega heitið pantakstur.is. 

Í framhaldinu var guli liturinn tekinn af vögnunum aukinheldur sem merki strætó (lógó) var fjarlægt.

Vagnarnir eru nú alrauðir með myndum á en dr.-inn saknar gömlu ásýndarinnar. Maður lifandi! 

Vonandi er þjónustan betri hjá Pantakstri & elur dr. Gylforce þá von í brjósti að notendur þjónustunnar séu ánægðir með hana eptir sumarið. 

Já, yfir&út!

Akstur hafinn ...

Hafinn akstur um Urriðaholt
hamingjan vex í bænum.
Styrkur svæðisins sem & stolt
í strætó vistvænum.

Segja má með sanni að í dag hafi leið 22 hafið akstur með formlegum hætti. Leiðin sú ekur um hið vistvæna & vottaða hverfi Urriðaholts. 

Boðið er einungis upp á akstur á annatímum virka daga til að byrja með. Að mörgu leyti er það skiljanlegt & skynsamlegt að byrja rólega.

Enda þótt þessi hvíta smárúta frá Hópbílum sé eflaust ágæt hepði farið betur á því að bjóða upp á t.d. rafvagn um þetta vel skipulagða & fallega hverfi. 

Illu heilli komst dr. Gylforce ekki um borð í leið þessa þennan annars magnaða mánudag en mun efalítið taka hús á honum þegar líða fer á vikuna.

Yfir&út!

 

Ekið um Urriðaholt ...

Gleði meðal Garðbæinga
Gylforce til í fögnuðinn.
Það mun samt öngvin þvinga
þá í vagnaunaðinn.

Ný leið - nýr unaður

Í dag er vert að fagna hvar ný leið í hinu lostfagra leiðakerfi hefur akstur. Reyndar byrjar hún bara sem pöntunarþjónusta frá Hreyfli þennan blauta hvíldardag en á morgun hefst aksturinn fyrir alvöru. Maður lifandi!

Leið 22 verður með óvenjulegu sniði af hálfu byggðasamlagsins. Á annatímum, kl. 7-9 & kl. 14-18 virka daga, ekur 18 manna smárúta leið þessa & verður hún líklega ekki fagurgul eins & vagnar vorir. Þess á milli verður pöntunarþjónustan í boði en slík þjónusta er t.d. fyrir hendi á leiðum 23, 27 & 29. Nema hvað.

Vonandi taka Garðbæingar búsettir í Urriðaholti vel í vagninn & hlakkar dr. Gylforce mjög til að taka unaðshring um þetta fallega hverfi.

Innan fárra ára ...

Innan fárra ára
akandi sjálfur.
Um alla útnára
& aldrei hálfur.

Ekur sjálfur innan fárra ára

Það verður ei ofsögum sagt að spennandi tímar séu framundan hvað almenningssamgöngur varðar. & reyndar samgöngur almennt. Maður lifandi!

Í mörgum löndum í kringum okkur er allt á fullu við að prófa sjálfkeyrandi strætisvagna. Yfireitt er um að ræða litla vagna sem eru með einum starfsmanni til að byrja með. Má benda á lönd eins & Danmörku, Noreg og Finnland í því sambandi.

Framkvæmdastjóri byggðasamlagsins er opinn & jákvæður í garð þessara sjálfakandi vagna og er það vel. Meira að segja hefur Strætó reynt að fá til sín slíka vagna til reynslu en ekki orðið ágengt ennþá í þeim efnum.

Vonandi finnur framkvæmdastjórinn fé til þess að leigja einn sjálfkeyrandi vagn. Það yrði virkilega athyglisvert - maður lifandi!

Yfir&út!