Gula gleðin ...

Hinn hávísindalegi & háttvísi dr. Gylforce hefir farið mikinn á fjörurnar við vini vora - vagnana - undanfarna daga hvar hann hefir rannsakað margt & komist í kynni við urmul vagna. Nema hvað.

Á ljúfum & lítillátum laugardegi laumaðist dr. Gylforce inn í leið 3 við Sæ(roks)braut þeirra Reykvíkinga & langaði með honum upp að Hlemmtorgi. Dr.-inn fékk hinn sænskættaða 105 Omnilink sem var allur skakkur & skældur að þessu sinni & dauðþreyttur á vígvöllum veganna. Hlemmur reyndist aukinheldur hans endastöð & var vagninn í framhaldinu dreginn upp á Háls til viðgerðar. Hvað um það.

Eptir linnulitlar rannsóknir hefir doksi kallinn komist að raun um það að um helgar breytist leið 3 yfir í leið 4 við Hlemmtorg sem átti einkar vel við hvar dr.-inn var á leið í Voginn sinn. Þar fór hann enn & aptur eðalhring með hinum stutta 304 MAN vagni á leið 35.

Í vini mína ljúft ég loks
á leið um hávetur.
Leynda kimi Kópavogs
kanna vil ég betur.*

Í blæðandi sári morgunsins hóaði dr. Gylforce í 303 vagninn á leið 28 við Salalaugina & fékk með honum snotran sænskan túr að hörðustu völlum okkar Kópvæginga.

Svo eptir stutta stund skal enn haldið á vit vagna & verður fróðlegt að sjá hvaða vagnar verða á vegi doksa. 

Fylgist með - fylgist með!

 
Mynd: http://citybus.piwigo.com/
seinni línur fengnar frá http://johanneslaxdal.blog.is