Hinn ungi & aldni ...

Hinn borginmannlegi & blístrandi dr. Gylforce bauð unga vagnverjanum upp á urmul vagna í dag hvar þeir feðgar njóta nú þess að vera í góðu jólafríi. Nema hvað.

Þeir hófu leik við Hamraborg okkar Kópvæginga hvar þeir stigu inn í hinn stutta Heuliez 159 vagn á leið 4 áleiðis í Mjóddina. Vagnstjórinn kom lullandi á vagninum að Hálsatorginu & var lítt að flýta sér. Feðgarnir tylltu sér í breiða sætið fyrir aptan aptari hurðina & fylgdist sá stutti af athygli með öllum biðstöðvum á leiðinni.

Frá Mjódd þeirra Breiðhyltinga hröðuðu þeir sér inn í 202 Crossway vagninn á leið 12. Við Voga héldu þeir feðgar út úr meginlandsvagninum en hóuðu stuttu seinna í 237 vagninn á sömu leið en sá vagn var nú hér áður á leið leiðanna, leið 1. Það var á tímum þegar verktakinn í Firði annaðist akstur á hinni fyrstu leið. Nú er hún í höndum Strætó bs. Leið feðganna lá að að Hlemmi - tenging við aðrar leiðir.

Doksi kallinn bauð unga vagnverjanum að velja vagn við Hlemmtorgið. "Veldu vinur, veldu, bara hvern sem er".

& ekki varð dr.-inn fyrir vonbrigðum. Sá stutti vildi ólmur inn í hinn sænskættaða 105 Omnilink á leið leiðanna, leið 1. "Vel valið sonur, vel valið" kallaði doksi í sífellu til hans & fylltist stolti.

Feðgarnir flugu með hinum sænskættaða vagni & ekki spillti fyrir að vagnstjórinn var sá hinn sami & keyrði doksa opt & iðulega á leið 5 vestur á Mela hér forðum daga á 51 (5D) Scaniavagninum. Maður lifandi.

Hinn ungi fékk sér örlitinn kríublund í 105 Omnilinknum enda mýktin & þýðleikinn með afbrigðum góður í þessum annars gamla vagni.

Í Hamraborg okkar Kópvæginga kvöddu feðgarnir Svíann með virktum & héldu glaðir í bragði í fegurstu laut jarðarinnar, Stútulautina. 

Ungi & aldni héldu af stað
í eðal vagnaferðir.
Ýmsir "bössar" komust á blað
& býsna margar gerðir.