Dyr & dyngja ...

Hinn teinótti & tignarlegi dr. Gylforce á ansi erfitt með að sitja heima vitandi að á annan tug nýrra vagna eru komnir á vígvöllum veganna.

Dr. Gylforce brá sér venju samkvæmt í hinn funheita & engilsaxneska 305 MAN vagn á leið 35. Fáir vagnverjar voru á ferli að þessu sinni enda dagur að kveldi kominn.

Dr.-inn gekk hröðum skrefum úr Engihjallanum að Mjódd þeirra Breiðhyltinga til þess að komast í kynni við hina glæstu & glænýju Crossway vagna.

Doksi kallinn kom að Mjóddinni & var hún þá lokuð. Það er alltaf jafn skrýtið að hún sé ekki opin meðan vagnarnir ganga. Hvað um það. Dr.-inn tók leið 24 enda kom hún fyrst & fékk nokkuð gamlan 265 Karosavagn til þess að flytja sig suður til Garðbæinga.

Í Ásgarði kom hinn langi & liðugi 198 Volvo 3ja hásinga vagn á leið leiðanna, leið 1. Doksi er alltaf jafn ánægðum með vagn þennan & tyllti sér fremst hjá vagnstjóranum & hélt áleiðis að Lækjartorgi eða Hlemmi.

Þegar leið 1 kom að Hamraborg okkar Kópvæginga sá doksi glæstan & glænýjan 152 Crossway vagn á leið 2. Þetta var öngvin spurning. Hann hoppaði út & skellti sér með honum góðan & gylltan hring. Ekki spillir fyrir að nú ekur leið 2 líkt & leið 141 gerði forðum; framhjá Verzló, Borgarspítalanum & svá niður Grensás.

Á Hlemmtorgi leit dr. Gylforce vel í kringum sig því hann vildi endilega rannsaka fleiri glæsta & glæsilega nýja vagna. En þvi var vart að heilsa. Alltof fáir slíkir voru á vachtinni. Öngvu líkara var en að það væri Citelisdagur hjá byggðasamlaginu því urmull af 120-134 vögnunum voru í akstri.

Dr-inn reyndi hvað hann gat að finna fleiri glæsta en tókst það því miður ekki. Hinsvegar fékk hann nokkra aðra Crossway vagna, t.d. 144 & 146 & tók nokkra hringi með þeim & lét sér það gott heita hvar hann svá endaði með 305 vagninum í fegurstu laut jarðarkringlunnar, Stútulautinni.

Gylforceinn i gullhringjum
með gleði, ást & hlýju.
Dyrum leitar & dyngjum
að drossíunum nýju.


Mynd; straeto.is