Verktakavitfirring ...

Hún reyndist heldur undarleg vagnaferð dr. Gylforce í dag hvar hann hugði taka leið 35 frá Hamraborg kl. 15:07 að Stútulautinni sinni fögru. 

Á stæðinu þar sem leið 35 leggur opt & einatt var þessi hvíti rútukálfur sem sést á myndinni. Doksi kallinn velti því fyrir sér hvers vegna einhver legði þarna meðan hann beið eptir vagninum. En viti menn. Í glugganum á hvítu rútunni var illa krotaður miði sem á stóð "35"!!!

Vagnstjórinn útskýrði vandræðalega að þetta væri vagninn vegna mikilla bilana í flota Kynnisferða en verktakinn sá sér um leiðir 28 & 35 hér í Voginum.

Inn í þessari rútu var hvorki hægt að borga með peningum né fá skiptimiða. Það var ekki hægt að ýta á stanzrofa því þeir voru öngvir & þegar maður vildi út varð maður að öskra til vagnstjórans. Þetta minnti óþægilega mikið á verktakann Teit nokkurn Jónasson þegar hann var að sýsla í strætóakstri hér fyrir nokkrum árum. Góðu heilli er hann nú á bak & burt. 

Þetta var ein daprasta vagnaferð sem doksi kallinn hefir lent í lengi. Það er meö öllu óásættanlegt að verktakar sem annast akstur fyrir Strætó bs. geti ekki gert það með sómasamlegum hætti. Vitaskuld geta alltaf komið upp óvæntar bilanir á vögnunum en er þá ekki hægt að fá lánaðan vagn hjá Strætó bs. eða Hópbílum suður í Firði???

Er ekki líka vert að skoða samsetninguna á flotanum hjá Kynnisferðum??? Enda þótt þeir eigi urmul af sænskættuðum vögnum eru langflestir vagnarnir komnir vel til ára sinna & því hætt við að viðhald þeirra sé orðið mjög mikið. 

Nú þarf þessi verktaki að skeina sér & hysja svo upp sig - þetta er ekki boðlegt.

Athugasemdir

[Jón Þórarinsson (IP-tala skráð) 24.1.2015 kl. 02:45]

Þessi rúta var einu sinni notaður sem innanbæjarvagn í Reykjanesbæ hjá SBK.

Þessi rúta er innréttaður meira sem strætisvagn að innan og því ekki alveg einsog rútur eru flestar allavega seinast þegar ég vissi.

NR-J36 var með vinnunúmer 117 hjá SBK.

K.v.

Jón Þ

[Jón Þórarinsson (IP-tala skráð) 30.1.2015 kl. 01:11]

Bæði Strætó-bs og Hagvagnar búa líka vagnahallæri, Það er ekki vitað hvort Kynnisferðir verði í strætóakstri eftir 3 ár.