Gjöfular lendur Grafhyltinga ...

Hinn blendni & brögðótti dr. Gylforce brá sér í urmul ferða hvar vetrafrí stendur nú sem hæst hjá vagnverjanum. Nema hvað.

Dr.-inn hugðist kynnast gestrisni Grímsnesinga á sunnudaginn en veður hamlaði öllum eðalferðum & því fátt um fína drætti hvað blágulu vagnana varðar. Hvað um það.

Dr. Gylforce stóð kátur & keikur við Hlemmtorgið í hádeginu & hugðist leita fanga í einum sænskættuðum. Það var eigi hlaupið að því. Irisbus & Iveco Crossway vagnarnir hafa algerlega yfirtekið sviðið. Ef þeirra naut ekki við, bauð byggðasamlagið, Strætó bs., upp á Irisbus Citelis & Irisbus Karosa vagna.

Það var aðeins hægt að finna einn & einn Scania Omnilink á stangli, aðallega á leið 1 & því ekkert annað en að stíga í vænginn við leið leiðanna. 

Í sænskættaðan ætíð sest
& sit þar lengi inni.
Það mér þykir allrabest
í þýðri veröld minni.

Eptir ferð suður í Fjörð & tilbaka með 104 Omnilinknum á leið 1 var komið að því að kynnast gjöfulum lendum Grafhyltinga. Dr.-inn hefir sjaldan verið á þeim slóðum & því löngu tímabært að einhenda sér inn í leið 18. En ekki hvað???

Dr.-inn vonaði að einn fjögurra vagna á leið 18 væri sænskættaður en svo virtist ekki vera, því miður. Doksi kallinn tyllti sér því tignarlega inn í 121 Citelisvagn á leið 18 & þaut með honum að Þúsaldarvegi þeirra Grafhyltinga.

Dr. Gylforce freistaði þess að ná leið 26 eptir að hafa skrafað & skeggrætt við Grafhyltinga. Eitthvað malaði doksi kallinn of mikið við innfædda vagnverja þarna því hann rétt sá á eptir leið 26. Voru nú góð ráð rándýr eins & þar stendur því hin 26. leið hefir aðeins klukkutímatíðni.

Dr. Gylforce gekk & ráfaði um holtir & hæðir Grafhyltinga hvar hann loksins sá til 143 Crossway vagnsins á leið 18. Fór dr.-inn með honum alla leið að Hlemmtorgi & verður leið 26 að bíða betri tíma.

Meira síðar mínir virðulegu vagnverjar.


Myndir: citybus.piwigo.com/