Aðeins af re.is ...

Hinn fráleitt hangs- & höktandi dr. Gylforce hélt rakleitt á vit vagna í hádeginu hvar hann hugði fylgjast grannt með hvernig nýja vetraráætlun höfuðborgarsvæðisins gengur. Nema hvað.

Dr. Gylforce var reyndar ekki á vappi á annatíma en öngvu að síður var eitt & annað sem vakti athygli hans. 

Doksi kallinn hefir örlitlar áhyggjur af tímaáætlun vagnanna í Hamraborginni. Hann er aðallega að velta vöngum yfir leiðum 1, 2, & 4 úr bænum & á leið í hverfi. Það eru vonbrigði að sjá t.d. leið 2 koma 3 mínútum of seint við Hálsatorgið klukkan 13 þegar hvorki er mikil umferð á vegum né af vagnverjum. Hvernig mun ganga að fylgja áætluninni eptir í vetur þegar hálka & snjór kemur???

& annað sem áður hefir hér verið tæpt á. Nokkrum vagnstjórum Kynnisferða, re.is, er aka leiðum 28 & 35 hér í Voginum, er fyrirmunað að leggja af stað á réttum tíma úr Hamraborginni. Það er með öllu óásættanlegt að mati dr.´s að báðar leiðirnar séu að skríða af stað klukkan 13:11 í stað kl. 13:07 eins & gerðist í dag.

Öngvin sjáanleg ástæða var fyrir töfinni nema það að vagnstjórarnir voru að spjalla hvor við annan. Stundum eru þeir reyndar að svæla í sig einni sígó eða svo & leggja því of seint af stað. 

Vonandi sjá forvígismenn byggðasamlagið þetta & bregðast við. Svo væri fínt að sjá eptirlitsmennina fara aptur á stjá. Þeir gætu nóterað þetta niður.

Það er mikilvægt að vagnarnir haldi áætlun & vagnstjórar ættu að hafa þann metnað að gera allt sem í þeirra valdi stendur til þess að svo sé.

Doktornum er nú ekki um sel
endalaust droll í smók.
Góðu vagnstjórar, gjöriði svo vel
gyrðiði ykkur í brók!