Amatörinn amma ...

Í ræmunni var rugl
um ribbaldann Hófí.
Víxluðust vagnar - þrugl
viðvaningslegt en hví???

Dr. Gylforce brá sér í kvikmyndahús í gærkvöldi, hvar hann fór á skemmtilega mynd um hana Ömmu Hófí. Nema hvað.

Aðalpersónur myndarinnar ferðuðust góðu heilli í vinum vorum - vögnunum - grimmt en aðeins suður í Firði.

Hinsvegar brá dr.-num í brún hvar þau skunduðu inn í rafvagn við Fjörðinn. Afar sjaldgæft er að sjá þá á þeim slóðum enda væri það aðeins hægt á leið leiðanna, leið 1. Þar eru þeir sjaldan á vaktinni.

Steininn tók þó úr þegar persónurnar, Hófí & Pétur, vippuðu sér í rafvagninn er ók af stað. Næsta skot var þyrlu (eða dróna) skot en þá sást allt annar vagn!!! Þar var Iveco Crossway vagn á ferðinni - öngvinn rafvagn - maður lifandi!!!

Hvaða amatörar stóðu að þessari mynd???

Dr.-inn er furðu lostinn, jafnvel niðurbrotinn.

Inn að aptan nyrðra ...

Inn að aptan hér við lýði
öngvin er véfrétt.
Vilja bara hlýða Víði
vagnstjórum er létt.

Það hefir vakið gjörhygli Gylforce-ins hvar enn er oss vagnverjum meinað að ganga inn í vagnana hér nyrðra að framan vegna Covid-19.

Hvers vegna það er enn við lýði hér í höfuðstað Norðurlands er dr. Gylforce ekki kunnugt um, en öngvu að síður skapar þetta lítið vandamál hvar gjaldfrjálst er í vagnana.

Vagnverjarnir geta valsað inn & út að aptan & hefir það lítil áhrif, ólíkt byggðasamlaginu fyrir sunnan en þar þvældist greiðslan eilítið fyrir í framkvæmdinni. Hvað um það.

Annars er vagnakostur Strætisvagna Akureyrar með miklum ágætum. Undanfarin ár hefir flotinn verið endurnýjaður & er t.d. möguleiki á að hafa 75-100% af vögnunum sem eru í umferð metanvagna.

Það er glæsilegt - & sænskættaðir í þokkabót! 

... "komist í sjúklegar álnir" ...

Er hann kom í höfuðstað
hjá Norðlendingi.
Strax í metan - en ekki hvað?
Indæla fór hringi. 

Sjúklegum álnum situr í 
sá guli er sko hnoss.
Ábyggilegur um borg & bí
brosmildur er Gylfoss.

Hinn ungi & aldni vagnverji voru vart komnir inn Eyjafjörðinn, hvar þeir einhentu sér um hæl í hina sænskættuðu metanvagna hér nyrðra. Unaður.

Reyndar var aðeins leið 6 á vaktinni líkt & Oddeyringar hafa um helgar. Leiðin sú fer um nær allar lendur nyrðra & er fyrirtaks "sightseeing" um höfuðstað Norðlendinga. Nema hvað.

Hopp & vagn - skopp & fagn ...

Á hoppandi flakki feðgar nú
flottar eru rafskútur.
Við vagna held enn tryggð & trú
tek mér mínar mínútur.

Hinn ungi & aldni vagnverji héldu rakleitt í leið 4 frá Stútulautarselinu i ágætisveðri, hvar þeir ætluðu að bardúsa nokk sem mikið er í uppáhaldi hjá þeim; vagn & hopp. Maður lifandi!

Leiðir 3, 4, 14 & 17 komu við sögu hjá vagnverjunum víðförlu aukinheldur sem rafskútur frá Hopp voru brúkaðar af miklum móð í miðbænum. Þvílíkt stuð!

Fleiri svona daga takk!

Voveifilegur atburður í vagni ...

Andlitsgrímur á ykkur nú
annars þurfið að ganga.
Reglan er sannarlega sú
sumardaga liðlanga. 

https://www.ruv.is/frett/2020/07/08/redust-a-bilstjora-sem-bad-farthega-ad-nota-grimur

Öngvinn vagn ...

Lati Gylforce til lands & sjós
lítið gerir gagn.
Fallega & heiðraða Hófsós
hér er öngvinn vagn!!!

Dr. Gylforce er með böggum hildar, hvar hann elur manninn í yndislegu & ægifögru þorpi, Hofsósi. 

Illu heilli er ekkert um vagnaferðir hér yfir sumartímann & leið 85 virðist nú ganga hér yfir veturinn. Góðu heilli.

Leiðin sú er þó pöntungarþjónusta hvar hringja þarf í ákveðið númer hálftíma fyrir brottför.

Gott er að halda því til haga að slík þjónusta er aukinheldur í boði á þremur leiðum á höfuðborgarsvæðinu; leiðum 23 (að hluta til), 27 & 29. 

Prófessor einn skeiðaði nefnilega á dögunum fram á ritvöllinn & nefndi þessa leið - pöntunarþjónustu - eins & hún væri ekki til. 

Svo er ekki. Bara alls ekki.

Yfir&út! 

Öngvinn akstur í sumar :(

 

Bábilja í borgarfulltrúa ...

Vigga greyið vill ei nekt
á vagnana sælu.
Löngu orðin vel landsþekkt
fyrir lygi & þvælu.

Borgarfulltrúi Miðflokksins fer mikinn á samfélagsmiðlum dag þennan vegna auglýsingar Ljósmæðrafélagsins á rafvagni í tilefni af 200 ára afmæli Florence Nightengale. Er auglýsing þessi ekki fyrir viðkvæma að mati hans aukinheldur sem nakið fólk geti vart verið heppileg ásýndar fyrir verðandi farþega Borgarlínunnar. Humm, humm???

Ekki er langt síðan sami einstaklingur hapði allt á hornum sér varðandi kaup Strætós á 14 rafvögnum frá Kína. Í því samhengi var ýjað að spillingu vegna þess að stjórnarformaður fyrirtækisins, sem hefur umboð fyrir rafvagnana, er fyrrum þungavigtarmaður í Samfylkingunni, sem er sami flokkur og borgarstjórinn er í. Síðar kom upp úr dúrnum að kaupin voru ákveðin árið 2016 en samfylkingarmaðurinn varð stjórnarformaður tveimur árum síðar & því afar hæpið að hann hafi hlutast til um málið. Nema hvað.

Á síðasta ári skeiðaði fulltrúinn svo enn á samfélagsmiðla & lét hátt vegna svokallaðra innviðagjalda Reykjavíkurborgar. Taldi hann sterk rök fyrir því að þau væru ólögmæt því lagastoð skorti fyrir þessum gjöldum. Á dögunum gekk dómur í málinu hvar Reykjavíkurborg var sýknuð í málinu. 

Hví eru fjölmiðlar alltaf að lepja þessa þvælu upp???

Vigga viðutan

Boðsferð fyrir börnin ...

Borgarferð, betra verð
boðsferð sem rokkar!
Annálsverð, unaðsferð
eykur velferð okkar.

Byggðasamlagið Strætó er heldur betur í stuði yfir hásumarið, hvar þeir bjóða í júlímánuði upp á spennandi tilboð fyrir fjölskylduna. Maður lifandi!

Börn, sem eru 17 ára og yngri & í fylgd með forsjáraðila, fá frítt í strætó á höfuðborgarsvæðinu í júlí. Takk fyrir túkall!

Hinn fullorðni skal framvísa gildu fargjaldi, eins & strætókorti, appi, farmiðum eða pening og börnin sem eru í fylgd þeirra fá að ferðast frítt með.

Vá, geggjað! Strætó - besta leiðin!

 

Blessaður, blíði vagn ...

Kom blíðmáll, þú blíði vagn
blessaður sé þinn hringur.
Megi þú ávallt gera gagn
á götunni þú syngur.

Hinn ungi & aldni vagnverji herjuðu á vini vora - vagnana - í brakandi blíðu gærdagsins - hvar þeir þrömmuðu í þrjár eðalleiðir á höfuðborgarsvæðinu. Maður lifandi.

Feðgarnir fóru á fjörurnar við leið þrettán en ár & dagur er síðan doksi kallinn hefir komist í kynni við leiðina þá. Ó, já. 

Það gladdi hró hans hve vel vagnstjóranum á hinni þrettándu leið tókst að halda áætlun. Hinn ungi & aldni höpðu gengið um stund & reynt við rafskútur en sáu svá vagninn við Lönguhlíð & gengu inn. Nema hvað.

Næst var á dagskrá að einhenda sér & arka inn í ellefuna & halda rakleitt í Mjódd okkar Breiðhyltinga, hvar vér feðgar tókum lengri leiðina með fjarkanum alla leið í fegursta Stútulautarselið í seljahverfinu. En ekki hvað???

Yfir&út!

Hlutafélag um Borgarlínu ...

Fyrr í kvöld bárust gleðileg tíðindi frá Austurvelli, hvar alþingismenn samþykktu samgönguáætlun til næstu 15 ára fyrir litla 120 milljarða. Maður lifandi!

Inn í þessu eru lög sem heimila ríkinu að stofna hlutafélag með sveitarfélögunum sex á höfuðborgarsvæðinu um Borgarlínuna. 

Um línu þessa eru afar skiptar skoðanir & hægt að lesa um það út um allt í netinu. Eðlilega eru alls konar sjónarmið á lopti enda rándýr framkvæmd hér á ferðinni sem mun aðeins að hámarki ná um 12%-15% af heildarferðum á höfuðborgarsvæðinu ásamt Strætó.

Stefnt er aukinheldur að því að gangandi, hjólandi, rafskútur o.þ.h. verði um 21% af ferðum & einkabíllinn - sem mörgum er svo annt um - verði um 65-67% af öllum ferðum en ekki 92% eins & staðan er núna.

Nú hefst fjármögnun verkefnisins af fullum krafti & verður fróðlegt að sjá hvernig þessi græna innviðaruppbygging kemur til með að falla í kramið hjá höfuðborgarbúum.

Dr. Gylforce bíður spenntur.

Loftslagsmál, aukin lífsgæði
losna fjölmörg bílastæði 
því Borgarlínan er bæði
til bóta & algjört æði!

Yfir&út!