Tvistur, þristur - Jesús Kristur ...

Æ, vagn minn virðulegi 
ver þín gata greið.
Ég bugta mig & beygi
& bruna þína leið.

Dr. Gylforce hefir verið galtómur & gamalær í allan morgun; þagað eins & Þangbrandur gerði fráleitt forðum ellegar logið eins & landeyða. Nema hvað.

Dr. Gylforce langaði að nýta gjörhygli sína & grandskoða leið 2, hvar tímaáætlun hennar hefir verið hnikað til með það að markmiði auðvitað að hún gefi betri mynd af rauntímanum.

Dr.-inn hóaði - eins & maður sannkristinn - í tvistinn við Hamraborg þeirra Kópvæginga. Vagninn sá var á hárréttum tíma & bauð byggðasamlagið upp á 142 Irisbus Crossway sem kemur til með að fagna sex ára afmæli í ágúst. Hvað um það.

Leið 2 gekk vel að halda sig innan tímaramma enda á leið um miðjan dag að sumarlagi. Vonandi nær tvisturinn að halda réttum takti í haust - en ekki hvað???

Eptir yndisrúnt með leið 2 var Gylforce-inn snar í snúningnum & snapaði sér ferðir með leiðum 15, 16 & vitaskuld leið leiðanna, leið 1.

Unaður, ekkert annað - þið ættuð bara að prófa!

Sumar leiðir verða ekki sumarleiðir ...

Núna munu gleðjast gumar
Gylforce-inn þó mest.
Sama tíðni er í sumar
með sænskri vagnalest!

Hinn grandvari & gaumgæfilegi dr. Gylforce hefir glaðst mjög undanfarna daga, hvar loksins, loksins hefir Strætó bs. ákveðið að hafa öngva sérstaka sumaráætlun. Maður lifandi!

Hinn fráleitt útlimagranni ofurbloggari hefir ávallt gramist skerðingar á tíðni & leiðum sem verið hafa á sumrin í hinu lostfagra leiðakerfi byggðasamlagins. Illu heilli!

Nú kveður hinsvegar við annan tón & er öngvin sjáanlegur munur á ferðum vagna á höfuðborgarsvæðinu yfir sumar- ellegar vetrartímann. Það er vel. 

Leiðir 1 & 6 halda áfram að tjútta um á tíu mínútna fresti á annatíma virka daga. Hipp-hipp-húrrey!!!

Aðrar leiðir halda aukinheldur sínu (veg)striki & nú bíður doksi kallinn bara í ofvæni eptir fleiri rafvögnum.

En ekki hvað???

Hermaurinn raddir heyrir ...

Líf, Dóra & Dagur
díla við baklandið.
Meirihluti of magur
máta þau Lóu við.

Hermaurinn raddir heyrir
hætta vill línu við. 
Fáviskan öngvu eirir
- aumt er frjálslyndið.

Hinn rammpólitíski & fráleitt villuráfandi dr. Gylforce rogaðist & rembdist á leið nú síðdegis, hvar hann hitti fyrir m.a. hinn rosafengna 191 rafvagn á leið 4. En ekki hvað???

Það olli hinum ofsafengna doktor hinsvegar töluverðum vonbrigðum að upplýsingataflan (eða skjárinn öllu heldur) virkaði enn ekki í rafvagninum. Allavega ekki í númer 191 sem að þessu sinni ók leið 4 eins & herforingi. Hvað um það.

Dr.-inn tók aukinheldur leið 18 frá Hlemmi þegar hann sá að um var að ræða annan af "nýju" Iveco vögnunum sem eru í láni frá Kynnisferðum. 

Dr. Gylforce lauk svá unaðslegum ferðum dagsins i leið 24 áleiðis að Mjódd okkar Breiðhyltinga & vonaðist til þess að nýr meirihluti í borginni - hver sem hann verður nú - haldi áfram að setja almenningssamgöngur á oddinn.

Amen.

Kippur eptir kosningar ...

Eptir kosningaaurinn
arkar doks´á leið.
Hauksdóttir & hermaurinn
hyggj´á vondan seið.

Hinn kjörþokkafulli & kjarkaði dr. Gylforce kom sér á leið eptir kosningarnar, hvar hann var þó heldur rólegur í tíðinni að þessu sinni.

Dr.-inn tók sér far frá Mjódd okkar Breiðhyltinga með leið 3 áleiðis að Hlemmi. Unaður var að telja vagnverjana í ferð þessari en setið var í hverju sæti aukinheldur sem nokkrir stóðu. Þristurinn virðist vel nýttur síðdegis um helgar.

Við Hlemmtorg sá Gylforce-inn glitta í hinn "nýja" 130 Crosswayvagn. Nú hefir það komið upp úr dúrnum að Strætó bs. hefir leigt 130 & 131 frá Kynnisferðum næstu tvö árin.

Það eru góðar fregnir því ekki er vanþörf á að endurnýja vagna byggðasamlagsins sem einn af öðrum virðast vera að týna tölunni.

Dr. Gylforce hélt svá með leið 11 frá Hlemmi & upp í Mjódd okkar Breiðhyltinga. 

Yfir&út!

Endurnýjun flotans ...

Flikkum nú upp á flotann
fáum nýja smíð. 
Í nágrenninu not´ann
í náinni framtíð.

Hinn nöturlegi & napri dr. Gylforce náði einum spánnýjum vagni frá byggðsamlaginu í kvöld, hvar 131 Crosswayvagninn var til taks við Hlemminn á leið 18.

Inn vildi dr.-inn!

Það er mikið fagnaðarefni að Strætó bs. sé ekki einungis að festa fjár í rafvögnunum frá Kína, heldur hyggst aukinheldur halda áfram að bæta við "venjulegum" vögnum.

Dr. Gylforce hefir rekið glyrnur sína í tvo glænýja slíka vagna, 130 & 131 - & máske eru þeir fleiri???

Tvistur í tjóni ...

Unaður er & andagift
ekkert bölv & ragn,
er eg hef löppum lyft
inní ljúfan strætisvagn.

Hinn dökkgræni & dulræni dr. Gylforce dreif sig á leið & langaði doksa kallinum að dangla með leið 2 frá Mjóddinni inn í Voginn fagra. Nema hvað.

Dr.-inn átti stefnumót við tvistinn kl. 18:02 við Mjódd okkar Breiðhyltinga. Það reyndust mikil vonbrigði er vagninn silaðist að endastöðinni um kl. 18:11, heilum níu mínútum of seinn. Maður lifandi!

Aukinheldur stoppaði leið 2 þar sem leið 24 nemur ætíð staðar & rauk svo af stað án þess að fara nokkur tíma í sitt rétta stæði. Stórfurðulegt en hvað um það.

Nýr vagn leit dagsins ljós á leið 2, 131 Iveco Crossway. Doksi kallinn var eigi í för með honum því hann ók í gagnstæða átt. 

Dr.-inn þarf að gera honum betur skil síðar. Aukinheldur hlakkar doksa til þegar tímatafla leiðar 2 verður lagfærð en það gerist á næstu dögum þegar sumartíðnin fer í gang.

Það er löngu tímabært enda tvisturinn búinn að vera í tómu tjóni frá áramótum.

Yfir&út!

Meira metan ...

Nú er von á nýjum
nyrðra, það ég las.
Ættaður frá Svíum
- eðal metangas.

Gleðifregnir berast Gylforce-num hvar annar metanvagn frá Scania er væntanlegur norður til Akureyrar innan skamms.  Áfram halda því Norðlendingar að endurnýja flotann sinn sem var orðið löngu tímabært & í raun bráðnauðsynlegt.

Síðla sumars telst dr.-num til að 25 nýir vagnar komi til með að hafa litið dagsins ljós á þessu herrans ári.

Verktakinn inn við sundin tók í notkun 10 Iveco vagna í marsmánuði, byggðasamlagið verður með 14 rafvagna á vígvöllum veganna næsta haust & svá bætist þessi sænski eðall við nyrðra. 

Þetta eru sannkölluð gleðitíðindi því bæði vagnverjar & umhverfið eiga skilið nýrri & betri vagna.

Það er snjallt að vera í rafvögnum ...

Hoppaðu inn & hleddu
hér er bara fjör.
Kolsýringinn kveddu
komdu með í för!

Hinn hvítsunnaði & hvefsni dr. Gylforce hjó eptir skemmtilegri nýjung fyrir okkur vagnverjana í rafvögnunum úr Austri.

Það er nefninlega hægt að hlaða snjalltækin sín á ferð. Nokkur USB-tengi eru í rafvagninum & því hægt að hlaða meðan maður er í vagninum rómaða.

Dr.-inn á reyndar eptir að testa tengin en gerir ráð fyrir því að þetta virki - en ekki hvað???

Annars má búast við því að öngvin rafvagnanna fjögurra verði á leið í dag eða á morgun meðan ekið er eptir sunnudagsáætlun.

Amen.


Epsta mynd: ruv.is

Síðla sumars ...

Um sumarið seint
sjáum meira raf.
Hagkvæmt er & hreint 
hefst nú nýtt upphaf.


Fleiri rafvagnar síðla sumars

Þá er það ljóst að rafvagnarnir, sem keyptir hafa verið frá Kína & enn á eptir að afhenda, munu koma til landsins í sumar. Gera má ráð fyrir að vagnarnir 14 verði allir komnir á fulla ferð á vígvöllum veganna í haustbyrjun. Það er fagnaðarefni.

Samkvæmt fréttinni hefir gengið vel að aðlaga fyrstu fjóra vagnana sem þó eru aðeins notaðir brot úr degi fyrst um sinn.

Dr. Gylforce hefir einungis tvisvar orðið þess heiðurs aðnjótandi að líða um leiðakerfið í þessum hljóðlátu og lágstemmdu vögnum úr austri.

Vonandi verða ferðirnar fleiri fljótlega.


Mynd: mbl.is

Tveggja vagna sakn ...

Vagnar týndir tveir
er tóku fyrstu leið.
Þoldu þeir ei meir,
þrautpíndir um skeið?

Það er ekki laust við dr. Gylforce sakni tveggja sænskættaðra vagna er jafnan tóku slaginn á leið leiðanna, leið 1.

Illu heilli fækkar fákum frá Svíaríki á vígvöllum veganna en það vekur furðu að þessir tveir séu farnir að hvíla drif & dekk.

Báðir hafa þeir verið í notkun í aðeins nokkur ár & voru keyptir notaðir ef doksa misminnir ekki. 

Hvað sem því líður vonar dr.-inn svo innilega að hann komist í þessa löngu 3ja hásinga vagna innan tíðar.

Amen.