Rafvögnuð upplifun ...

Rafvögnuð upplifun
reynist vera án
upplýsingamiðlun-
ar, sem er ólán.

Hinn tormelti & treggáfaði dr. Gylforce tókst loksins að finna hinu nýju kínversku rafvagna á vígvöllum veganna. Hibb-hibb-húrrey!

Dr. Gylforce sá hina rafvögnuðu upplifun á leiðum 2 & 4, líkt & í gær, & einhenti sér í tvistinn við Mjódd okkar Breiðhyltinga. En ekki hvað???

Það var unaður að finna þegar vagninn lagði af stað. Hljóð- & áreynslulaust leið sá alguli úr austri um sel okkar Breiðhyltinga, ók svo upp í efri byggðir Kópavox & niður að Smáralindinni. Magnað!

Það eina sem vantar nú upp á - a.m.k. í 194 rafvagninum - er upplýsingataflan & hin íðilfagra rödd Herdísar Grýlu - næsta stopp er ...

Það er skrýtið að taflan sé ekki enn komin upp en vonandi kippir Strætó bs. því í liðinn í snarhasti.

Flens er ekkert glens ...

Fátt um ferðir í gær
flensan það jú skóp.
Ég var að verða ær
vagnar eru mitt dóp.

Hinn rjátlu- & ræksnislegi dr. Gylforce rölti í vagnana í dag & sveif um á skýi bleiku eptir sjö vagna sælu. En ekki hvað???

Gærdagurinn var ekki jafn fengsæll. Maður lifandi. Flensan tók hús á doksa kallinum sem hélt honum frá villtum vegum, vögnum & vagnverjum. Nema hvað.

Mánudagurinn var fráleitt til mæðu & hófst í leið 4 sem er orðinn hálfgerður leiksveinn doksa. Í kjölfarið kom einn sænskættaður á leið leiðanna, leið 1, þá unaðurinn um IKEA í hinni 21. leið & að lúkningu arkaði dr.-inn inn í leið 11 & hélt í heimsókn á Borgarspítalann. Hvað um það.

Dr. Gylforce sá glitta í rafvagnana á leiðum 2 & 4 en náði þeim ekki. Því miður. Rafvögnuð upplifun þeirra var í tvígang á tvistinum & einn sást á fjarkanum hér við Stútulautarselið.

Vonandi ber betur í veiði á morgun hvað rafmagnið varðar.



Amen. 

Vagnavafr ...

Út í skýlið skrapp
skondraðist á leið.
Út um hvipp & hvapp
hvergi lengi beið.

Hinn víðförli & veraldavani dr. Gylforce vafraði ótt & títt í vini vora - vagnana - þennan annars heita & ljúfa laugardag.

Það reyndist skemmtilegt að dr. Gylforce komst í kynni við vagna Strætó bs, Hópbíla & Kynnisferðir að þessu sinni. 

Vitaskuld ætti það ekki skipta neinu máli en ennþá er örlítill blæbrigðamunur á verktökum og sjálfu byggðasamlaginu.

Dr.-inn arkaði inn í ellefuna í tvígang; leist nú lítt á blikuna í ferð sinni frá Mjódd sem eini vagnverjinn. Það breyttist ört á Bústaðaveginum & fljótt var orðið messufært í vagninum.

Aukinheldur tók dr. Gylforce sér far með leið 28 tvisvar sinnum; létt verk & löðurmannlegt er fyrir doksa kallinn að rölta úr selum yfir í sali þeirra Kópvæginga & hitta þar hina 28. leið. Nema hvað.

Kynnisferðir virðast hafa ákveðið að nota nýjustu vagnana á leiðum 12, 15 & 28. Það er vel til fundið.

Að lúkningu hélt dr. Gylforce hnarreistur í þristinn sinn frá Mjódd okkar Breiðhyltinga eins & lög gera ráð fyrir & hélt spenntur heim til að ná einhverju af sönglagakeppninni á Rúv.

En ekki hvað???

Reynt við rafvagna ...

Hinn skipulegi & skorinorti dr. Gylforce skaut sér skjótt í vini vora - vagnana - úr Fannborginni þegar hann gat. Nema hvað.

Dr. Gylforce hapði aukinheldur haldið með leið 4 úr laut & seli snemmindis. Dr.-inn tók aptur fjarkann síðdegis, sama vagn & vachti það gjörhygli Gylforce-ins að sama vagnstýran var í báðum ferðunum. Löng vakt það. Hvað um það.

Dr.-inn reyndi að finna hina kínversku rafvagna & rakst á þá á leið leiðanna, leið 1, & leið 6. Illu heilli náði doksi kallinn ekki að sitja með þeim að þessu sinni en það gengur bara betur næst. En ekki hvað???

Þess í stað hóaði dr. Gylforce í leið 13 & brunaði með honum að Borgarspítala & muldraði um leið hið fornkveðna:

Hittast rafvagnar
á reinum okkar,
innblástur í umferð,
yndi algult;
afl & fengu,
úr Austurvegi;
drif skópu
& dekk gerðu.

Kominn á kreik ...

Hinn (borgar)línulegi & lostafulli dr. Gylforce lagði leið sína í vagnana - vini vora - & freistaðist til þess að fara á fjörurnar við hina spánnýju & spennandi rafvagna úr austri. Nema hvað!

Illu heilli varð dr.-num ekki að ósk sinni. Öngva rafvagna sá hann í ferðum sínum en frétti af einum á leið 2. Hvað um það.

Dr. Gylforce sté stoltur & stæltur inn í 177 Crossway vagninn á leið 4 hér við laut & sel. Vagninn sá er ekki lengur hvítur að lit, heldur farinn að feta hinn gula meðalveg. En ekki hvað???

Dr. Gylforce gerði sér aukinheldur far með leið 3 & fékk þar raðvagnana 151-153 & hélt með þeim ásamt urmul vagnverja frá Hlemmi - í gegnum Sæbraut að þessu sinni - áleiðis í Mjódd okkar Breiðhyltinga.

Amen.

Ég er kominn á kreik á ný
kem mér fljótt á vettvang.
Í þristinum með þrumugný
- þeytist minn vanagang.

Rafvagnslaust???

Dr. Gylforce hélt rakleitt á vit vagna eptir veru sína í mennta- & menningarsetrinu við Fannborg, hvar ætlun Gylforce-ins var að komast aptur í rafvagnana - en ekki hvað???

Dr. Gylforce hélt í Hamraborg þeirra Kópvæginga, Mjódd okkar Breiðhyltinga, jafnvel Hlemm þeirra Miðbæinga, en öngvir voru rafvagnarnir :(

Jamm & já; unaðurinn úr austri var hvergi sjáanlegur & varð dr.-inn að gera sér að góðu leiðir 3 & 12 með ágætis Iveco Crossway vögnum. 

Á morgun, verkalýðsdaginn, verður ekið samkvæmt sunnudagsáætlun & harla ólíklegt að rafvagnarnir verði þá á ferli.

En hvur veit???



Eptir dagsins ról & rokk
rölti ég með skeggmagn.
Svipaðist um en svo kom sjokk
 - sá öngvan rafvagn!

Setið að sumbli ...

Að sumbli doksi sat
svaka gott geim.
Með vín og veislumat
vagninn tók heim.

Dr. Gylforce skellti sér óvænt í soll miðbæjarins í gærkvöldi, hvar hann gjörðist bæði vin- & vínhneigður & hélt vitaskuld á vit vagna. Nema hvað.

Dr.-inn sá öngva rafvagna á vígvellum veganna sem kemur ekki á óvart því enn vantar hleðslusöðvar fyrir þá svo þeir geti keyrt allan daginn. Hvað um það.

Gylforce-inn hapði hug á að prófa loksins næturvagnana en þraut öreindið vel slompaður eptir að hafa kneyfað ölið bæði af unun & áfergju.

Rétt fyrir miðnættið fékk dr.-inn sér til fulltingis leiðir 1, 4 & 3 & hélt heim á leið í lautarselið sitt.

Yfir&út!

Rafmagn á rafvagn ...

Unaður kominn í umferð
ógleymanleg stund.
Tímamótin eru talsverð
með tærri lofttegund.

Þegar dr. Gylforce frétti að von væri á rafvögnunum á vígvelli veganna í dag aflýsti hann öllu; kennslu, samstarfsfundum, skráningum, námsmati, prófaundirbúningi, yfirferð verkefna, foreldrafundi. Öllu. 

Allt var sett á hold því inn í rafvagna vildi dr.-inn. 
Einn af fjórum rafvögnunum sem komnir eru, var brúkaður í dag á leið 3 er hún breyttist úr 30 mínútna tíðni yfir í 15 mínúturnar sem gerist jú á annatíma milli kl. 14 & 18 á virkum dögum. Nema hvað. 

Dr. Gylforce stóð teinréttur & titrandi (raf)spenntur við Hlemmtorgið þegar rafvagninn rann í hlað.

Doksi kallinn settist niður & skyndilega fór vagninn af stað; án nokkurs hljóðs eða rykks leið rafvagninn þýðlega af stað niður Hverfisgötuna. Þvílík nautn!

Þó hjó doktorinn eptir því að að sætin eru of hörð, a.m.k. fyrir hið gamla hró doksa. Þá var upplýsingataflan inn í vagninum ekki tilbúin aukinheldur sem hin íðilfagra strætórödd Herdísar grýlu skorti fráleitt diskantinn í þennan unað úr austri & skar vel í eyrun. Þetta þarf að laga. Hvað um það.

Dr.-inn endasentist með leið 3 að Mjódd okkar Breiðhyltinga & hlakkar mjög til næstu ferða sem verða án efa rafvagnaðar upplifanir - en ekki hvað???

Þökk á skjön!

Strýk ég vagnsins drif & dekk
& dreymir þeirra plön.
Á leiðum sit ég með minn sekk
& segi; þökk á skjön!

Hinn dálaglegi & daglegi dr. Gylforce dreif sig á vit vagna í rigningarsudda dagsins, hvar hann hitti fyrir nokkrar leiðir, urmul vagnverja & fáeinar tegundir af ágætis vögnum. Nema hvað.

Í barnæsku þegar Gylforce-inn fór vagnaferðir sínar með föður sínum átti sá eldri það til að þakka fyrir sig með all sérstöku orðatiltæki: Þökk á skjön!

Illu heilli veit dr.-inn ekkert um þessi fleygu orð, þ.e. hvorki hvaðan þetta orðatiltæki sé komið né hvur sé sagan á bak við það. Því miður.

En eptir unaðsstundir í leiðum 1, 2, 3, 11 & 21 í dag kemur eitt - já aðeins eitt - upp í hugann:

Vagnar, vinir minir - þökk á skjön!

Geyst um gettóið ...

Gylforce-inn við gettóið
geysist um malbikið.
Stefnir á strætó tattúið
- stórt & mikið!

Hinn kvartsári & kveifarlegi dr. Gylforce hefir keyrt með vinum vorum - vögnunum - út & suður þessa dýrlegu helgi, hvar hann hefir reyndar haldið sig nánast við gettóið báða dagana. Nema hvað.

Dr. Gylforce hefir farið á fjörurnar við leiðir 3 & 4 hér við Stútulautarselið. Hið lostfagra leiðakerfi vagnanna er minnst spennandi á sunnudögum, hvar 30 mínútna tíðnin tröllríður öllu aukinheldur sem vagnakosturinn er yfirleitt Iveco & Irisbus. Hvað um það.

Hinir sænskættuðu vagnar sáust ekki, því síður þýska stálið & hinir rafmögnuðu kínversku kaggar eru ekki enn komnir á vígvelli veganna.

Dr.-inn bíður þó spenntur eptir rafvögnunum en von er á þeim um mánaðarmótin.