Meistaraverk -urinn ...

Komust femínistar á flug
með forljótum strætó.
Unnu hjörtu bæði & hug
hjá verjunum - & þó!

Karltetrið dr. Gylforce hefir kappkostað & reynt eptir bestu getu að taka jákvætt í vagninn sem bar sigurorð í hinni þrælskemmtilegu keppni sem bar heitið Meistaraverk hjá byggðasamlaginu Strætó.

Áður en lengra er haldið vill doksi kallinn þakka markaðsdeild byggðasamlagsins fyrir þetta frábæra framtak. Meira svona!

Það er greinilegt á öllu að þeir sem stýra markaðs- & ímyndarmálum Strætós kunna sitt fag. Vonandi verður þessi keppni til frambúðar & vill dr.-inn hvetja markaðsmennina til þess að taka "Eurovisionfyrirkomulag" á þetta á næsta ári, þ.e. að hafa kosningu en líka dómnefnd svo smölunin sé ekki aðalmálið eins & raunin varð að þessu sinni. Hvað um það.

Þegar dr. Gylforce sá vinningsvagninn í fyrsta sinn meðan á keppninni stóð, las hann skammstöfunina KÞBAVD sem KÞBRAUÐ; fannst skrýtið að ekki skyldi vera bil á milli Þ og B & hélt hreinlega að þetta væri eitthvert bakarí, KÞ BRAUÐ. Til að sannfæra doksa ennfrekar um þetta sá hann myndirnar fyrir sér sem kleinuhringi! Dr.-num fannst vagninn hinsvegar ljótur - & það hefir ekkert breyst, því miður.

En feminístar, til lukku með sigurinn, það verður allra athyglivert að taka 180 Iveco vagninn með alla þessa frasa á sér.

Yfir&út!

Meistaraverkurinn

Kann að meta met´ann ...

Snemmindis í gær, er sólin ei rýður, varð dr. Gylforce var við vagninn bláa í borginni; dreissugur með dekk sin & drif, bláa toppinn tindrandi, stóra glugga geislandi; tignarlegur & gljáandi. Maður lifandi! 

Vagninn var á leið 3 sem var einkar hagstætt fyrir dr.-inn. Hér er á ferð bláleitur Iveco metanvagn sem byggðasamlagið hefir til reynslu & er afar spennandi að sjá.

Það væri gaman að hafa gömlu stofnleiðirnar leiðir 1-6, með öðrum lit en hinar & hví þá ekki þessum??? Hvað um það.

Illu heilli komst dr.-inn ekki um borð í þennan vagn að þessu sinni en mun vitaskuld einhenda sér í metanið um leið & hann sér hann á leið - en ekki hvað???

Blíðlátt í blíðu ...

Í blíðunni var blíðlátt
blikar sól í gili.
Ljóðagáttin lokast brátt
lýkur hér í bili.

Hinn löðurmannlegi en þó ávallt ljúfi dr. Gylforce lét ekki segja sér það tvisvar að halda á vit vagna í glaðasólskininu. Ó, nei. Að þessu sinni komst doksi kallinn í kynni við tvær eðalleiðir sem hann fer alltof sjaldan í, alltof sjaldan. Nema hvað.

Dr.-inn sýndi sín kunnuglegu spil í vagnavali frá selarlauti sínu, hvar hann fór í Mjódd okkar Breiðhyltinga.

Doksi kallinn vildi til Hlíða í mikilvægum erindagjörðum. Vitaskuld er borðleggjandi að taka leið 3 - sem & doksi gerði - & halda með henni beina leið að Stakkahlíðinni. En ekki hvað???

Á leiðinni hittum við fyrir hinn sænskættaða - en síþreytta - sextán ára gamla 102 Omnilink vagn á leið 6. Hann hapði staðnæmst á forgangsrein vagnanna & tók vagnstjórinn vagnverjana úr sexunni upp í enda báðar leiðir á sömu leið.

Frá Hlíðunum hóaði dr. Gylforce í leið 55. Já, vagnverjar, dr.-inn einhenti sér í blágula vagninn í miðri borginni. Þvílíkur eðall!

Dr. Gylforce hélt með dásemdinni að Ásgarði þeirra Garðbæinga. Langt er síðan hann hefir spígsporað um þær koppagrundir. Maður lifandi!

Dr. Gylforce sá glitta í leið 24 við Ásgarð & þá var þetta ekki spurning. Málið dautt!

Tímaáætlun leiðar 24 er tæp frá Ásgarði að Mjódd okkar Breiðhyltinga. Vonandi er hún í endurskoðun en ætla má að töluverðar breytingar verði á leiðakerfinu í lok ágúst, auk fjögurra nýrra rafmagnsvagna sem líklega verða allir settir á leið 4 til að byrja með :)   

Meira síðar.

Gullið mitt ...

Gersemin sjálf, gullvagninn, var á dögunum á leið 4.

& Gylforce-inn kvað - nema hvað!

Ég sá gulldreginn ólman renna
upp með einum Breiðholtsbing,
fjör sást á mínu brjósti brenna
brunaði með vagni hring,
eldfrár geystist – eilíft fagn,
unaðslegur gullinvagn.

Varastu vífin vagnverji ...

Settist í hina seytjándu leið
voru þar Söguaðdáendur.
Leið þessi ávallt góð & greið
& Gylforce-inn kenndur.

Hinn vífni & vígalegi Gylforce var ekki lengi að halda á vit vagna, hvar hann hitti fyrir að þessu sinni leið 17 í Mjódd okkar Breiðhyltinga. Nema hvað.

Hin seytjánda leið ekur sex daga vikunnar með 30 mínútna tíðni. Færi hún hvíld á sjálfum hvíldardeginum - illu heilli.

Það væri gaman ef leiðin yrði með 15 mínútna tíðni líkt & flestar leiðir til að ríma betur við aðra vagna í Mjóddinni. Hvað um það.

Stoltur laut stútum frá
í strætó eigi fúna.
Er vagni einum hjá
- illa edrú núna.

Það gladdi hið gamla hró Gylforce-ins hvar tveir fullorðnir vagnverjar töluðu um útvarp Sögu & dagskrá hennar alla leið frá Breiðholtinu að Hlemmtorginu; greinilega vel með á nótunum - kannski fastir innhringjendur???

Dr. Gylforce hellti í sig nokkrum hanastélum við Square-ið á Hlemminum, hvar tími var til kominn að halda áleiðis í Stútulautarselið. Að þessu sinni naut doksi kallinn liðsinnis leiðar 4 alla leið í fegurstu laut jarðarkringlunnar.

Amen.

 

Fullkomin fullnæging ...

Hinn vagnblessaði & vagnaði dr. Gylforce hefir verið líkt & eilífur augnakarl meðal vina vorra - vagnanna - hvar doksi kallinn er kominn í langþráð leyfi. Maður lifandi.

Það var unaður að ferðast með leið 4 frá Mjódd um miðjan dag, hvar vagnstjórinn ruglaðist í ríminu & hélt að hann væri að aka leið 3.

Það varð upp fótur & fit i vagninum; vagnverjar tveir í eldri kantinum öskruðu upp: "Þetta er leið 4 - hvert ertu að fara maður!?!"

Dr.-inn hefir alltaf lúmskt gaman af því þegar vagnstjórar keyra einhverja vitleysu, sérstaklega þegar doksi kallinn er ekki á neinni hraðferð.

Vagnstjórinn leysti farsællega úr fokki sínu, beygði inn hjá Indjánatjaldinu í Mjóddinni, snéri þar snarlega við & hélt í rétta átt, heldri vagnverjum til mikillar gleði. Nema hvað.

Fullkomin fullnæging
fyrir vagnverja.
Fyrirmyndar friðþæging
fyrir samherja.

Gagnslaus er vagnslaus dagur ...

Hinn skjótráði & skörungslegi dr. Gylforce skáskaut sér milli vagna um helgina enda segir hið fornkveðna að gagnslaus sé dagur sá sem vagnslaus er. Nema hvað.

Dr.-inn lék kunnugleg stef úr lautarseli sínu, hvar leiðir 3 & 4 koma upp í kollinn aukinheldur sem auðvelt er að arka í leið 28 hjá Kópvægingum í Salahverfi. En ekki hvað???

Sumarylur er kominn í kropp doksa & frí framundan hjá kallinum. Maður lifandi. Vitaskuld hyggst hann verða ansi gjarn á leiðir næstu daga enda leiðigjarn með afbrigðum. Hvað um það.

Ég í sól & sumaryl
sefa mína strengi.
Ávallt svo með verjum vil
viðdvöl hafa lengi.

Leið? Rétt! ...

Ávallt vil veið´ana
sí & æ seið´ana
- leið leiðanna.

Hinn dagsfarsprúði & dægilegi doktor Gylforce dreif sig af stað þennan annars ágæta júnídag & hélt á vit vagna. Nema hvað.

Dr.-inn hugsaði sig lengi um hvert skyldi stefna & hvurt skyldi fara. Þegar hann sá þrjá sænskættaða Scania vagna & tvo Volvovagna á leið 1 - leið leiðanna - var hann ekki lengi að komast að niðurstöðu; inn vildi dr.-inn.

Annars heyrast ánægjulegar raddir úr ranni almenningssamgangna þess efnis að næsta sumar verði reynt að skerða akstur sem minnst á flestum leiðum. Það er vel. Það er mjög vel.

Aukinheldur er það fagnaðarefni að leið 1 - leið leiðanna - hefir sömu tíðni í sumar & hún hapði í vetur; 10 mínútur á annatíma. Maður lifandi!

Það er ljúft að hafa slíka tíðni & þá finnur maður hve mikilvægt það er að sem flestar leiðir verði eknar með þessari tíðni. Hvað um það.

Dr. Gylforce gerði sér far með leið leiðanna að Firði með hinum sænskættaða 112 Omnilink vagni & hrósaði happi miklu hvar hann fékk 117 Omnilink til baka sunnan úr Firði.

Þetta var ferð sem segir sex - & það á leið 1.

Yfir&út!

Griðastaður Gylforce-ins ...

Í vagninum ég friðinn finn
fer með honum víða.
Út & suður, fram & inn
unz ég hryn vel í´ða.

Hinn gripsviti & grjótharði dr. Gylforce gekk út í sumarsólstöður á þessum bjarta & fagra degi, hvar hann hapði eigi tekið vini sína - vagnana - um hríð. Hvað er eiginlega að gerast með hinn síkáta Selbúa??? Hví fer hann eigi í vagnana??? Maður lifandi!

Dr. Gylforce tók hús á leið 4 við Selin, hvar sá hreyfði dekk sín & drif með djörfung alla leið að Mjódd okkar Breiðhyltinga. Kvað þar svá við tón annan. Nema hvað.

Dr. Gylforce arkaði inn í ellefuna & sat í hinum sjö ára gamla Irisbusvagni að Hlemmtorgi. Gylforce hinn gaumgæfilegi sat sterkur að afli meðal fárra vagnverja að þessu sinni, en ávallt þó fríður sýnum, fráleitt hærður manna bezt en þó eygður vel með eldhnattarbrillum. En ekki hvað???

Gylforce muldraði í sífellu hálfum hljóðum: Gef mér grið, guli vagn. Gef mér grið, guli vagn. 

Eptir blíðláta bænastund í fjarkanum á heimleið einhenti dr. Gylforce sér í hollenska VDL-vagninn á leið 28, fann friðinn & ferðaðist með honum að fegurstu laut jarðarkringlunnar, Stútulautarselinu.

Amen.

Kaos við Costco ...

Það var kaos við Costco
kostaði vagnatöf.
Æðibunugangur altsvo
því allt þarna er gjöf!

Hinn knái & kviki dr. Gylforce kom sér á leið í blíðu gærdagsins, hvar hún er nefnilega sú eina sem ekur um hið geysivinsæla Kauptún. Það er sumsé leið 21. Nema hvað.

Dr. Gylforce sté inn í tæplega eins árs gamlan Ivecovagninn á leið 21 við Mjódd okkar Breiðhyltinga. Fáir vagnverjar voru um borð í fyrstu en óðara tíndust þeir inn í leið þessa. Vagninn silaðist í gegnum Kauptúnið & við stoppistöðina við Costco-ið tæmdist hann. Doksi einn eptir. Takk fyrir túkall!

Þá tóku aptur við tafir að komast út úr túninu. 

Samkvæmt öruggum heimildum mun leið 21 taka stakkaskiptum í haust. Akstursleiðinni verður töluvert breytt & tíðnin aukin. Það mun koma sér vel fyrir "costcóska" vagnverja & segir dr.-inn bara eitt við þá: Megi kaupmátturinn vera með ykkur!

Dr. Gylforce einhenti sér í leið leiðanna, leið 1, við Fjörðinn & tók að lúkningu fjarkann í Hamraborginni háu & fögru, áleiðis upp í Stútulautarselið sitt.

Yfir&út!