Borgar línan sig ...???

Borgarlína nú boðuð er 
bílstjórinn verður lúði.
Á ljósvakamiðli línan fer
að loga hjá Pés´& Þrúði.

Hinn forsjálni & framsýni dr. Gylforce hefir líkt & feitt fólk fylgst grannt með fréttum af kynningarfundi um Borgarlínuna. Nema hvað.

Loksins er línan kynnt almennilega fyrir almenningi. Fram kom hjá verkefnastjóra línunnar að verkefnið er fyrst & fremst ætlað að skapa svæði fyrir línuna. Að öllum líkindum verður þetta einhvers konar strætisvagnakerfi - opt nefnt hraðvagnakerfi - með tíðni sem við höfum ekki séð áður hér á landi á. Síðan munu hinir hepðbundnu vagnar í hinu lostfagra leiðakerfi styðja við & aka út frá Borgarlínunni.

Umræðan undanfarnar vikur hefir einkennst af vanþekkingu á verkefninu & fráleitt af vagnþekkingu.

Tveir einþykkir eigendur ljósvakamiðils í borginni hamra t.a.m. statt & stöðugt á því að þetta sé lestarkerfi sem muni kosta um 120-150 milljarða króna. Sú upphæð hefir aldrei verið nefnd þótt vissulega séu margir óvissuþættir við fjárhagsáætlun á verkefni sem þessu.

Stefnt er að því að hefja framkvæmdir við fyrsta hluta línunna eftir tvö ár :)

Dr.-inn bíður spenntur - maður lifandi!

Fokkað í fimmu ...

Í fimmunni ég fokkaði
ásamt fitukeppum.
Í hugarfylgsnum flokkaði
fávita á jeppum.

Hinn pasturslitli & pakksaddi dr. Gylforce panikkaði fráleitt á dögunum, hvar hann dreif sig á vit vagna & dratthalaðist aptur í leið 5, fimmuna. Maður lifandi.

Doktor Gylforce tók hús á fimmunni við Nauthólinn & hélt með honum að Hlemmtorgi okkar Reykvíkinga. Leið 5 virðist ávallt vera í humátt við leið 15 aukinheldur sem þær aka nánast í halarófu frá Gömlu-Hringbraut að Ártúni. 

Báðar aka eystur Suðurlandsbraut frá Hlemmi en sú fimmtánda beygir inn Grensás meðan fimman fer hjá Mörkinni í átt sinni að Ártúnsholti. Nema hvað.

Leið 5 & 15 eru á hálftímatíðni i sumar en miðað við ágætisviðtal við stjórnarformann Strætó á rás 1 á dögunum, er sumaráætlun barns síns tíma. Ekki var annað að skilja á henni en að næsta sumar verði enn fleiri leiðir með réttri tíðni.

Þetta eru ánægjuleg tíðindi fyrir oss vagnverja.  

Rauðka á reinum ...

Í síðdeginu reynist sein
sú leið er ég vil fá.
Á reinunum er rauðka ein
- rusl frá Ess-bé-ká!

Hinn eldhúsdagsfarsprúði & indæli dr. Gylforce iðaði í skinni sínu síðdegis, hvar hann fór sinn hepðbundna rúnt frá Stútulautarseli sínu áleiðis að miðbæ okkar Reykvíkinga. 

Dr. Gylforce sat í þægilegum 12 ára gömlum Irisbus Karosa á leið 4 þegar hann rak í rogastans við Suðurver. Þá skeiðaði leið 55 fram úr fjarkanum & var hann rauður á lit!!!

Strætisvagnar á höfuðborgarsvæðinu bera tvo liti; gulir/appelsínugulir & blágulir. Öngvir vagnar eru rauðir. Punktur.

Þetta langlundargerð í garð verktaka er óþolandi af hálfu Strætó bs. Í samningum við þá, sem vilja taka þátt í almenningssamgöngum, skal kveða skýrt á um að hafa vagnana í réttum litum. Skárra væri það nú! 

Vonandi er verktakinn í suðri, SBK, beittur dagssektum fyrir þennan rauða vagn.

Sumar leiðir verða sumarleiðir ...

Hinn söggugi & sumarlegi dr. Gylforce veit að frá & með sunnudegi þessum hefst sumaráætlun byggðasamlagsins. Það þýðir þónokkrar breytingar á nokkrum leiðum.
 
Jákvæðu fréttirnar í áætlun þessari er að leið 1 heldur 10 mínútna tíðninni á annatíma; leiðir 3, 4, 6 & 12 verða aukinheldur á kortersfresti. 

Það sem hryggir hró dr.´s er að leiðir 2, 5, 11, 13, 14, 15, 18, 24, 28 & 35 verða á hálftíma fresti. Þetta er nokkuð mikil skerðing en svipuð því sem var í fyrra, illu heilli.

Vonandi verður framtíðin sú að ekki þurfi að hafa sérstaka vetrar- & sumaráætlunir hjá vinum vorum, vögnunum.

Með tilkomu aukinna ferðamanna & metnaðarfullu markmiði um að 12% allra ferða á höfuðborgarsvæðinu verði með strætó, má gera ráð fyrir því að slíkar breytingar verði óþarfar. 

Dr.-inn elur þá von í brjósti að þetta komi til með að breytast á næstu fimm árum & þá hætti sumar leiðir að vera sumarleiðir.

Leifsstöð-Laugavegur ...

Á Suðurnesin brunum brátt
eptir brautarteinum.
Tökum´enni með sæmd & sátt
með sínum línum beinum.
 
Hinn tekníski & teinrétti dr. Gylforce lagði ótt & títt við hlustir á Morgunvakt Rásar 1 í morgun, hvar rætt var um fyrirhugaða Fluglest frá Keflavík til Reykjavíkur.

Verkefnið er afar spennandi, ekki síst fyrir þær sakir að fjármögnun mun nánast alfarið vera í höndum einkaaðila en vitaskuld er verkefnið unnið náið með SSH, Samtökum sveitarfélaga á höfuðborgarsvæðinu. Nema hvað.

Það verður aukinheldur mikilvægt að láta Fluglestina ríma vel við fyrirhugaða Borgarlínu. Þess vegna er ekki alveg ljóst á þessari stundu hvar Fluglestin mun hafa endastöð sína í Reykjavík. Hinsvegar er skýrt að ferðatíminn milli Leifsstöðvar & Reykjavíkur verður um 18-20 mínútur og verðið fyrir stakan miða um 5000 kr. á núverandi verðlagi. Það er um tvöfalt dýrara en Flugrútan en hafa verður í huga að lestin verður miklu fljótari í förum. Hvað um það.

Ef áætlanir ganga upp verður Fluglestin komin á skrið eftir um 8-10 ár & mun marka mikilvæg spor fyrir okkur inn í framtíðina - en ekki hvað???

lest fyrir gest - og líka okkur!


Myndir: vf.is og mbl.is

Á vappi um Vöð ...

Doksi vappaði um Vöðin
vesæl líkt& Kórea.
Meðan var rosaleg röðin
rétt hjá Ikea.

Hinn fráleitt gljálausi & gufulegi dr. Gylforce gerði sér góðan dag, hvar hann rannsakaði dekk & drif leiðar 5 í gær. Maður lifandi. Langt var um liðið síðan doksi kallinn fór síðast á fjörurnar við leið þessa. Nema hvað.

Dr. Gylforce kastaði tólfunum frá Mjódd okkar Breiðhyltinga. Hann endaði unaðsrúnt með leið 12 við Hlemmtorgið & einhenti sér inn í leið 5 áleiðis að Norðlingaholti. 

Norðlingaholt er hluti af Árbænum; hringlaga hverfi sem í fljótu bragði virðist vel heppnað. Leið 5 er eina leiðin sem gengur um hverfið & býður byggðasamlagið Strætó þar upp á 6 vagna með korterstíðni á annatíma. Ekki slæmt.

Leið 16 ekur aukinheldur um Árbæinn en fer að Moggahöllinni við Hádegismóa en ekki lengra í eysturátt. Hvað um það.

Doksi kallinn sté út úr leið 5 við Olís Norðlingaholti, spásseraði um hverfið & hapði hug á að kynnast norðlingzkum vagnverjum. Ekki var feitan gölt að flá í þeim efnum & hverfið raunar allt heldur doðrað & dofið. Var þá lítið annað að gjöra en að hóa á nýjan leik í fimmuna & halda brott úr hverfi þessu.

Mesta ánægjuefnið við kynni doksa af Norðlingaholti, var þegar sænskættaður Scania vagn kom á leið 5. Hipp-hipp-húrrey!

Doksi kallinn gekk hnarreistur til inngöngu í 107 Omnilink vagninn, hlammaði sér í rauðklæddu sætin & hlakkaði til að hverfa úr hverfi þessu.

Aaaaaa - minn sænskættaði vagn - hér er sko gott að vera!

Blágula bjútíið ...

Doksi bísperrtur í blágulum
í Borgarnesi áði.
Stoltur í ferðum ei stopulum
strax tilbaka hann þráði.

Hinn derringslegi & drambláti dr. Gylforce dró seiminn & var dragmáll mjög þrátt fyrir að komast í unaðsrúnt meðal vina vorra - vagnanna. & var sá rúntur ekki af verri endanum - maður lifandi!

Dr. Gylforce gerði sér far með einum blágulum frá Mjódd okkar Breiðhyltinga að Borgarbyggðinni.

Í sumar mun byggðasamlagið bjóða upp á sjö ferðir virka daga frá Borgarnesi að höfuðborginni; tvær á morgnana & fimm síðdegis- & kvöldferðir.

Það verður unaður að notast við vagna þessa þegar sól er hæst á lopti.

Yfir&út!

Höfuðborgarbúar að heltast úr lestinni...???

Léttar lestir & vagninn snar
líða brátt um engi.
Virtir menn gjörast vagnverjar
vonandi tór´ég svo lengi!

Hinn ókomni & óorðni dr. Gylforce var agndofa, hvar loksins hefir einhver á vegum sveitarfélaganna á höfuðborgarsvæðinu kynnt Borgarlínuna með myndarlegum hætti.

Samgöngustjóri Reykjavíkurborgar reið á vaðið & hélt gott erindi hjá stjórnmálaflokki einum á dögunum & má segja eptir kynninguna að höfuðborgarsvæðið eigi sér nú viðreisnar von.

Í máli samgöngustjórans kom m.a. fram að ef ekki verður gripið til róttækra aðgerða á næstum árum eða áratugum, stefnir í mikið óefni í samgöngumálum. Fjárfesta þarf gríðarlega í t.d. nýjum vegum, mislægum gatnamótum, endurnýjum bifreiðaflotans, bílastæðum o.fl. Áætlaður kostnaður við öll herlegheitin virðist liggja nærri því að koma á fót léttlestar- & hraðvagnakerfi. Þá eru óátalin umhverfismálin. Maður lifandi.

Þessi óheyrilegi kostnaður kallar á að hugsa almenningssamgöngur upp á nýtt. Það virðast sveitarfélögin hafa gert & koma til með á næstu misserum að kynna fyrir okkur léttlestar- & hraðvagnakerfi á höfuðborgarsvæðinu, hvorki meira né minna. 

Áætlað er að íbúum komi til með að fjölga um 70 þúsund manns á næstu 25 árum. Það er meiri íbúafjöldi en í Kópavogi & Hafnarfirði samanlagt!! Nema hvað.

Borgarlínan er metnaðarfullt verkefni á vegum allra sveitarfélaganna á höfuðborgarsvæðinu. Það þarfnast mjög góðrar kynningar því hér er um almannafé að ræða & gríðarlega háar tölur í því sambandi. Gleymum þvi ekki.

Yfir&út!

Róttækar aðgerðir í almenningssamgöngum

Sérhver er hver ...

Volgar laugar, voldugur hver
vafrar doksi um pleisið.
Í þann blágula fjótt svo fer
finnst þetta ekki beysið.

Hinn mallandi & moðkenndi dr. Gylforce mjakaði sér í einn af blágulu vögnum landsbyggðarinnar, hvar hann loksins loksins fékk réttu litablönduna en ekki einhvern hvítan rútuskratta. Hipp-hipp-húrrey!!! Maður lifandi!

Dr. Gylforce fór með ungviðið úr mennta- & menningarsetrinu við Kársnes & kynnti fyrir því bæ einn fyrir austan fjall. Doksi kallinn hringsólaði með ungana í leið 35 áleiðis upp í Hamraborg & bað þess heitt að leið 36 verði endurvakin. 

Frá Hamraborg þeirra Kópvæginga hélt hópurinn með leið 4 að Mjódd okkar Breiðhyltinga. Þegar í Þönglabakkann var komið blasti blágula djásnin við doktornum. Mmmmmm.

Dr. Gylforce brunaði með honum að Hveragerði & fékk svá sama vagn til baka.

Unaður.

Glæstir á götum ...

Glæstir eru á götum
í gulum fínum fötum.
Sterk eru drif & dekk
& doksi með - tjékk!
Vagninn ávallt veit
um vagnverjadeit.

Hinn mikli velunnari vagnanna, dr. Gylforce, hefir farið mikinn á vígvöllum veganna með vinum vorum, vögnunum - en ekki hvað???

Dr. Gylforce kom eitthvert kveldið ofanaf með leið 4 niðurúr & ætlaði innúr en alls ekki að æða framfrá. Það vakti gjörhygli Gylforce-ins að báðar leiðirnar sem hann hugðist taka voru ómerktar á endastöð. Er það eðlilegt???

Dr.-inn beið eptir leið 11 í Mjóddinni & fékk nýjasta vagn þeirra Fjarðarmanna, eðal Iveco Crossway sem bar öngva merkingu fyrr en vagnstjóri kom, ræsti vagninn & ók af stað. Af hverju er ekki hægt að hafa vagninn með leiðanúmeri framan á svo vér vagnverjar sjáum betur hvar hann er? Stundum er það svo, stundum ekki. Hví þetta ósamræmi???

Það var sama upp á teningnum við Hlemminn. Þar var leið 4 ómerkt eins & myndin sýnir. Rúnturinn var hinsvegar unaðslegur, hvar doksi kallinn skipti svo snarlega um vagn í Þönglabakkanum & hélt með leið 3 að Stútulautarseli sínu.