Gylforce er góð frilla & fráleitt gefinn illa ...

Hinn stálheppni & strákalukkaði dr. Gylforce stökk stinnur, stæltur & sterkur upp úr stól sínum á degi drottins hvar hann dreif sig á vit vagna. En ekki hvað???

Dr. Gylforce skeytti forsetaframboðsfokkið í öngvu & einbeitti sér af eðalleiðum í hinu lostfagra leiðakerfi höfuðborgarsvæðisins. Nema hvað.

Dr.-inn fann frumtóna sína í fráleitt framandi leið hvar hinn funheiti & engilsaxneski MAN 305 vagn var á vaktinni á leið 35. Hvað um það.

Í Hamraborg okkar Kópvæginga sté doksi kallinn ásamt unga vagnverjanum inn í hinn glæsta & (næstum) glænýja 149 Crossway vagn á leið 2. Ætlun feðganna var að halda með honum að Hlemmtorgi hvar þeir ætluðu að finna fyrir leið 16. 

Fjórar mínútur skilja á milli leiðar 2 & 16. Sú fyrri á að lenda við Hlemminn kl. 12:20 & leið 16 leggur úr vör kl. 12:24. Doksi kallinn hepði nær haldið að það væri nægjanlegur tími í maímánuði þegar færð er með besta móti (svona yfirleitt!), í hádegi sunnudags hvar umferð & vagnverjar eru ekki að tefja vagninn. 

En nei. Öðru nær. Vagnstjórinn var líkt & lyfjaður & lullaði á leið 2 & kom að Hlemmi kl. 12:24. Urðu feðgarnir að hlaupa líkt & fætur toguðu að hinni stextándu leið sem stoppar við Rauðarárstíg.

Þetta var heldur slappt á sunnudegi - en slapp til!

Að lúkningu fengu vagnverjarnir sér eðalrúnt með leið 4 frá Hlemmtorgi að Hamraborg okkar Kópvæginga. Hún var tímanlega & allt gekk samkvæmt óskum. Maður lifandi.

Enn er komið að stund ögur
einnig að henda í bögur.
Á fjörurnar við leið fjögur
fór vagnanna ástmögur.

Opt er grey á góðri leið ...

 Hinn grábirkni & gæfulegi dr. Gylforce gat grey dagsins á að líta í morgun hvar hann hugði á enn eina ferðina með hinum funheita MAN 305 vagni á leið 35. Nema hvað.

Dr.-inn hoppaði stundvíslega kl. 8:37 inn í leið 35 & átti hún að leggja úr vör um hæl. En öðru nær. Klukkan 8:39 silaðist vagnstjórinn loksins af stað & fór ekki langt - maður lifandi.

Vagnstjórinn stöðvaði vagninn hinum megin götunnar i Hamraborg okkar Kópvæginga & rölti inn á kaffistofu stjóranna. Þar var hann stutta stund svosem en þetta hangs þýddi að vagninn var orðinn strax þremur mínútum of seinn.Hann ók af stað klukkan 8;40 frá Hálsatorginu en þá á hann að vera kominn að mennta- & menningarsetrinu við Kársnes & Kastala. Hvað um það.

Þetta virðingarleysi fyrir tímaáætlun vagnanna er orðið afar hvimleitt hjá verktanum vestur á Kársnesi, Kynnisferðum.

Seltirningar sóttir heim ...

Hinn sjálfumglaði & sperrti dr. Gylforce sótti Seltirninga heim í morgun hvar hann átti erindagjörð við hrepp þennan. Nema hvað.

Um nes Seltirninga höfum vér vagnverjar aðeins um leið 11 úr að velja. Leið 13 ekur áleiðis að Eiðistorgi & niður að Öldugranda & er hægt að notast við hana ef ætlunin er að fara ekki vestarlega inneptir nesinu.

Dr.-inn sveif inn í 184 Iveco Crossway vagninn á leið 13 & leið með honum á leið, áleiðis að vistarverum seltirnískra vagnverja. 

Dr. Gylforce gekk afturkerrtur & uppréttur út við Eiðistorg & heilsaði öllum, bæði Seltirningum sem & vagnverjum & skrafaði & skeggræddi við þá. Fæstir - ef þá einhver - hapði reyndar áhuga á spjalli við spjátrunginn doksa & enn síður um vagna & leiðir & hið lostfagra leiðakerfi byggðasamlagsins. Hvað um það.

Eptir úrvals erindagjörð í hreppi þessum var komið að kveðjustund hjá doksa kallinum. Hann hóaði í leið 11 & sat í 219 Iveco vagninum alla leið að Mjódd þeirra Breiðhyltinga; úrvals rúntur sem tók ekki nema um 35 mínútur. 

Já, sælir eru Seltirningar þótt leiðir þeirra mættu vera fleiri & fjölbreyttari. Maður lifandi.


Þrásetuna þráir
í þýðum Iveco.
Finnst mér alltof fáir
sem finna slíka ró.

Rauðabítisriðl ...

Hinn ráðagóði & fráleitt rýnusami dr. Gylforce renndi sér í rauðabítinu á vit vagna. Það var ekkert vit í öðru hvar eldhnötturinn teygði geisla sína eldsnemma í morgun inn um glugga dr.´s & alla leið að bælinu hans. Nema hvað.

Dr. Gylforce sat dogginn & rogginn í leið 35 um kl. 6:52 hvar byggðasamlagið bauð okkur vagnverjunum upp á 169 Irisbus Karosa vagn að þessu sinni. Sætin í vagninum eru rauð & kunnugleg & hafa efalítið vera fengin úr Scania vagn sem hættur er akstri á vígvöllum veganna.  Hvað um það.

Doksi kallinn fékk sér sumsé eðalhring eldsnemmendis áður en hann hélt til ungviðisins í mennta- & menningarsetrinu hér við Kársnes & Kastala.

Yfir&út! 

Á vögnum góðar gætur
Gylforce-ins er val.
Fer nú opt á fætur
við fyrsta hanagal.

Hugann upp vill herða
hans lund er eðal.
Kóngur vill hann verða
vagnverja á meðal.

Vagnavænting ...

Hinn litli & loðbrýndi dr. Gylforce hefir lagt í margar leiðaferðir (fráleitt leiðar ferðir) meðal vina vorra - vagnanna - þennan annars ljúfa laugardag. Nema hvað.

Dr.-inn reis upp við dogg & greip unga vagnverjann með sér í margar æsilegar & unaðsferðir - en ekki hvað???

Feðgarnir hófu leik venju samkvæmt í þeim funheita á leið 35 hvar þeir tóku taktfast tvist & skelltu sér í leið 4 eystur við Efstahjalla. 

Frá Mjódd þeirra Breiðhyltinga einhentu vagnverjarnir sér í leið 24 áleiðis í Garðabæinn. Tvær síðarnefndu leiðirnar buðu upp á Crossway vagnana þótt hann sé nú töluvert styttri sá er ekur milli Garðabæjar & Grafarvogs. Hvað um það.

Vagnverjarnir dvöldu drykklanga stund við biðskýlið í Smáralindinni & vafðist hvort þeir tækju leið 2 ellegar leið 28 áleiðis að Hamraborg okkar Kópvæginga.

& feðgarnir voru ekki hættir. Öðru nær. Þeir stukku inn í 147 Crossway vagninn á leið 2 við Hamraborg & brunuðu í Húsdýragarðinn. Nema hvað.

Frá Laugardalnum höpðu þeir feðgar gaman að sjá 205 Irisbus-inn á leið 5. Enn meira gaman var þó að upplifa leið 3 frá Hlemmi að Mjódd.

Vagnstjórinn á leið 3 á hrós skilið. Hann lagði af stað stundvíslega kl. 16:52 frá Hlemmi. Sennilega beið hann í grun hve margir vagnverjar kæmu til með að vera með í ferð þessari. Sem varð & raunin.

Crossway vagn númer 175 á leið 3 varð sneisafullur eptir að hafa áð við Kringluna. Þar komu 28 vagnverjar um borð & áfram hélt fullur vagn að Mjódd þeirra Breiðhyltinga. Vagnstjóranum tókst að halda áætlun sem er vel gert með troðfullan vagn.

Fleiri stjórar mættu taka þennan öðlingspilt sér til fyrirmyndar & bera virðingu fyrir tímaáætlun vagnanna. En ekki hvað???

Heyrðu vinur, vagninn minn
vinur snjalli kæri.
Ert´að aka hringinn þinn
í alls konar færi?


 Neðsta mynd: citybus.piwigo.com

Dagur lands & lýðs ...

Hinn blóðheiti & besefi dr. Gylforce brá sér í unaðssæld í gærkvöldi hvar hann tók sér bólfestu í hinum bráðskemmtilega & engilsaxneska MAN 305 vagni á leið 35. En ekki hvað???

Það kom doksa kallinum skemmtilega á óvart hve margir vagnverjar voru með í för. Þeir voru efalítið í kringum 15 talsins & langflestir í vinnugallanum. 

Þegar betur var að gáð voru þetta harðduglegir karlmenn af erlendu bergi brotnir; ugglaust á leið til síns heima eptir erfiðan vinnudag.

Einn af öðrum hurfu þeir út í sólríkt kvöldið & allt í einu fékk dr.-inn sérferð eystur í Engihjalla með hinum funheita MAN vagni.

Þar áði hann um stund unz hann lék sín kunnuglegu stef til þess að komast í fegurstu laut jarðarkringlunnar, Stútulautina.

Amen.

Í vagninum eru verkamenn
vinnandi sí & æ.
Í sjónmáli er dagur senn
sem er fyrsti maí.

 

Víma & vagnþekking ...

Hinn víðförli & viðkunnanlegi dr. Gylforce gat vart hamið sig meðal ungviðisins við mennta- & menningarsetrið við Kársnes & Kastala. Ástæðan? Jú, hann einfaldlega hapði öngva löngun í að leggja börnunum lífsreglurnar að þessu sinni & langaði að halda á vit vagna. 

Sem & hann gjörði - en ekki hvað???

Dr.-inn fékk nánast sérferð með leið 4 um kl. 18:20 frá Hamraborg okkar Kópvæginga að Hlemmtorgi. 

Fáir vagnverjar voru um borð & hélt svá doksi kallinn áfram för sinni frá Hlemmi að Sólfarinu með leið 12. Þar kom aðvífandi 202 Crossway vagninn frá verktakanum suður í Firði. Nema hvað.

Sá hinn sami vagn varð aptur á vegi dr. Gylforce hvar hann hélt frá Hlemmi um kl. 19:30 að Mjódd þeirra Breiðhyltinga. Þaðan hélt hann með leið 4 í blíðviðrinu að Voginum fagra.

Dr. Gylforce valhoppaði í sannkallaðri sæluvímu að lúkningu í laut sína með leið 35 hvar hann fékk enn & aptur hinn funheita & engilsaxneska MAN 305 vagn þeirra Kynnisferða.


Eptir bölvað streð & strit
við stúderingar nema.
Heldur doksi á vagnavit
& verður gult hans þema.



Neðri mynd: citybus.piwigo.com

Magnað meðal Mosfellinga ...

Hinn eirni & indæli dr. Gylforce óð af stað í vagnana með gleði & galsa í gærmorgun. Doksa kallinn lengdi í langdvöl & þrásetu meðal vina vorra & helst í liðvagni en því verður eigi viðkomið á sunnudögum. Illu heilli. Hvað um það.

Dr.-inn lék sín kunnuglegu stef úr Voginum fagra & hélt hann - öðru sinni á skömmum tíma - í heimsókn til Mosfellinga. Sumsé, með viðkomu á Hlemmi lá leiðin í hinn magnaða Mosfellsdal.

Leiðir 6 & 15 bjóða hvor annarri upp í dans & líða um með reglulegum takti meðal Mosfellinga. Dr. Gylforce einhenti sér inn í leið 15 frá Hlemmi & að Skeiðholti sem er nærri Varmárbökkum. Nema hvað.

Dr. Gylforce skundaði út við Skeiðholtið & vafraði að Varmá. Á göngu sinni hlustaði hann eptir hljóði í hljóðleysinu; kvaki úr kjarri; hneggi úr haga.

Það var unaður einn að eiga stund með sjálfum sér þarna en svá var kominn tími á að halda á vit vagna. En ekki hvað???


Friður & ró í fjallasal
finn ég þar mitt geim.
Rétt við magnaðan Mosfellsdal
með strætisvögnum tveim.



Myndir: lionsmos.is & slepnir.is

Baltneski tígurinn belgir sig ...

Hinn litríki & lauflétti dr. Gylforce hefir líkt & endranær farið um víðan völl meðal vagnanna - vina vorra - enda unaðsferðamáti. En ekki hvað???

Nú berast okkur þær fregnir að vagnstjórar verði að baltnesku bergi brotnir í sumar. Illa gengur að finna Frónbúa til aksturs enda búið að setja dekk á allar mögulegar hásingar til þess að þjónusta tæplega tvær milljónir ferðamanna sem spássera ætla um landið okkar í sumar. Maður lifandi.

Byggðasamlagið hyggst ráða til sín 25 vagnstjóra frá Lithaugalandi. Það er vel & fagnar doksi kallinn þessari ráðstöfun. Vonandi verður þó undibúningi þeirra vel háttað en doksa er enn í fersku minni þegar hann sat í leið 35 & vagnstjórinn vissi ekkert hvert hann átti að fara. Sá var af erlenda berginu & nýbyrjaðir í starfi. Hvað um það.

Þetta verður spennandi & vonandi sýna Litháarnir að þeir eru vel í stakk búnir til þess að aka hér á vígvöllum veganna.

http://www.mbl.is/frettir/innlent/2016/04/21/lithaar_keyra_fyrir_straeto/


Í sumar verður ekkert slen
sæla algjör & geðfró.
er launmorðingjar frá Litháen
leggja í´ann hjá Strætó!!!

Akstur um öngvegi ...

Hinn aðþrengdi & aumi dr. Gylforce varð algjörlega miður sín er fréttir bárust af árekstri vagna við Hlemmtorg þennan annars ágæta frjádag. Já, þetta var agalegt alveg hreint. Maður lifandi.

Tveir ágætis Irisbusvagnar (kannski var annar Iveco), Karosa & Crossway lentu í kröppum dansi & verða nú að hvíla sig frá vígvöllum veganna um hríð. Sorglegt.

Flestum má það ljóst vera að aðkoman að Hlemmi er ekki boðleg fyrir vini vora, vagnana. Á annatíma fara um 50 vagnar þarna á einni klukkustund & þrengslin alltof mikil. 

Þá hefir það alltaf verið ráðgáta í huga dr.´s Gylforce hví vagnarnir á Hlemmi eru ekki í réttri akstursstefnu. Til að mynda er öngvu líkara en að leiðir 1, 3 & 6 séu á leið austur Laugaveg eða suður Rauðárarstíg en ekki á leið niður á Lækjartorg.

Vonandi verða leiðindaatvik á borð við þetta til þess að flýta fyrir för vagnanna frá Hlemmtorginu að nýrri samgöngumiðstöð við BSÍ. Nema hvað.

Lentu saman leiðir tvær 
lá svo mikið á.
Tenging ferða, nær & fjær
færa þarf - ójá!




Mynd: mbl.is/julius