Hin myrkvuðu maílok ...

Mínir virðulegu vagnverjar!

Því miður er stundin runnin upp. Eptir dag þennan munu leiðir 2, 5, 11, 13, 14, 15, 18, 24 aka um á hálftíma fresti í allt sumar.

Aukinheldur hættir hin geðþekka leið 16 að aka um helgar svo ekki sé minnst á leið 26 sem hverfur af sjónarsviðinu.

Það er jákvætt að í sumaráætlun höfuðborgarsvæðisins mun leið 12 halda áfram með 15 mínútna tíðni á annatíma virka daga. Vissulega koma leiðir 1, 3, 4, 6 til með að halda áfram sinni tíðni sem er vitaskuld vel.

Um að gera að nýta sér leið 12 til hins ítrasta hvar hún heldur sinni tíðni yfir sumarið. Maður lifandi.

Leið (undir lok) 26 ...

Hinn friðelskandi & fallegi dr. Gylforce fór hið snarasta út úr mennta- & menningarsetri sínu síðdegis hvar hann vildi drífa sig að kveðja leið 26 með virktum. Nema hvað.

Leiðin sú kveður vígvelli veganna á föstudaginn & kemur ugglaust ekki aptur í bráð. Hvað um það.

Dr.-inn kom sér vel fyrir við Árbæjarskóla & beið eptir leið þessari í hinsta sinn. Eptir drykklanga stund kom hinn stutti Heuliez 249 vagn þeirra Fjarðarmanna. Doksi kallinn hefir nú átt þær margar þráseturnar í þeim vagni þegar hann ók leið 24 hér um árið. Maður lifandi. Það voru um 6-10 vagnverjar um borð í vagninum en doksi kallinn gekk síðastur út við Spöngina. Dr.-inn buktaði sig & beygði fyrir vagninum & leiðinni en rölti því næst inn í leið 24 hvar hann fékk gamla góða vagninn með viðurnefnið "Hlandgula helvítið." Meir um hann síðar.




Nú er bara að sjá hvernig Árbæingar, Grafhyltingar sem & Grafvægingar taka í þessa ákvörðun Strætó bs. að hafa öngva leið 26 & mun verri tengingar á milli þessara hverfa þótt þær séu vissulega fyrir hendi með leiðum 16 & 18 í gegnum Ártún.

Þessi leið var ekki löng
lifði í nokkur ár.
Sprækur um Gröf að Spöng
- spurnin hennar banasár.




Epsta mynd: citybus.piwigo.com

Alhvíti andskotinn ...

Hinn hæðni & hvefsni dr. Gylforce hljóp harla spenntur upp í Hamraborg hvar hann hugði á ferð með ungviðið héðan af mennta- & menningarsetrinu við Kársnes & Kastala & ætlaði með þau upp í Mjódd & þaðan að hverasvæði þeirra Hvergerðinga. Maður lifandi.

Dr.-inn réð sér vart fyrir kæti enda alltof langt síðan hann hefir komist í kynni við hina girnulegu blá-gulu vagna sem annast akstur á landsbyggðinni. Nema hvað.

Dr.-inn hoppaði út við Mjódd með ungviðið úr leið 4 & langaði að sýna þeim hina blá-gulu fegurð. En hvað gerðist??? Verktakinn suður í Firði - sem annast aksturinn - var með alhvítan rútuandskota á leið 51, vagnverjum til handa. WTF!?!?!




& ekki tók betra við á heimleiðinni. Aptur hvítur rútuskratti á leið 51 - hva e a sge?!?!?!




Andskotinn alhvítur 
af alverstu gerð.
Déskotans dragbítur
djöfull hér á ferð.

Ártún, ár & tún ...

Hinn gjörhygli & gjálífissami dr. Gylforce gekk um Ártún einn góðviðrisdaginn hvar doksi kallinn hugleiddi gaumgæfilega vagna, vagnverja, tengingar, skilti, skiltagerð, göngustíga & hann veit vart hvað & hvað.


Vagnarnir stoppa á ýmsum stöðum við Ártúnið. Það getur vart verið spennandi fyrir nýjan & kappsaman vagnverja að átta sig á því hvar hann á að fara í vagninn sinn.
Ártún er efalítið með flóknari stöðum til þess að skipta um vagna, að ekki sé minnst á að ef maður kemur með vögnunum sem eru á leið í hverfi & ætlar í leið 24. Þá þurfa vagnverjar að nota hinu tvo jafnfljótu, maður lifandi.

Það er morgunljóst að þegar vasar Strætó bs. verða orðnir troðfullir þá væri ekki úr vegi að breyta fyrirkomulaginu upp á Ártúnsholti. En ekki hvað???

Nýir verjar í villu þar
vísar ger´ei gagn.
Ráfa um eins & rollurnar
& reyn´að finna vagn.

Vorstilltur er vagn vor ...

Hinn bolmikli & brjósumkennanlegi dr. Gylforce brá sér á leið eitt blíðlátt kvöldið fyrir skemmstu hvar hann hóf leik með hinni löngu & sérkennilegu leið 18. Nema hvað.

Hin 18. leið leggur úr vör frá Hlemmi & ekur Snorrabrautina eystur að Perlu um Bústaðaveg. Hún tekur beygju svo niður Grensásveginn - sem óðara fær nú á sig breytta mynd - & heldur svo rakleitt upp í Ártún. 

Strætó bs. pungar út heilum 8 vögnum á þessa leið á annatíma, kl. 7-9 & 14-18 virka daga. Fer hún þar með í flokk með öflugum leiðum á borð við leið 1, 6, 12 & 15 hvað fjölda vagna áhrærir. 

Um kvöld og helgar býður byggðamlagið Strætó upp á 5 vagna sem eru eins & á flestum leiðum Iveco Crossway, 150-154 vagnarnir. Hvað um það.

Leið 18 tekur heldur skrýtna króka um Grafarholtið en furðulegast er svo akstur leiðarinnar frá því hverfi að Grafarvoginum með viðkomu við Korputorg.

Dr. Gylforce sat sem fastast í leið 18 að Ártúni hvar hann vildi skoða tengimöguleikana & aðstöðuna þar betur aukinheldur sem hann hugði á frekari ferðir með hinni átjándu leið - en ekki hvað???

Meir um það síðar, mínir virðulegu vagnverjar.

Vagnar vorstilltir
á leiðum löggiltir.
Trauðla troðfylltir
sjaldan siðspilltir.

Droll & drægjusemi ...

Hinn seinförli & svifaseini dr. Gylforce var svekktur nokk eptir viðskipti sín við vini vora, vagnanna, á annan dag hvítasunnu.

Dr.-inn sté upp í fjóra leiðir sem allar áttu það sammerkt að vera með nokkuð miklar seinkomur. Nema hvað.

Áður hefir verið minnst á leiðir 1 úr Hamraborg & leið 14 frá Hlemmi.  Aukinheldur skelltu hinn ungi & aldni vagnverji sér í leiðir 18 & 2. Báðar voru 3-4 mínútum á eptir áætlun. Sérstaklega er það skrýtið varðandi leið 18 en feðgarnir hóuðu í vagninn við Perluna. Þá er tiltölulega stutt síðan hann lagði úr vör frá Hlemmi & fátt því til fyrirstöðu að vera á áætlun. Það hepði doksi kallinn nær haldið. Nema hvað.

Feðgarnir fóru stuttan rúnt með 151 Iveco Crossway vagninum á leið 18 að þessu sinni. Við Borgarspítala skiptu þeir yfir í leið 2 til þess að komast í Voginn fagra.

Það er mikilvægt fyrir vagnstjóra að skilja að vér vagnverjar stólum mikið á tímaáætlanir vagnanna. Sérstaklega í ljósi þess að skiptimöguleikar eru miklir í hinu lostfagra leiðakerfi höfuðborgarsvæðisins. Hvað um það.

Vagnstjórar, þið herðið ykkur upp og haldið áætlun enda ætti það að vera nokkuð hægt um vik yfir sumartímann. Maður lifandi.

Vænstan held ég vininn nú
vagninn ljúfi, seini.
Ævinlega hefir þú
haldið mér frá kveini.

Er ekki á leið ...

Hinn forsjálni & fyrirbyggjandi dr. Gylforce fann nokkra vagna á ferðum sínum í gær hvar þeir voru ekki á leið þrátt fyrir að aka í halarófu á eptir hinum ýmsu leiðum. Nema hvað.

Hmmmm, hvað voru hinir sænskættuðu Scania Omnilinkvagnar að gera???

Það er ljóst að þjálfun á Litháunum 25 er hafin af krapti hjá Strætó bs. Byggðasamlagið hefir nýtt helgidaginn í gær & sett vini okkar frá Litháen á vígvelli veganna.

Það er vel & vonandi vegnar þeim vel við aksturinn í sumar. Doksi kallinn mun hið minnsta gefa þeim góðan gaum.

Liggur vagn í leyni
leið öngvri er á.
Vart er hann sá eini
sem ætlar nú á stjá?

Grand hjá Granda ...

Hinir geðþekku vagnverjar, aldni & ungi, héldu á vit vagna í hinu huggulegasta veðri Hvítasunnunnar hvar þeir hófu leik við Hamraborg okkar Kópvæginga. Nema hvað.

Hinn ungi vagnverji vildi ólmur taka leið leiðanna, leið 1, & halda rakleitt á hina hafnfirsku velli eins & sjá má á myndinni. Verjarnir komust þó að samkomulagi um að halda niðrá Hlemmtorg að þessu sinni með sömu leið & hóa þar í leið 14 til þess að sækja Hvalasafnið út á Granda heim. Gott geim.

Það sem vakti gjörhygli Gylforceins þennan helgidag var óstundvísi vagnanna. Feðgarnir máttu þola 5 mínútna seinkun á leið 1 sem átti að leggja af stað kl. 15:35 frá Hálsatorginu að Hlemmnum. Og ekki tók þar betra við - maður lifandi.

Vagnverjarnir vildu komast í kynni við leið 14 á Hlemmi hvar hún á að vera þar klukkan 16:07. Biðu þeir lon & don unz hún kom heilum sjö mínútum á eptir áætlun. Hvað um það.

Eptir fegurð & fræðslu við Hvalasafnið var komið að hápunkti ferðarinnar - en ekki hvað???

Feðgarnir valhoppuðu inn í tveggja hæða vagninn. Það er allra athyglivert að lítill vegspotti, Grunnslóð að nafni, geymir tvær stoppistöðvar; aðra fyrir leið 14 & hina fyrir doubledeckerinn. Þessi bútur er eitt best varðveitta leyndarmálið í hinu lostfagra leiðakerfi höfuðborgarsvæðisins.

Feðgarnir flykktust með tveggja hæða vagninum að Perlunni hvar þeir áðu & sleiktu ís-kremið sem mest þeir máttu.

Meira síðar.

Út á Granda, upp í vagn
eðal hæða tveggja.
Mátti heyra hróp & fagn
í hugum okkar beggja.

Leið 15 ...

Hinn skini & skírlegi dr. Gylforce skaust á vit vgna í gærkveldi hvar hann hitti fyrir enn & aptur Mosfellinga. Nema hvað.

Leiðir 6 & 15 arka eystur til Mosfellinga & tók doksi kallinn þá síðarnefndu.

Strætó bs. skiptir hinu lostfagra leiðakerfi í þrenns konar leiðir; stofnleiðir, almennar leiðir & loks hverfaleiðir. Stundum er vandséð hvaða rök liggja þar að baki. Til að mynda er leið 15 skilgreind sem almenn leið en miðað við akstur leiðarinnar frá Reykjavegi í Mosfellsbæ & alla leið að Meistaravöllum vestur í bæ ætti hún að vera stofnleið að mati doksa. Hvað um það.

Það spillti ekki fyrir að reka glyrnurnar í leið 57 við Háholtið í Mosfellsbænum. Dr.-num langaði vitaskuld um borð í 3ja hásinga blágulan vagninn á þeirri leið en vissi þó að hún væri aðeins á leið upp á Skaga að þessu sinni.

Dr. Gylforce átti munúðarfulla stund meðal Mosfellinga & getur vart beðið að sækja þá aptur heim - en ekki hvað???

Úlfarsfell & Úlfarsá
yndi á að líta.
Heyrði ég þar hundgá
& hestana sá skíta.

Hin myrkvuðu maílok ...

Hinn blakki & blásvarti dr. Gylforce berst eins & sært brúnt dádýr við brjálsemihugsanir hvar nú senn líður að sumartíðni byggðasamlagsins. Maður lifandi. 

Öll þessi skerðing. Fáir vagnar á ferli. Sumar leiðir verða EKKI sumarleiðir; hva e a sge???

Sjá http://www.straeto.is/media/auglysingar/STR-78972-Leidabreytingar-sumar-2016.pdf

Doksi kallinn getur ei meir. Honum er öllum lokið. Nú er að leita á náðir fagaðila á geðheilbrigðissviði. Nema hvað.


Gylforce-inn með gleði hér
gaurinn er ávallt fagur.
Niðurlútur þó núna er
nálgast brátt svartur dagur.