Kúguppgefnir að kveðja???

Hinn gegndrepa en þó gegnheili dr. Gylforce hélt gagngert á vit vagna um helgina hvar hann þráði setuna góðu í hinum sænskættaðu Scania Omnilink vögnum. Doksi kallinn valhoppaði út úr laut sinni & upp í Hamraborg okkar Kópvæginga & sá þar hinn sænskættaða. Þar beið hann öngvra boða.

Dr. Gylforce heilsaði 103 Omnilink með virktum & var vagninn sá þéttsetinn af vagnverjum & á leið leiðanna, leið 1. Vel kann að vera að þetta sumar verði hans síðasta hvar hann hefir verið á vígvöllunum í um 13 ár & endurnýjun flotans stendur fyrir dyrum. Hvað um það.

Dr.-inn hjó aukinheldur eptir því að hinir síðustu Scania Omnicity vagnar, númer 182-185, eru enn í umferð. Styður það & yrðingu hans um að þeir séu líka að fara að kveðja okkur vagnverjanna. Doksi verður að komast í nokkrar langdvalir með þeim áður en þeir hverfa. Nema hvað.

Þeir gulu oss svo gleðja
götum okkar á
er senn kominn kveðja
kúguppgefnum hjá?


Mynd: http://citybus.piwigo.com/

Hugarhægð & huggun

Hinn alvörugefni & einurði dr. Gylforce lét eymsli hins unga vagnverja eigi aftra því að einhenda sér á vagnavachtina í dag. Aldeilis ekki.

Þeir feðgar splæstu á sig tveimur & hálfum hring með leið 35 hvar þeir fengu eðal sænskættaðan 302 Volvovagn & hlökkuðu ávallt til tímajöfnunar við Hamraborg hvar þeir gátu barið hina vagnana augum. Dýrð & dásemd.

Með litla ljúfling
ljúft er okkar deit
tvo & hálfan hring
& huggulegheit!

Sumar leiðir með sumartíðni ...

Hinn auðsveipni & umskipti dr. Gylforce er heldur dapur í bragði í dag hvar sumartíðni Strætó bs. er í garð gengin.

Doksi kallinn veit að margar leiðir koma nú til með að detta í 30 mínútna tíðni en góðu heilli munu leiðir 1,3,4 & 6 halda áfram að aka á kortersfresti á annatíma aukinheldur sem nokkrar hverfaleiðir halda þeirri tíðni.

Sumartíðni í garð gengin
Gylforce ei mun fagna.
Verður sá ungi auðfenginn
í unaðs sumarvagna? 


Dr. Gylforce er þó ánægður að sjá t.d. að leið 4 verður á 15 mínútna fresti & hlakkar til ferða með henni úr Hamraborg okkar Kópvæginga. Svá er hann spenntur að sjá hvort hinn spánnýi & spennandi VDL-vagn þeirra Kynnisferða haldi ekki áfram ferðum á leið 28. Hepði nú nær haldið það. Hvað um það.

Vagnverjar, nú er að kynna sér sumartíðnina & jafnvel að reiða fram reiðfákinn & halda með hann í vagnana :)


Mynd: http://www.fotolog.com/pesigangster/39564147/

Hrist & hoss ...

Hinn ómfagri & alvaxni dr. Gylforce átti unaðsstund í vagninum í gær ásamt hinum unga vagnverja hvar þeir fengu sér góðan hring með leið 35 hér í Voginum.

Vagnstjórinn virtist þó eitthvað vera á hraðferð hvar hann sló lítt af við hraðahindranir & átti hinn aldni vagnverji i fullu tré við að gæta ungviðisins. Allt fór það nú vel en í ofanálag þeytti hann bílhornið í gríð & erg ef honum fannst aðrir í umferðinni vera á einhverju lulli. Hvað um það.

Þeir feðgar komust þó heilu & höldnu upp í Hamraborg að lúkningu hvar þeir virtu fyrir sér átta vagna undrið sem þar er gjarnan.

Vertu nú vagn minn allt um kring
með vinsemdar blessun þinni.
Gleddu nú götur með þínum hring
& Gylforce-inn í óminni.

 

Mynd: http://citybus.piwigo.com/

Illt-y-ebni ...

Hinn stóri & svolalegi dr. Gylforce á svolitlum vandræðum hvar hann hefir tapað strætókortinu sínu. Nú er lítt um ferðir & grennir það hið spikfeita sálartetur hans sem öngvan veginn er gott. 

En, hvað er annað til ráða en að leita & leita?




Í Stútulautu

ég starði á kortið
sem mér var gefið

en hvar er það nú?

- já, hvar er það nú? 

Níu vagna nautn ...

Hinn alvaldi & ótakmarkaði dr. Gylforce upplifði heldur betur unað & alsælu í gær hvar hann náði í níu nautnaferðir með vinum vorum, vögnunum. 

Doksi kallinn valhoppaði af stað við fyrsta kattarbreim í Stútulautinni & var vitaskuld fullur tilhlökkunar. Hann & innritaði sig svá með virktum inn í einn sænskættaðan vagn á leið 35. Aðeins þrír vagnverjar tóku hringinn með doksa um hinn gamla & gróna kópvægska vog að þessu sinni & vachti það furðu dr.´s.

Frá Hálsatorgi tók við annar sænskættaður. Með honum kynntist doksi kallinn hinum kópvægsku Tröðum, Heiðum, Hjöllum, Smárum, Lindum & Sölum hvar hann að lúkningu þrýsti þéttingsfast - en þó fimlega - á stanzrofann við hina hrufulausu Hörðuvelli. Klukkan var þá orðin rúmlega hálfátta & doksi kallinn búinn að vera á ferðinni í um 50 mínútur.

Vagn minn, þú átt þúsund stopp
& þekkir ótal vegi.
Ávallt með þinn tignartopp
& tórir þótt ég deyi.

Dr.-inn kynnti fyrir ísþyrstum nemendum sínum leið 28 í tvígang & fékk í seinna skiptið hinn spánnýja & spennandi 307 megninlands VDL-vagn & var þá kominn með fjórar ferðir á ferilskrána þann daginn. Ekki amalegt það.

Dr. Gylforce einhenti sér enn & aptur inn í leið 28 um fjögurleytið & hélt með honum rakleitt að Mjódd þeirra Breiðhyltinga. Þar tók við þekkt materíal með leiðum 4 & 35. Gladdi það hró doksa hvar hinn engilsaxneski & funheiti MAN 305 vagn var aptur kominn á vígvelli veganna á leið 35. Hann hefir verið fjarverandi alltof lengi. Hvað um það.

Dr.-inn frá Stútulaut endaði þennan eptirminnilega dag með því að taka leið 24 en sú leið bindur allt leiðakerfið saman. Hún hefir leik í Ásgarði þeirra Garðbæinga, lullar svo inn í Vog framhjá Smáralind & þaðan upp í Mjódd þeirra Breiðhyltinga. Eptir það er komið að Ártúni & Breiðhöfða & svá endar þessi kynngimagnaða leið á því að stanza við Spöng.

Að lúkningu var svo aptur komið að hinum stutta MAN vagni á leið 35 sem færði doksa kallinn - þið vitið hvert!

Amen.



Myndir: citybus.piwigo.com

Með forseta & fógeta ...

Hinn forsmáði en þó forkunnarfagri dr. Gylforce fann litla eyðu í lífi sínu í síðustu viku hvar hann var ekki lengi að halda á vit vagna. Nema hvað.

Eptir drykklanga stund hapði hann & hitt fyrir fimm unaðsvagna & stóð þar upp úr þráseta í þriggja hásinga vagni á leið 1. En ekki hvað???

Hásingu þriggja þráseta
það má eigi ofmeta.
Sá svo forseta & fógeta
en fann eigi Léttfeta.

Eptir stuttan stanz í leið 28 steig dr. Gylforce sterklega inn í leið 21 við Mjódd þeirra Breiðhyltinga & sveif með honum inn að Firði. Krökkt var af vagnverjum í þessum stutta Heuliez vagni númer 254 sem flutti doksa kallinn út um hvipp & hvapp á leið 24 hér forðum daga. Hvað um það.

Við Fjörðinn komu allir hafnfirzku vagnarnir & var gaman að sjá þar nýlegan vagn þeirra Fjarðarmanna á leið 33 & verður hann skoðaður síðar. Svá kom þar & aðvífandi þriggja hásinga sænskættaður vagn á leið 1 & beið dr.-inn öngvra boða. Hér var á ferðinni 192 vagn frá Strætó bs. með aragrúa af eðalvagnverjum.

Gylforce-inn settist niður & hóf rannsóknir sínar & lauk þeim eigi fyrr en á Hlemminn var komið. Vagninn var um 35 mínútur á leiðinni sem er fínn ferðatími.  Eitthvað var aptasta hurðin að stríða vagnstýrunni & opnaðist í tíma & ótíma en allt endaði þetta farsællega.

Við Hlemminn hóaði hinn kópvægski kumpáni í meginlandsvagn á leið 4 & hélt svo áfram með leið 28 frá Hamraborginni háu & fögru að hinum hrufulausu Hörðuvöllum.

Yfir&út!


Mynd: geirinn.is

Fjörutíu mínútna fullnæging ...

Hinn léttfæri & liðugi dr. Gylforce lét eigi happ úr hendi sleppa á mánudaginn hvar hann hapði tækifæri til að kanna nýjar lendur vagnanna. Eptir daginn tókst hinum aldna vagnverja að kynna sér um fimm eðalvagna á hinum ýmsum leiðum. Maður lifandi.

Eptir tveggja vagna val með leiðum 28 & 24 var doksi kallinn kominn í heimsókn til Grafvæginga í góðu veðri. Dr.-inn spókaði sig & heilsaði grafverskum vagnverjum með virktum. Eptir spjall & spígsporun um Spöngina sá hinn kópvægski doktor hinn afar fagra 3ja hásinga Volvo vagn á leið 6 & beið öngvra boða.

 

Í 196 vagninum á leið 6 sat dr.-inn hugfanginn & heillaður & sté eigi úr vagni þessum fyrr en hann áði við Hlemmtorg um 40 mínútum síðar. 

Spígsporaði um Spöng

spratt síðan á Hlemm.
í sexu glaður söng

með síbylju Eff Emm. 

Þessi ferð var síðdegis & vachti það gjörhygli dr.´s að ekki margir vagnverjar voru um borð. Vagninn leið vel á leið & liðu þessar 40 mínútur líkt & um sekúndur væri að ræða. Án þess að hendi væri veifað var doksi kallinn kominn að Hlemmi.

Frá Hlemmtorgi hóaði dr. Gylforce í leið 4 sem mátti hafa sig alla við að bruna um Bríetartún, Borgartún & Kringlumýrarbraut & ná upp í Hamraborg á réttum tíma. Það tókst & á vagnstjórinn heiður skilið fyrir það.

Hinn aldni vagnverji tók svá að lúkningu hinn sænskættaða vagn á leið 35 & hélt hugstola í lautina sína.


Mynd: http://citybus.piwigo.com/

Módern fernd ...

Hinn vopnfimi & vígkæni dr. Gylforce var meðal vina sinna - vagnanna - í gærdag hvar hann áði & spáði í urmul vagna sem voru á vachtinni þennan annars munúðarfulla mánudag. Áður en sól hneig til viðar hapði dr.-inn tekið traustataki fyrirtaks fernd & voru vagnar af hinum ýmsum gerðum. Nema hvað.

Dr. Gylforce buktaði sig & beygði venju samkvæmt þegar hinn sænskættaði Volvo vagn á leið 28 kom upp að Hörðuvöllum. Sænska stálið þaut um Þingin & endaði í Mjódd þeirra Breiðhyltinga. 

Í Mjóddinni iðaði allt af lífi; ferðamenn komnir á kreik & spókuðu sig & öfluðu sér upplýsingar um hina mikilsmegandi & mektugu blá/gulu vagna er kanna lendur landsbyggðar aukinheldur sem mörlandinn muldraði eitt & annað fyrir munni sér & hoppaði inn í þá heiðgulu. En ekki hvað???

Doksi lék kunnugleg stef í Mjóddinni & kannaði leið 4 um kópvægskar koppagrundir. Hann sótti unga vagnverjann skammt frá Hamraborg & Hálsatorgi okkar Kópvæginga & hélt með honum á vit vagna.

Við Hálsatorgið kom hinn spánnýi & spennandi 307 vagn Kynnisferða á leið 28. Þrásetuþrá & langdvalarlöngun heltók feðgana um hæl & hentu þeir sér inn í vagninn & settust aptast.

Eptir langan unaðshring með spánnýja vagninum var komið að ferð í fegurstu laut jarðarkringlunnar. Hinir engilsaxnesku MAN vagnar númer 304 & 305 virðast fjarri vígvöllum veganna & sótti hinn sænskættaði 303 vagn þá feðga á leið 35 & hélt rakleitt í Stútulautina. 

Í helgum dómi doktorinn
& drjúgur með sig. 

Þrálátur & þverbrotinn
það er bara þannig! 

Harðasprettur hálffimm ferðar ...

Hinn útsmogni & íbogni dr. Gylforce fær stundum að kenna á því meðal vina sinna, vagnanna. Eins & fram hefir komið vill doksi kallinn að leið 35 bíði upp í Hamraborg okkar Kópvæginga eptir borgarvögnunum, leiðum 1,2 & 4, þótt um háannatíma sé að ræða. Hvað um það.

Dr. Gylforce mætti galvaskur á dögunum út við biðskýli sitt við Stútulautina & fýsti í ferð með hinum sænskættaða góðmálm á leið 35. Klukkan var stundvíslega 16:41 en þá á vagninn að lenda við lautina fögru. Doksa beið í grun að hann kæmi nokkrum mínútum of seint hvar vagninn þarf að bíða í Hamraborginni eptir öðrum leiðum. Svá kom sá sænski & hinn ungi & aldni vagnverji stigu um borð.

Þeir voru varla búnir að greiða gjaldið þegar vagninn hentist af stað. & þvílík svaðilferð!!!

Vagnstjórinn steig allt í botn við hvert tækifæri & sló lítt af við hraðahindranir & þrengingar. Máttu hinir miklu vinir vagnanna taka mikið mark á skiltinu góða: Haldið fast meðan vagninn er á ferð.

Loks komst vagninn upp í Hamraborg og var þar um kl. 17:04. Það er því greinilegt að leið 35 þarf að fara á harðaspretti til þess að ná hinum unaðsgóða hring um Voginn. Nema hvað.

Örlög Gylforce stundum grimm
& gleðin kengbogin.
Harðasprettur klukkan hálf-fimm
sem hendir þér um Voginn.