Hinn lostafulli liðvagn ...

Þessi gleður þánka manns
þegar skyggja tekur.
Er hann ekur fljóðafans
frá mér vessinn lekur.

Hinn handbæri & handskrifaði dr. Gylforce hefir lítið séð af hinum þýskættuðu MB-liðvögnum á leið leiðanna, leið 1, þetta haustið.

Efalítið eru þessi löngu & lostfögru liðvagnar einvörðungu notaðir í blæðandi morgunsárinu, hvar doksi kallinn er þá vant við látinn hvað vagna varðar; illu heilli vitaskuld.


Eptir því sem dr.-inn kemst næst eru liðvagnarnir nú einu fulltrúar hinna þýsku Mercedes Benz verksmiðja á vígvöllum veganna, sérstaklega eptir að 222 & 223 vagnar þeirra Fjarðarmanna fóru yfir reykmökkinn mikla. RIP.

Á morgun er síðan frítt í vini vora, vagnana, á frídegi bílsins.

Vagnverjar! Breiðum út fagnaðarerindið & látum sem flesta vita :)

Marklaus merking ...

Hinn hauk- & hreinlyndi dr. Gylforce reyndi að halda aptur af sér í hæsta degi gærdagsins, hvar hann var í Hamraborg okkar Kópvæginga & horfði á vagn þennan.

Leið 3 í Hamraborg á leið í selja- & fellahverfi??? Humm, humm. Hvurn fjandann er að ske?!?!

Við Hálsatorg & Hamraborg höfum vér einvörðungu leiðir 1, 2, 4, 28 & 35. Þar á öngvin leið 3 að vera.

Vagn þessi, þ.e. 340 Iveco vagninn, ekur nær alltaf á leið 35 & fær yfirlett pásu frá vígvöllum veganna rétt fyrir hádegið en mætir svo galvaskur um kl. 12:37 frá Hamraborg. 

Vagnstjórar verða samt að muna að merkja vagninn rétt. Svona nokk er ekki til þess fallið að auka hróður vagnanna. Maður lifandi.

 

Stólpagripur stórkemmdur ...

Það lagðist dökkt ský yfir hinn lagfærða & leiðrétta dr. Gylforce á dögunum, hvar hinn glæsti bláguli vagn á leið 55 lenti í óhappi. Já, hvílíkur hroði & hrak; slag & slark - maður lifandi.

Það er alltaf leitt að sjá vini vora verða fyrir hnjaski, sérstaklega þá blágulu. Vonandi kemst 703 Iveco vagninn á sín dekk & drif hið snarasta. Hvað um það.


Stólpagripur stórskemmdur
stjórinn vart með fagn.
Eitthvað verið illa stemmdur
endurbæta þarf nú vagn.

Dr. Gylforce hefir verið tíður gestur í leið 14 undanfarna daga. Ku það vera sú leið sem enn er óbreytt frá breytingu leiðakerfis sumarið 2005. Verktakinn, er eitt sinn var með höfuðstöðvar sínar hér vestur í Kársnesi, sér um aksturinn & hefir hapt undanfarið hina hollensku & huggulegu VDL-vagna á leið þessari. 

Vagninn heldur austur frá Hlemmi að Laugardalslaug, inn með Laugaásnum, fram hjá Glæsibæ & Grensásveg & alla leið að Verzló. Sumar götur eru í þrengri kantinum fyrir fullorðins eins & t.d. Hólsvegur, áður en vagninn kemur að Sunnutorgi. Hvað um það.

Um sex VDL-vagnar axla ábyrgð á hinni 14. leið á annatíma & var unaðslegt fyrir doksa kallinn að einhenda sér inn í 307, 309, 317, 328 & 329 VDL-vagnana einn daginn. Maður lifandi. Urmull vagnverja er í leið 14 & ljóst að hún er talsvert mikið notuð. Góðu heilli.

Vagnverjavitjun ...

Hinn búimannslegi & bljúgi dr. Gylforce bregður sér æ ofan í æ á vit vagna meðal Grafvæginga & Mosfellinga þessa dagana. Doksi kallinn kann svo sem öngvar haldbærar skýringa á því. Maður lifandi.

Dr.-inn er oft & tiðum aufúsugestur í leiðum 6, 15, 18 & 24. Doksi hefir látið hina stuttu grafvægsku leið 31 alveg vera að þessu sinni.

Dr. Gylforce hefir minnst á það áður hvar merkingar á leið 6 við Spöng er ábótavant. Á sama blettinum stöðvar hin sjötta leið, önnur á leið á Hlemminn en hin við upp í Háholt þeirra Mosfellinga. Það munar nú talsverðu á þeim staðsetningum, Hlemmur ellegar Háholt!

Ef vagnverjar eru ekki með sín hákfrá augu er auðvelt að taka ranga sexu! Meðal Grafvæginga þyrfti að splæsa í fjórðu akreinina til þess að aðskilja leið 6.

Þannig er ástatt nú í Spöngini að ein reinin er fyrir leið 18, önnur fyrir leið 24 & svo væri gott að hafa sitt hvora fyrir leið 6. Þarna þarf byggðasamlagið að bretta upp ermar. Aldreigi myndi maður sjá svona slakar merkingar í útlandinu. Nema hvað.

Dr.-inn sá við Spöngina hinn sænskættaða 110 Omnilink á leið 6. Var hann á leið upp í Mosó & vitaskuld skellti dr.-inn sér í einn eðalhring um Mosfellsdalinn. Hvað um það.

Við Háholt Mosfellinga var fátt annað í stöðunni en að bíða eptir leið 15. Hinn bláguli á leið 57 kemur vitaskuld þarna líka en að þessu sinni langaði doksa kallinn aptur heim í fegurstu laut jarðarinnar, Stútulautina. En ekki hvað???

Sumri nú hallar, hrollkalt fljótt
hrákaldur kemur bylur.
Í laut mína leita ég skjótt 
langar mig heim, þú skilur?

Gulgrænt um sali ...

Hinn skoski & skemmtilegi dr. Gylforce hefir skemmt sér konunglega við þá nýbreytni byggðasamlagsins, hvar þeir bjóða nú oss vagnverjum upp á metanvagnana tvo á leið 2.  

Dr.-inn gleðst fyrir hönd hinna kópvægsku Salarbúa en vagnarnir tveir taka slaginn á annarri leið á annatíma.

Að mörgu leyti eru hinir sænskættuðu Scania Omnilink 118 & 119 metanvagnarnir yndi & eptirlætisgoð Gylforce-ins.

Nú verður nokk auðvelt fyrir doksa kallinn að nálgast þá - & það mun hann gera - maður lifandi.

Sísprækur sá græni er
um sali á ferð.
Metanvagn er fyrir mér
mjög vistvæn gerð.

Valdsherrar vagnverjanna ...

Á dögunum var skipt um mann í brúnni hjá stjórn byggðasamlagsins, Strætó bs. Það er ánægjulegt & vonandi farnast nýjum formanni - sem & stjórninni allri - vel í störfum sínum á komandi misserum.

Formaðurinn kemur frá Reykjavík en sveitarfélögin sex sem eiga Strætó bs. hafa hver einn fulltrúa í stjórninni. Hér er efalítið á ferðinni hæfur hópur fólks sem hefir það erfiða hlutverk að efla almenningssamgöngurnar á sama tíma & huga þarf vel að nýtingu fjármagnsins sem í málaflokkinn fer. Hvað um það. 

Það vill svo skemmtilega til að fulltrúi okkar Kópvæginga býr í námunda við dr. Gylforce & Stútulaut hans. Doksi kallinn hefir hinsvegar aldrei séð hann í leið 35, eða bara í vögnunum yfirhöfuð. 

Máske er það lenskan í stjórnum & atvinnulífinu yfirleitt. Kannske stundar t.d. stjórn Haga aldrei viðskipti sín í Bónus, Hagkaup eða Debenhams??? Ef til vill leitar forstjóri Landspítalans ætíð á náðir Sjúkrahúss Akureyrar ef hann kennir sér meins??? Vera má að bankastjórinn í Íslandsbanka fái launin sín greidd inn á reikning hjá Landsbankanum???

Það er nefnilega allt svo eðlilegt - eða hvað???

Leitað að leið leiðanna ...

Hinn vagnþroskaði & vagnviti dr. Gylforce hefir vitaskuld verið undanfarið eins & eilífur augnakarl við Hlemmtorg þeirra Reykvíkinga. Nema hvað.

Dr. Gylforce hefir vart getað setið á sitjanda sínum hvar tilhugsunin um að úti á vígvöllum veganna sé leið leiðanna, leið 1, á 10 mínútna fresti á annatíma. Maður lifandi!

Enda fór svo að dr.-inn spígsporaði einn góðviðrisdaginn af mörgum á milli vagna í leið leiðanna & var eins & grár köttur milli Hlemmtorgs & Hamraborgarinnar. En ekki hvað???

Dr.-inn náði að arka inn í ellefu vagna á leið leiðanna, leið 1, en honum telst svo til að alls aki tólf vagnar leiðinni þegar tíðnin er hvað þéttust. Náði ekki einum - kemur næst!

Vagnarannsóknir þessar á hinni fyrstu leið, útheimta afar mikið magn af Maxinu mikilfenglega & sem betur fer var klósettið í turninum við Hlemminn í góðu standi fyrir doksa kallinn. Hjúkk! Það má líka sjá dr.-inn mjög spenntan inn í turni þessum í einu af myndböndunum hér með færslunni. Maður lifandi.

Vagnarnir voru flestir Irisbus eða Iveco Crossway eins & gefur að skilja nú um stundir. Aukinheldur náði doksi kallinn í hina 3ja hásinga Volvo 198 & 199 vagna sem & hina sænskættuðu 109 & 113 Omnilinka.

Öngva liðvagna var að sjá að þessu sinni en líklegt má telja að drif þeirra & dekk séu einungis dregin á vígvelli veganna á morgnana. Hvað um það.



Í 113 Omnilinknum voru fáir vagnverjar á ferli frá Lækjartorgi að Hlemmi sem er vitaskuld skiljanlegt en eins & sést í myndbandinu varð doksi kallinn afar dapur í bragði. Hvar eruð þið vagnverjar???

Betur tókst til í hinum Svíanum, þ.e. 109 vagninum. Hann var sneisafullur frá Lækjartorgi að Hamraborg okkar Kópvæginga hvar vel yfir 90% af vagnverjum voru kátir & keikir menntskælingar. 

Milli vagna komst í mók
mikil vart er frétt.
Í turninum svo í hann tók
taktfast & þétt.

Forgangsfokk...???

Hinn purpuralitaði & pellni dr. Gylforce finnst hægt ganga að fjölga forgangsreinum fyrir vini vora, vagnana. Í raun virðist allt standa pikkfast í þeim efnum. Nema hvað.

Eptir því sem næst verður komist, voru öngvar slíkar reinar malbikaðar hér á höfuðborgarsvæðinu í sumar, illu heilli.

Ef takast á að gera almenningssamgöngur að raunhæfum valkosti og ná um 15-20% af öllum ferðum fólks með vögnunum (eru um 5% núna), verður að fjölga sérreinum vagnanna, sérstaklega við miklar umferðaræðar.

SSH (Samtök sveitarfélaga á höfuðborgarsvæðinu), Vegagerðin, Strætó bs. & allir sem koma að þessu máli; nú er mál að gyrða upp um sig garmana. 

Næsta sumar verður að bæta verulega í & auka forgang vagnanna við Miklubraut, jafnvel á Kringlumýrarbraut, þ.e. frá Hamraborg að Kringlu.

& víðar - & víðar - maður lifandi!

Þótt leiðirnar doksa lokki
líka þarf stutta ferð.
Er forgangurinn í fokki
fleiri ei í bígerð???

Sjö leiðir að sjúkrahúsi ...

Hinn hrjúfi & stundum hranalegi dr. Gylforce hélt í blíðviðrinu á vit vagna, hvar hann átti erindi við fjölmennasta vinnustað þessa lands. Nema hvað.

Dr. Gylforce finnst leiðavalið í kringum Landspítalann við Gömlu-Hringbraut vera gott. Til dæmis er auðvelt að taka leið leiðanna, leið 1, úr Hamraborg okkar Kópvæginga & á aðeins 8 mínútum er vagninn kominn á áfangastað. Maður lifandi. 

Dr.-inn fýsti í einn gamlan & góðan Scania Omnilink á leið leiðanna en varð að láta sér lynda 140 Irisbus vagninn. Þessi þriggja ára gamli vagn reyndist vel & er léttur á sér & lipur. Hvað um það.

Í námunda við sjúkrahúsið stoppa aukinheldur leiðir 3, 5, 6, 14, 15 & leið 18 er á Snorrabrautinni. Þá er vitaskuld hægt að taka hina blágulu leið 55 frá Keflavík en hann nemur staðar við Nýju-Hringbraut.

Allar gulu leiðirnar hafa 15 mínútna tíðni á annatíma & ætti því að vera þægilegt fyrir dagvinnufólk & sjúklinga á Landspítalanum að halda á vit vagna að vinnu lokinni. Nema hvað.

Eptir að hafa leyft öðrum doktorum að grúska í innviðum Gylforceins skakklappaðist hann að stoppistöðinni & fékk aptur 140 Irisbus vagninn á leið leiðanna, leið 1 & hélt með honum glaður en dasaður að Hamraborg okkar Kópvæginga. En ekki hvað???

Ráfa ég um & rolast - já
reyn´að finna klink.
Mun ég við sjúkrahús sjá
sænskan Omnilink?

Grafvægingagrútur ...

https://www.facebook.com/drGylforce/videos/10153958537238348/

Hinn skeiðhöggi & fráleitt skjálfhenti dr. Gylforce skjögraði meðal Grafvæginga á dögunum & var þar hvorki til skaðræðis né skemmda. Öðru nær.

Dr.-inn hapði hug á því að heimsækja leið 18 almennilega að þessu sinni. Eptir fegrunarrúnt með flunkunýjum Iveco 338 vagni á leið 24 frá Mjódd að Spöng, settist doksi kallinn upp í 151 Iveco vagninn á hinni átjándu leið.

Dr. Gylforce er það til efs að hann hafi áður ekið með leið 18 um borgarhverfi þeirra Grafvæginga, þaðan framhjá Egilshöll áleiðis um Lambhagaveg um Úlfarsárdal. Að endingu tók dr.-inn hús á Grafhyltingum við Biskupsgötu, Kristnibraut & Þúsöld. Maður lifandi. Þvílíkur þrusurúntur!

Hún er ekki öfundsverð leiðin niður Skyggnisbrautina í Úlfarsárdalnum & þaðan um Fellsveg að Grafarholti; urmull af hrikalegum & illfærum hraðahindrunum sem gera vagninum erfitt um vik. Hvað um það.

Dr.-inn kvaddi hina átjándu leið við Ártún eptir skemmtilega skoðun um hverfi þessi. Eina neikvæða sem vachti gjörhygli Gylforce-ins var unglingur einn með ganglimi sína á skrýtnum stað líkt & sést í myndbandinu hér að ofan. 

Það þarf að skerpa á reglunum við ungviðið þarna í Grafarvoginum - en ekki hvað???

Grafarvogsins gleðistund
Gylforceinn hrífur.
Gleðin fór yfir í ólund
er sást í gaursins bífur.