Börnin & Borgarlínan ...

Börnin jú & Borgarlína
í belg ekki leggja orð.
Með framtíð sína framsýna
& flykkjast munu um borð.

Dr. Gylforce hefir nú um nokkurra ára skeið kennt almenningssamgöngur með ýmsu hætti í mennta- & menningarsetrinu við Kárnses. En ekki hvað???

Doksi kallinn hefir rætt reglulega við 13-15 ára um skipulag í borgum í samfélagsfræði aukinheldur sem hann hefir boðið þeim upp á valáfanga sem heitir í daglegu tali "Strætóval".

Eins & á grönum Gylforce má sjá er hann nú eldri en tvævetur & telst honum nú til að nemendur hans séu að nálgast 1000 talsins. Hví rifjar doksi kallinn þetta upp nú???

Jú, langflestir nemendur eru afar jákvæðir í garð Borgarlínunnar & að fá brú yfir Kársnesið. Þeir fagna þessum áformum & vinsælustu viðbrögð þeirra eru einfaldlega: "Er þetta að koma hjá okkur??? Kúl!"

Það er ágætt að hafa þetta í huga, sérstaklega í ljósi þess að nokkrir karlmenn á aldrinum 50-80 ára eru duglegir að skrifa í fjölmiðla hvar þeir finna Borgarlínunni allt til foráttu. 

Vissulega mega þeir hafa sínar skoðanir, skárra væri það nú! En hefir einhver lesið greinar eftir fólk á aldrinum 15-30 ára um þessa samgöngubyltingu??? 

Dr.-inn hefir ekki séð eina einustu sem er skrýtið því þeirra er framtíðin.

Jæja - yfir&út! 

Raunaleg rauntímatafla ...

Í strætóskýlum stóla á
stórgóða nýja tækni.
Nema ég hafi gleymt að gá
& gæti þurft augnlækni.

Dr. Gylforce fór sínar fyrstu ferðir ársins hvar hann hélt sig við sínar breiðhylzku lendur. Nema hvað.

Við Seljabraut okkar Breiðhyltinga hefir nýlega verið komið upp rauntímatöflu í skýlinu. Doksi kallinn tók eptir því á dögunum & hugsaði sér gott til glóðarinnar að nýta sér tæknina. En ekki hvað???

Þegar dr.-inn bar að garði virkaði rauntímataflan ekki sem var bagalegt. Aukinheldur var leið 2 of sein á ferðinni en blessunarlega slapp það til þegar í Mjódd var komið.

Yfir&út!

Gleðilegt ár vagnverjar!

Dr. Gylforce óskar vagnverjum nær & fjær gæfu á leið á nýju ári.

Takk fyrir hið stórmerkilega 2020 & munum:

Betri er einn vagn á ferð en tveir í tímajöfnun.

Góðar stundir.

Hæstánægðir Hnakkverjar ...

Árborgin nú hyggur á
ókeypis vagnaferðir.
Íbúar með hýrri há 
um höfuðið velgerðir.

Ókeypis í Hnakkabænum

Það virðist vera komin tvöföld ástæða fyrir dr. Gylforce til þess að sækja Selforce heim. Maður lifandi!

Góðu heilli ætla sveitarstjórnarmenn þar í bæ að efla innanbæjarvagninn aukinheldur að bjóða upp á ferðir án endurgjalds. Þetta verður efalítið mikið framfaraskref í þessu vaxandi bæjarfélagi & hlakkar dr.-inn til þess að kynna sér þessa þjónustu betur.

Hin ástæðan er vitaskuld breyting á landsbyggðarvögnunum. Gylforce-inn vill ólmur komast í appelsínugulan/gulan vagn & kanna hans kosti & er þá ekki tilvalið að hefja leik með góðri ferð á Selforce???

Gef ei gaum ...

Vögnunum nú gef ei gaum
Gylforce-inn með meiru.
Daglega hann á sér draum
að drepa þessa veiru. 

Það er ekki laust við að dr. Gylforce sé enn & aptur með böggum hildar, hvar fátt er um ferðir hjá honum í faraldrinum. 

Vissulega eru vinir vorir, vagnarnir, á fullu á vígvöllum veganna en öngvu að síður hefir doksi kallinn ákveðið að hlýða Víði & vera lítt á vappi.

Vonandi varir þetta leiðindaástand eigi lengur en til 3. nóvember.

Yfir&út!

Á strætisvagna stari ...

Strætisvagnana stari á
steinrunninn með væl.
Um leið & faraldur er frá
finn ég þá um hæl.

Hinn stolti & stælti Stútulautarselsdoktor hyggst láta sér nægja að fylgjast að mestu með vögnunum - vinum vorum - meðan þriðja bylgja óværunnar er í hámarki. Nema hvað.

Dr. Gylforce sat fráleitt í gærkvöldi í seli sínu í læstri hliðarlegu með bók í hönd og konfektkassa í seilingarfjarlægð. Öðru nær. Doksi kallinn valhoppaði brosandi af stað um breiðhylzkar lendur & áði við Mjódd, hvar hann fylgdist grannt með vögnunum.

Það gladdi hið gamla hró dr.´s hve margir rafvagnar ættaðir úr Austri voru á vígvöllum veganna. Öllu kaldhæðnislegra er þó sú staðreynd að rafvagnar þessir eru framleiddir steinsnar frá Wuhanborginni í Kína, hvar veiran skæða virðist eiga upptök sín & heldur doktornum frá langdvölum & þrásetum í vögnunum.

Amen. 

Fátt um ferðir ...

Stopular ferðir, ömurð ein
einmana nú er doksi.
Allt saman mikið vol & vein
vil út úr þessu boxi.

Enda þótt hálfgert útgöngubann ríki á höfuðborgarsvæðinu réð dr. Gylforce ekki við sig & hélt á vit ævintýra & vagna. En ekki hvað???

Dr-inn hapði spurnir af því að vagn með glæsilega KFC auglýsingu væri á vígvöllum veganna & beið doksi kallinn því öngvra boða.

Hann hélt rakleitt út í skýli sitt & þurfti ekki að leita lengi eptir hinum eldrauða KFC vagni, hvar hann var á leið 3 þennan ágæta & ljúfa laugardag. 

Eins & áður segir er þetta gullfallegur vagn. Athygli þó vekur að vagn þessi er heldur í eldra lagi (rúmlega sjö ára) en virðist vera ætlað að aka frá morgni til miðnættis svo auglýsendurnir fái nú eitthvað fyrir aur sinn. 

Hvað um það. Dr.-inn fékk indælan rúnt með vagni þessum en afar fáir vagnverjar voru á ferli - eðlilega miðað við aðstæður - & áttu vagnstjórar sem dr.-inn komst í kynni við í kvöld heldur erfitt með að vera ekki á undan áætlun.

Yfir&út!

Verum öll með grímu ...

Mínir kæru vagnverjar
verum með grímu.
Öll við erum samherjar
í þessari glímu.

Grímuskylda

Vonandi eru allir vagnverjar með á nótunum & tilbúnir að setja á sig grímuna í vinum vorum, vögnunum. 

Dr. Gylforce hefir ekki séð annað en langflestir taki þessu vel enda er nú skylda að vera með grímu, bæði fyrir verjann sem & vagnstjórann. 

Dr.-inn hlakkar til að halda út á vit vagna í fyrramálið & kanna stöðuna á grímunum.

Yfir&út!

Barbarismi í borginni ...

Í biðskýlum berserksgangur
barbarar - sammála?
Kollurinn á þeim kolrangur
komið þeim til sála.

Barbarar í borginni

Hinn veiruvanmáttugi vagnverji, dr. Gylforce, mátti nú ekki við fleiri slæmum fréttum þessi dægrin. Maður lifandi!

Ekki nóg með að þrásetur & langdvalir í vinum vorum - vögnunum - séu ekki skynsamlegar á þessum dæmafáu tímum heldur virðist sem helstu barbaristar borgarinnar hafi gengið berserksgang á biðskýlunum við Ártún!

Skýlin voru þakin glerbrotum sem minnir doksa kallinn óþægilega mikið á voveiflegan atburð í Þýskalandi rétt fyrir seinna stríð. Úff!

Vonandi ná laganna verðir að hafa hendur í hári barbaranna svo ófögnuði á borð við þennan linni nú í eitt skipti fyrir öll. Koma svo!!!

Amen.

Hinn grímuklæddi Gylforce ...

Gylforce-inn grímuklæddur
í gleðina er basl. 
Með sprittbrúsann síhræddur
svei þér veirudrasl!

Hinn bústni en bráðmyndarlegi dr. Gylforce brölti á vit vagna í blæðandi morgunsárinu, hvar grímuskyldu hefir nú verið komið á í öllum vögnum. Góðu heilli.

Vitaskuld var doksi kallinn vopnaður einni grímu aukinheldur sem hann hélt þéttingsfast en þó fimlega á litlum sprittbrúsa. En ekki hvað???

Faraldurinn virðist vera kominn aptur á flug & því afar mikilvægt að fara varlega og huga vel að sóttvörnum. Ekki var annað að heyra á fréttamiðlum en að flestir vagnverjar hafi hapt grímuna fyrir vitum sér í ferðum sínum. Það var a.m.k. upplifun doktorsins. Nema hvað.

Vagnverjar virða reglur

Dr.-inn átti unaðsstundir í leið 4 & 35 þennan morguninn & fékk sér svo góðan rúnt með leið 28 eptir daglanga viðveru í mennta- & menningarsetrinu við Kársnes.

Yfir&út!