Könnun um ferðavenjur vekur von ...

Upp þokast aðeins prósentan
ömurð dags burt bolar.
Gerir doktorinn dátt spenntan
dropinn steininn holar.

Ein umfangsmesta könnun sem gerð hefir verið um ferðavenjur landsmanna leit dagsins ljós á dögunum. Það var samgönguráðuneytið og Samtök sveitarfélaga á höfuðborgarsvæðinu sem fengu Gallup til verksins.

Úrtakið var tæplega 23 þúsund manns - hvorki fleiri né færri - & svarhlutfallið um 42% sem þykir nú bara dágott í svona stórri & viðamikilli könnun. Nema hvað.

Ánægjulegustu tíðindin í könnuninni að mati dr. Gylforce er vafalítið að hlutfall almenningssamgangna í heildarferðum á höfuðborgarsvæðinu mjakast upp úr fjórum prósentustigum í heil fimm. Takk fyrir túkall! 

Þetta hlutfall hefir staðið í stað i heil 18 ár & því ber að fagna að talan þokist örlítið upp á við.

Enn er hlutfall einkabílsins (bílstjóri eða farþegi) á milli 70-80% þótt dregið hafi aðeins úr á höfuðborgarsvæðinu.

Hér gildir hið fornkveðna - dropinn holar steininn.

Þetta kemur, vagnverjum mun fjölga.

Amen.

Vörubíll straujaði vagn ...

Illa leikinn vagninn var
vörubíll fór betur.
Þetta er meira ófremdar- 
ástandið í vetur.

Vagninn illa leikinn

Betur fór en á horfðist þegar vörubíll straujaði afturhlutann á einum vagni sem var á leið 11 á Nesveginum nú síðdegis. Nema hvað.

Aðeins tveir vagnverjar voru um borð & góðu heilli voru þeir framarlega & hinumegin í vagninum þegar óhappið varð.

Ugglaust eru færri verjar um borð í vögnunum þessa dagana vegna ástandsins & kom það sér einstaklega vel að þessu sinni. 

Ef glyrnur Gylforce-ins svíkja hann ekki er hér um að ræða um 10 ára gamlan vagn frá verktakanum suður í Firði & því spurning hvort hann fari nokkuð aptur á vígvelli veganna eptir þetta hressilega hnjask???

 

Frítt suður með sjó ...

Frítt í vagna

Fríkeypis nú suður með sjó
sælir eru verjar.
Meðan veiran eitrar okkar hró
& á okkur herjar.

Bæjaryfirvöld í Reykjanesbæ hafa - líkt & aðrir - brugðið á það ráð að loka framhurðum á vögnum sínum til þess að vernda vagnstjóra sína gegn veirunni.

Þeir hafa bætt um betur & ætla að hafa vagnana gjaldfrjálsa meðan á samkomubanninu stendur. 

Aukinheldur er mælst til þess að þeir sem geti noti vagnana utan annatíma geri það & dreifi þar með álaginu & mun þá vonandi ganga betur að hafa tveggja metra millibil milli vagnverja.

Yfir&út!

Dagar hinna harðlæstu framhurða ...

Fyrsti dagur hinna harðlæstu framhurða virðist hafa gengið vel ef marka má framkvæmdastjóra byggðasamlagsins. Hann var í settinu á daglegum blaðamannafundi yfirvalda í gær & vissi ekki af neinum vandkvæðum meðal vagnverja. Góðu heilli.

Hinsvegar voru fáir á ferli - eðlilega svo sem - enda t.d. bæði framhalds- & háskólar lokaðir & nemendur komnir í fjarnám & nokkur fjöldi landsmanna situr heima í sóttkví. Nema hvað.

Framhurðin var harðlæst
hinar opnar dyrnar.
Verum róleg, ekki æst
í unaðsferðirnar.

Enn munu þó vagnverjar ganga inn í hina blágulu landsbyggðavagna að framan enda afar erfitt í framkvæmd að láta alla koma inn að aptan í þá. Hvað um það. 

Ráðstöfun þessi mun gilda meðan samkomubann ríkir í landinu. 

Vonandi gengur þetta allt vel hjá ykkur vagnverjar næstu daga.

Friður & ást!

Hönnunarkeppnin hafin ...

Hönnunarkeppni hafin er
hlakka til að sjá
hver sigur úr býtum ber
& brúna reisa má.

Enda þótt dr. Gylforce ferðist illu heilli ekkert með vögnunum - vinum vorum - vegna veirunnar válegu þessa dagana hefir hann hugann vitaskuld við samgöngur almennings, nú sem endranær. En ekki hvað???

Til að mynda er hönnunarsamkeppni vegna brúarinnar yfir Fossvog í fullum gangi. Eins & hefir komið fram hér er um afar spennandi verkefni að ræða sem tengja mun Reykjavík og Kársnesið og allan Kópavog með mun betri hætti en áður.

Brúin verður um 270 metrar að lengd & verður hún fyrir gangandi vegfarendur, hjólandi & fyrirhugaða Borgarlínu. Sérstök matsnefnd á vegum Reykjavíkurborgar, Kópavogsbæjar og Vegagerðarinnar valdi sex hönnunarteymi til að taka þátt í samkeppninni en alls bárust umsóknir frá 17 hópum.

Niðurstöðu er síðan að vænta í maí & mun nefndin þá velja eina tillögu af þessum sex.

Það verður spennandi að sjá - maður lifandi!

Strætóstoppistöð tekur stakkaskiptum ...

Iðandi mannlíf & viðmót vænt
með vögnum & Borgarlínu.
Gróskumikið svæði, iðjagrænt
með götulífi fínu.

Nýtt deiliskipulag hefir verið samþykkt fyrir Hlemm & allt útlit fyrir að framkvæmdir komi til með hefjast í sumar. Maður lifandi!

Ljóst er að Hlemmtorgið mun gerbreytast. Bílaumferð verður verulega takmörkuð - ef einhver verður - & lögð áhersla á að almenningssamgöngur á borð við strætó og Borgarlínu fari greiðlega um svæðið.

Aukinheldur á torgið að iða af mannlífi, veitingastöðum & afþreyingu & möguleiki verður á að halda viðburði & hátíðar til handa börnunum. Það er vel til fundið.

Dagarnir hvar Hlemmur verður endastöð fyrir margar strætisvagnaleiðir hljóta að vera taldir. Nú er bara spurning hvert þeir eigi að fara því varla er BSÍ tilbúið að taka við svo mörgum leiðum. Svo þarf líka að hafa nýja leiðanetið í huga sem mun breyta leiðakerfinu mikið.

Það eru því miklir umbrotstímar framundan í ýmsum skilningi.

Amen.

Unnið heima ...

Vagnstjórar sumir vinna heima
á vaktinni er einn.
Ekur þar um heima & geima
án þess að hitta neinn.

Samkomubannið & hin válega veira setur líf okkar ansi vel úr skorðum. Margir eiga þess kost að geta unnið heimavið líkt & þessi skandinavíski strætóbílstjóri :)

Svo virðast vagnstjórar í Ísrael hafa vaðið vel fyrir neðan sig sem er vitaskuld mikilvægt þessa dagana eins & sjá má í myndbandinu hér að neðan:

https://www.facebook.com/michaelangelosvk/videos/10213006014583453/

Allir inn að aptan ...

Inn fara allir baka til
svo ekki smitist þú.
Muna að hafa mikið bil
maka vel spritti nú!

Inn að aptan

Stjórn Strætó bs. hefir fundað vegna veirunnar válegu & hefir gefið út reglur til handa oss vagnverjum.

Til að verja vagnstjórana verður framhurð vagnanna lokuð frá & með mánudagsmorgni & ætlast til að allir fari inn um mið- & apturhurðir.

Eðlilega verður erfitt að fylgjast með greiðslum en hér verður bara að biðla til vagnverja að vera heiðarlegir & greiða fargjaldið góða nú sem endranær.

Vonandi taka vagnverjar vel í þessar nýju reglur aukinheldur sem mælst er til að verjar ferðist utan annatíma hafi þeir tök á.

Framhalds- & háskólar verða lokaðir í næstu viku & því sjálfgefið að færri verði í vögnunum sem gefur hinum tækifæri á að hafa tveggja metra millibil til þess að forðast smit.

Yfir&út!

Tveir metrar á milli ...

Nú metrar á milli tveir
munum vel eptir því
svo meinið dreifist ei meir
& menn lendi í sóttkví.

Nú þegar stjórnvöld hafa sett miklar takmarkanir á samkomur í landinu en vert að huga að vinum vorum - vögnunum.

Það er ljóst að vagnverjar verða að hafa tveggja metra millibil í vögnunum næstu fjórar vikurnar. Hvernig því verður framfylgt er ekki gott að segja um á þessari stundu nema að hvetja verjana til þess að gæta að þessum hlutum.

Líklega verða sett upp áberandi tilkynningar í alla vagna en Strætó bs. er í þessum töluðu orðum að undirbúa aðgerðir varðandi almenningssamgöngur í landinu.

Förum varlega vagnverjar. Sjálfur mun dr.-inn lítið notast við vini sína þessa daga - illu heilli.

Fátt um ferðir :( ...

Lítt um ferðir, já ömurð ein
angistarfullur ráfa.
Í vögnum leynist veirumein
ef verjar á mér káfa.

Dr. Gylforce er með böggum hildar þessa dagana hvar verkfall er í mennta- & menningarsetrinu við Kársnes & ekkert lát á því. 

Þá hepði verið gráupplagt að halda á vit vagna. Nema hvað. En ó-nei, því er ekki að heilsa. Illu heilli.

Vegna hinnar vályndu veiru verður dr. Gylforce að láta sér nægja að fylgjast með vinum vorum - vögnunum - úr fjarlægð. 

Á næstu vikum og mánuðum fer fram útboð á nýjum rafvögnum & bíður dr. Gylforce mjög spenntur eptir því - en ekki hvað???

Enda þótt rafvagnarnir frá kommúnistunum í Kína séu ágætir vonast dr.-inn eptir því að byggðasamlagið festi fjár í nokkrum þýskum eðal MB-vögnum líkt & þessi sem kom til reynslu fyrir nokkrum vikum.

Það var úrvalseintak & mun ferðin sú seint gleymast. Maður lifandi!