Rauð veðurviðvörun - öngvir vagnar ...

Gerast nú válynd veður
veðráttan fárviðri.
Mæður, fólk og feður:
Ferðir liggja niðri.

Ferðir falla niður

Byggðasamlagið Strætó hefir fellt niður allar ferðir sínar í fyrramálið vegna fyrirhugaðs fárviðris.

Rauð veðurviðvörun hefir borist frá Veðurstofu Íslands og því verða vagnarnir ekki á ferðinni á morgun fyrr en í fyrsta lagi kl. 10.

Allt klappað og klárt ...???

Klárt og klappað
komið af stað
allt afslappað
en ekki hvað???

Nýja greiðslukerfi hjá Strætó, sem hefir fengið nafnið Klapp, er nú komið í prófanir til þess að sníða síðustu agnúa af kerfinu, ef einhverjir eru.

Dr. Gylforce hefir fengið þann heiður að vera eitt af tilraunadýrunum. Vel hefir gengið að nota kortið & ekkert komið upp á ennþá hjá doksa kallinum en hafa skal í huga að ekki liggja margar ferðir að baki.

Það er norskt hugbúnaðarfyrirtæki sem annast uppsetningu Klappsins & svipar það mjög til Oyster kortsins svokallaða sem margir þekkja frá Lundúnum. 

Vonandi lítur Klappið svo dagsins ljós fyrir vagnverja á fyrstu mánuðum næsta árs.

Hlemmtorg ...

Meðan
gljáfægðir
gulir vagnar
með kolsvört
gúmmídekk
harðloka
hurðum
og hvílast

skunda ég
í átt að
skólavörðu

ramba
á rafskútu

fell á mitt
umhverfisvæna
fés.

Góðan daginn allan daginn ...

Hinn prúðbúni & fráleitt mikli predikari dr. Gylforce hefir verið sem eilífur augnakarl í leiðum sínum til & frá Stútulautarselinu sem eru jú leiðir 3 & 4.

Að minnsta kosti tvennt hefir vakið gjörhygli Gylforce-ins. Nema hvað.

Í fyrsta lagi eru komin í nokkra vagna skemmtileg handföng sem eru með auglýsingu. Það er nýbreytni.  Þetta hefir doksi kallinn ekki áður séð & verður gaman að sjá hvort þetta verði sett upp í alla vagna. En ekki hvað???

Annað sem er allra athyglivert eru auðvitað vagnstjórar & -stýrur. Langflest eru þau til fyrirmyndar en þó er grautfúlt að mati dr. Gylforce að hitta á einn slíkan sem ekki býður góðan dag, horfir ekki til manns & lætur eins & vér vagnverjar séum ekki um borð. 

Dr. Gylforce mætti því miður einum slíkum í dag á leið 4. Vonandi hittir hann öngva slíka á morgun hvar fögnuður verður enda nákvæmlega 20 ár liðin frá stofnun Strætós bs. Það er eitthvað!

Af hverju vagnstjóri ertu?
Við aksturinn mjög laginn?
Á skemmtilegheitum skerptu
skjóttu á oss: Góðan daginn!

Straumurinn liggur í vagninn ...

Bylting hófst fyrir hundrað árum
hvarf þá myrkrið svart.
Lýsislampana út bárum
& leiddum strauminn skarpt.

Á hvíldardegi þessum eru nákvæmlega 100 ár frá því að Rafstöðin í Elliðaárdalnum hóf starfsemi og Reykjavík reið inn í nútímann. Maður lifandi!

Af þessu tilefni hefir Strætó bs., í samstarfi við Orkuveitu Reykjavíkur & Elliðaárstöð, látið útbúa þennan forláta & flotta rafvagn. 

Rafvagn þessi verður væntanlega á leiðum 2, 3, 4, 6 & 18 næstu vikurnar & er dr. Gylforce afar spenntur að sjá hann á vígvöllum veganna. 

Góðir vagnar & glaumstund ...

Skrapp nú Gylforce á glaumstund
fyrst góða vagna fann.
Brósi einatt blíður í lund
& bjórinn niður rann.

Hinn gleðisami & glysgjarni dr. Gylforce var í gærkvöldi á galeiðunni, hvar hann girnist mjög að gæla við þann görótta. Auðvitað!

Eptir afar vel valdar vagnaleiðir með leiðum 4 & 12, var dr.-inn óðara kominn i sollinn í miðbænum. En ekki hvað???

Gylforce-inn bauð öngvra boða við að kneyfa ölið & hapði brósa sér til fulltingis. Nema hvað.

Það vakti gjörhygli Gylforce-ins að sjá leið 3 aka upp Hverfisgötuna á leið á Hlemmtorg í stað Sæbrautar. Dr.-inn hefir hvergi séð að slíkt eigi að gera aukinheldur sem þristurinn skeiðaði svá með dr.-inn um títtnefnda Sæbraut áleiðis í Mjódd. Unaðsrúntur það - maður lifandi!

Þjóðhátíðarrúnturinn ...

Á þjóðhátíð af stað ég þaut
í þægilegan gulan.
Stjálkaðist úr Stútulaut
í stóra heiminn hverfulan.

Hinn reikuli & ráfandi dr. Gylforce rauk vitaskuld til vina sinna - vagnanna - til að halda þjóðhátíðardaginn hátíðlegan. En ekki hvað???

Unaðurinn náði hámarki á Hlemmtorgi hvar dr.-inn barði alla rafvagnana augum. Leiðir 2, 3, 4, & 18 stútfullar af umhverfisvænum vögnum meðan eymings verktakar á vegum Strætós spúuðu mengun út í andrúmsloftið. Hvað um það.

Í dag heldur dr. Gylforce á vagnavit von bráðar & gott ef ekki mun þá kasta tólfunum. Maður lifandi!

17. júní ...

Hæ-hó & jibbí jei!
Jón Sig & smá lögg.
Hátíð í bæ - ókey
eitt sinn vagn með flögg.

Í dag er fögnuður mikill hvar þjóðhátíðardagur vorrar þjóðar er upprunninn. Maður lifandi!

Illu heilli eru vinir vorir - vagnarnir - með sunnudagsáætlun en látum það eigi spilla gleði oss.



Til hamingju með daginn!






Myndir: Strætó bs. og halli.is

Hin heiðbjarta Heiðmörk ...

Í Heiðmerkurskóginn skreppa vil
skána þá mín geðhvörf.
Öngvar leiðir eru þangað til
úrbóta nú er þörf.

Vagninn í Heiðmörk

Dr. Gylforce tekur undir með vagnverju þessari hvar gaman væri nú að fá vagnaleið upp í Heiðmörk að sumarlagi.

Hinn nakti raunveruleiki byggðasamlagsins segir doksa kallinum hinsvegar að slík leið sé ekki á teikniborðinu - & líklega ekki í bráð.

Enda þótt hugmyndin sé nýstárleg & góð er varla grundvöllur fyrir henni. Vonandi einhvern tíma síðar enda þyrfti nú ekki nema eina smárútu í verkefnið. 

Yfir&út!

Hver er þessi dr. Gylforce ...???

Fegurð & afl vagninn er
innst í hjarta mínu.
Feykir burtu fjandans her
færir oss Borgarlínu.

Í árdaga urðu menn þess varir í kópvægskri laut einni, kennda við Stúta, að kona var með barni. Liðu svo tímar & lagðist hún á gólf & fæddi sveinbarn; feitt & fráleitt frítt. Sveinn þessi var vatni ausinn & nefndur Gylforce; eða öllu heldur doktor Gylforce.

Mamma gamla mér þar gaut
meðan pápi hraut & hraut.
Vanti þig einn fúlan faut
finnurðu hann í Stútulaut. 

Dr.-inn varð snemma vörpulegur á velli, hreyfingarléttur & kvikull; mikill vexti en þó aumur að afli; mikið þótti hann undarlegur & fábreytinn í lund; snemma sýndi Gylforce-inn græðgi & girnd mikla þegar gúmmídekk fjögur voru annars vegar, en talaði hann þó tepru- & tilgerðarlega & héldu flestir hann vitlítinn vera.

Doktorinn á vagnavakt
vellíðan þá streymir.
Á þá horfir með andakt
& amstri dagsins gleymir.