Boðsferð fyrir börnin ...

Borgarferð, betra verð
boðsferð sem rokkar!
Annálsverð, unaðsferð
eykur velferð okkar.

Byggðasamlagið Strætó er heldur betur í stuði yfir hásumarið, hvar þeir bjóða í júlímánuði upp á spennandi tilboð fyrir fjölskylduna. Maður lifandi!

Börn, sem eru 17 ára og yngri & í fylgd með forsjáraðila, fá frítt í strætó á höfuðborgarsvæðinu í júlí. Takk fyrir túkall!

Hinn fullorðni skal framvísa gildu fargjaldi, eins & strætókorti, appi, farmiðum eða pening og börnin sem eru í fylgd þeirra fá að ferðast frítt með.

Vá, geggjað! Strætó - besta leiðin!

 

Blessaður, blíði vagn ...

Kom blíðmáll, þú blíði vagn
blessaður sé þinn hringur.
Megi þú ávallt gera gagn
á götunni þú syngur.

Hinn ungi & aldni vagnverji herjuðu á vini vora - vagnana - í brakandi blíðu gærdagsins - hvar þeir þrömmuðu í þrjár eðalleiðir á höfuðborgarsvæðinu. Maður lifandi.

Feðgarnir fóru á fjörurnar við leið þrettán en ár & dagur er síðan doksi kallinn hefir komist í kynni við leiðina þá. Ó, já. 

Það gladdi hró hans hve vel vagnstjóranum á hinni þrettándu leið tókst að halda áætlun. Hinn ungi & aldni höpðu gengið um stund & reynt við rafskútur en sáu svá vagninn við Lönguhlíð & gengu inn. Nema hvað.

Næst var á dagskrá að einhenda sér & arka inn í ellefuna & halda rakleitt í Mjódd okkar Breiðhyltinga, hvar vér feðgar tókum lengri leiðina með fjarkanum alla leið í fegursta Stútulautarselið í seljahverfinu. En ekki hvað???

Yfir&út!

Hlutafélag um Borgarlínu ...

Fyrr í kvöld bárust gleðileg tíðindi frá Austurvelli, hvar alþingismenn samþykktu samgönguáætlun til næstu 15 ára fyrir litla 120 milljarða. Maður lifandi!

Inn í þessu eru lög sem heimila ríkinu að stofna hlutafélag með sveitarfélögunum sex á höfuðborgarsvæðinu um Borgarlínuna. 

Um línu þessa eru afar skiptar skoðanir & hægt að lesa um það út um allt í netinu. Eðlilega eru alls konar sjónarmið á lopti enda rándýr framkvæmd hér á ferðinni sem mun aðeins að hámarki ná um 12%-15% af heildarferðum á höfuðborgarsvæðinu ásamt Strætó.

Stefnt er aukinheldur að því að gangandi, hjólandi, rafskútur o.þ.h. verði um 21% af ferðum & einkabíllinn - sem mörgum er svo annt um - verði um 65-67% af öllum ferðum en ekki 92% eins & staðan er núna.

Nú hefst fjármögnun verkefnisins af fullum krafti & verður fróðlegt að sjá hvernig þessi græna innviðaruppbygging kemur til með að falla í kramið hjá höfuðborgarbúum.

Dr. Gylforce bíður spenntur.

Loftslagsmál, aukin lífsgæði
losna fjölmörg bílastæði 
því Borgarlínan er bæði
til bóta & algjört æði!

Yfir&út!

Gott út á Granda ...

Gylforce-inn vill út að Granda
mjög gott með leiðum tveim. 
Vagnverjinn ungi með að vanda
Valdís er okkar geim.

Hinn ungi & aldni vagnverji gerðu sér góðan dag í vinum vorum - vögnunum - í brakandi blíðu hvar þeir héldu í afar góðan & skjótan rúnt út að Granda. Nema hvað.

Ferðin úr Mjódd að Granda er ákaflega góð & passa vagnarnir mjög vel saman. En ekki hvað???

Ef farið er með leið 3 úr Mjódd okkar Breiðhyltinga er aðeins um 1-2 minútna bið á Lækjartorgi eptir leið 14 sem heldur rakleitt út á Granda.

Ferðatíminn er aukinheldur ekki af verri endanum; aðeins rúmlega 20 mínútur í unaðsvögnum & ekki spillti fyrir að þeir feðgar skelltu sér á rafskútur & geystust um lendur Grandans á þessum mögnuðu tækjum.

Yfir&út!

 

Ljósmæðravagninn lostfagri ...

Um þig skal ég á dimmri nóttu dreyma
dásemd ertu, hvar sem er.
Þig skal ég, vagn, í vitum mínum geyma
því vel þú tekur á móti mér.

Árið 2020 er tileinkað ljósmæðrum og hjúkrunarfræðingum í tilefni af 200 ára afmælis Florence Nightengale.

Ljósmæðrafélag Íslands ákvað því að stökkva á eina góða auglýsingu á rafvagn sem er afar vel til fundið. Vagninn er fagur mjög & hefir aðallega verið í akstri á leið 18, frá Hlemmi að Spöng um Grafarvog og Grafarholt. Nema hvað.

Dr. Gylforce vonar að ná að klófesta rafvagn þennan við fyrsta hentugleika.

Yfir&út!

Við tökum vel á móti þér

Veiddur í nýtt leiðanet ...

Í leiðanet nýtt veiddur
nitján fámenn var.
Er Gaflarinn gersneyddur
& grunnhygginn afar?

Hinn gaumgæfni en fráleitt gatslitni dr. Gylforce gerði góða ferð suður í Fjörðinn á dögunum, hvar nýtt leiðanet þeirra Gaflara var rannsakað af fádæma natni & nákvæmni. Nema hvað.

Illu heilli virðast Gaflarar ekki átta sig á einfaldara & betra leiðaneti eins & sjá má því doksi kallinn mátti gera sér að góðu að gaufast aleinn í glænýrri leið 19. Hvað um það.

Nýjungin syðra er merkileg fyrir þær sakir að hún er fyrsta aðlögun Strætó bs. að væntanlegri Borgarlínu. Tvær meginleiðir hafa tekið við keflinu, leiðir 19 & 21, aukinheldur sem leið leiðanna, leið 1, & leið 55, er ekur suður í Leifsstöð, eru eigi langt undan.

Leið 19, Kaplakriki-Ásvallalaug, virkaði vel á dr.-inn & hlakkar hann til frekari ferða með leið þeirri en doksi kallinn á eptir að athuga leið 21 betur & halda með henni að hinu hafnfirska Háholti.

Yfir&út!

Borgarlínan í blönduðum akstri ...???

Í blönduðum akstri Borgarlína
sem brot af hennar leið.
Ég von´að það eigi að einblína
á að hún verði tvíbreið.

Enda þótt Borgarlínan sé kynnt sem tíðar, umhverfisvænar almenningssamgöngur akandi um á sérrýmum er það ekki alveg svo. Illu heilli.

Á umtalsverðum kafla, brotalínunni á myndinni, mun Borgarlínan koma til með að aka í hinni hefðbundnu umferð. Aukinheldur mun línan koma til með að gera slíkt t.d. í aðra áttina á Borgarholtsbrautinni í Kópavogi þrátt fyrir að myndin sýni annað. Hvað um það.

Á sýningunni er jafnframt talað um að Borgarlínan verði á sjö mínútna fresti. Verður það svo á öllum leiðum alla daga??? Ennfremur er sums staðar rætt & ritað um tveggja mínútna tíðni. Vonandi er það á rökum reist vegna þess að í langflestum ferðavenjukönnunum sem gerðar hafa verið á vegum Strætó bs. setur fólk mikið út á ferðatímann & finnst hann of langur í núverandi kerfi. Hvað um það.

Ferðatímann þarf að stytta til muna & er hinn lostafagra Borgarlína meðal annars hugsuð til þess.

Yfir&út! 

Mikilfengleg sýning í miðbænum ...

Um Borgarlínu bloggað skal
er bætir allt aðgengi.
Falleg sýning í góðum sal
sit ég þar æðilengi.

Óhætt er að fullyrða að sýning sú sem nú er senn á enda í Ráðhúsi Reykjavíkur sé ein sú albesta sem dr. Gylforce hefur nokkurn tíma auga litið á. Maður lifandi!

Sýningin "Næsta stopp" sýnir fyrirhugaða Borgarlínu á afar skýran & einfaldan hátt. Eiga aðstandendur sýningarinnar miklar þakkir skildar fyrir þessa framsetningu. 

Eins & gefur að skilja hefir dr. Gylforce verið þarna líkt & eilífur augnakarl. Hann hefir notið þess hvarvetna í hvívetna að hafa samgönguverkfræðing sér við hlið & geta spurt hann spjörunum úr. En ekki hvað???

Sýningunni lýkur á miðvikudagskvöldið. Dr.-inn hvetur  vagnverja til að rölta inn í Ráðhúsið & sjá þessa mikilfenglegu sýningu en næstu daga mun doksi kallinn efalítið blogga meir um þessa samgöngubyltingu sem er innan seilingar. Nema hvað.

Yfir&út! 

Stafræn strætóskýli ...

Bljúgur lagðist á bæn
bað & vildi fá
strætóskýli stafræn
með stórum skjá.

Fyrir tæpum tveimur vikum var rauntímaupplýsingum hleypt af stokkunum í nýjum stafrænum strætóskýlum.

Um 56 slík skýli hafa verið sett upp & er áætlað að þau verði um 100 talsins í árslok.

Loksins höfum vér vagnverjar fengið þessar upplýsingar í skýlin eins & hefir verið í mörg ár í nágrannalöndum okkar. 
Vitaskuld verða þessar upplýsingar tiltækar í stoppistöðvum hjá væntanlegri Borgarlínu. 

En ekki hvað???

Upplýsingar þessar eru fagnaðarefni & aukinheldur er stefnt að því að vér vagnverjar getum séð þær líka í strætóappinu. Góðu heilli.

Þetta er allt að koma!

Yfir&út! 

Fækkun leiða í Firði ...

Fækkun leiða í Firði
fjandi opt hér rætt.
Víst er mikils virði
vagnakerfi bætt.

Nýtt leiðanet í Firði

Næstkomandi sunnudag verður leiðakerfinu breytt suður í Firði en það ku vera löngu tímabært. En ekki hvað???

Of margar leiðir eru þar í gangi nú um stundir & verður kærkomið að leggja niður urmul þeirra & búa til eina nýja (leið 19) aukinheldur að skeyta öðrum við leið sem fyrir er (leið 21).

Hvað um það. Dr. Gylforce hlakkar mikið til að einhenta sér í Fjörðinn næsta hvíldardag & mun ekki una sér hvíldar fyrr en hann hefir farið ferð með endurvakinni leið 19.

Maður lifandi!!!