Lúalegt á leið ...

Í kuldanum mig klæddi
kúldraðist inn í vagn.
Í lítinn rúnt mér læddi
er lofaði bölv & ragn.

Dr. Gylforce átti skyndilega örfáar mínútur aflögu þennan laugardag sem efalítið var til lukku. Dr.-inn var ekki lengi að einhenda sér á leið meðan tími gafst til & valhoppaði hinn vel klæddi vagnverji að Mjódd okkar Breiðhyltinga.

Dr.-inn settist í eðal Iveco Crossway vagn en brá fljótt í brún. Vagnstjórinn hapði útvarpsstöð eina úr Þverholtinu í botni hvar fúkyrðaflaumurinn & hatursorðræðan í garð innflytjenda, hælisleitenda & flóttamanna hreinlega vall út úr viðtækinu.

Dr.-inn meikaði þetta vitaskuld ekki & ýtti þéttingsfast en þó fimlega & umfram allt tímanlega á stanz rofann & hoppaði í næsta vagn. Þar var öngvin útvarpsstöð í gangi & bara hugarró & huggulegheit.

Maður lifandi!

Fönn í fönn ...???

Í fönninni nú ferðir
fara nokkuð hægt.
Vagnanna glæstu gerðir
gerir fólk ánægt.

Illu heilli er dr. Gylforce vant við látinn hvað vini vora - vagnanna - áhrærir þennan annars ágæta frjádag. Nema hvað.

Ætla má að erfitt gæti reynzt fyrir þessa geðþekku vini vagnverjanna að halda áætlun í fannferginu þótt það sé nú minna en áætlanir gerðu ráð fyrir.

Vonandi ná vagnverjar nær & fjær að komast leiðar sinnar. Maður lifandi!

 

Vagnverji með vagnverju ...

Með mér hérna er fagurt fljóð
í fögrum vagni skeiðum.
Fær hún öll mín fegurstu ljóð
& ferðir með eðalleiðum.

Hinn ástsæli & unaðsfulli dr. Gylforce sveif heldur betur skýjum ofar í vagnaferð sinni um síðastliðna helgi, hvar honum tókst að taka íðilfagra & yndislega vagnverju með sér í vagnana. Maður lifandi!

Dr. Gylforce bauð þessari elsku með sér í eðal Iveco Crossway vagn á leið 3 & hlakkar ósegjanlega mikið til að fara með henni urmul ferða í hinum eina sanna unaði, rafvögnunum. 

Það verður eitthvað!

Yfir&út!

Húmið & albúmið ...

Upp stóð frá albúminu
inn í næstu leið.
Hugljúft var í húminu
huggulegur beið.

Hinn tónelski en fráleitt taktfasti dr. Gylforce tók sér tak, lagði frá sér plötualbúmið & hélt á vit vagna á frjádagskveldinu. Nema hvað.

Leikur einn, sem er nú doksa kallinum lítt að skapi, gerði vart við sig er ku kallast óróleikinn.

Dr. Gylforce vissi vart hvurt skyldi halda né hvar skyldi áð að þessu sinni. Hann rifjaði upp húsgang einn er hann lærði í æsku:

Í strætónum ég staðar nem
stari, spyr & svara
veit þó eigi hvaðan ég kem
né hvert ég er að fara.

Góðu heilli rambaði dr.-inn á rafvagn númer 107 á leið 4 & málið var algerlega dautt.

Vonandi hafa rafvagnarnir 14 úr Austurvegi reynst það vel að Strætó bs. hugi að frekari kaupum á þessum hljóðlátu & umhverfisvænu fákum.

Yfir&út!

Friður & ferðir ...

Gott er í ferðum að fá
frið, ró & næði.
Sænska Ikea starði á 
senn ég inn mér læði. 

Hinn heppni & hentugi dr. Gylforce hugði á ferðir á hinum huggulega fimmtudegi sem var jú í gær. Nema hvað.

Dr. Gylforce á sér einn unaðs- & uppáhaldshring meðal vina sinna, vagnanna. Ferð þessi hepst í Mjódd & endar í Firðinum, hvar leiðir 21, 1 & 4 koma við sögu. En ekki hvað???

Dr.-inn á það til að einhenta sér í leið 21 við Mjódd okkar Breiðhyltinga. Leið þessi er í nokkurri sókn en hún líður ljúflega í gegnum Smáralind, framhjá Vífilsstöðum, Kauptúni & endar lox suður í Firði.

Frá Firðinum var indælt að upplifa unaðinn í tíu mínútna tíðni leið leiðanna, leiðar 1. Doksi kallinn var meðal urmul vagnverja á leið þeirra í mjúkum Iveco vagni hvar hann áði svá við Hamraborg þeirra Kópvæginga. 

Til þess að gera líkt & Rambó karlinn - loka hringnum - tók dr. Gylforce leið 4 frá hinni háu & fögru Hamraborg & hélt með henni rakleitt að Mjóddinni.

Herlegheit þessi tóku um eina klukkustund sem getur verið ljómandi fínt ef lítill tími reynist til aflögu til þess að njóta unaðarins.

Yfir&út!


 

Vagnar á leið ... í verkfall!

Seinir vagnar verða
vilja ei gjald.
Fyrirtækin serða
fá þau gult spjald.

Vagnar á leið í verkfall :(
 
Verkföll Eflingar vofa yfir oss vagnverjum eins & sænskættaður eðalvagn sem hefir hvorki dekk né drif. Hvað um það.

Í mars munu vagnarnir á ákveðnum leiðum stoppa kl. 16 & bíða í 5 mínútur á þeirri stoppistöð sem vagninn verður á. Mun þetta raska hinu lostfagra leiðakerfa & væntanlega koma sér illa fyrir vagnverja. 

Þá ætla vagnstjórar ekki að sinna fargjöldunum & því er líklegt að nokkuð tekjutjón verði hjá Strætó bs. meðan á þessu stendur.

Í aprílmánuði hyggjast svo vagnstjórar leggja niður störf frá klukkan 7 til 9 og aftur frá 16 til 18. Mun það verða afar bagalegt fyrir oss vagnverja.

Það eru því viðsjárverðir tímar framundan - maður lifandi!

Auraútlát hjá Oddeyringum ...???

Oddeyringa óreiða
afar dapurt kerfi.
Í glæsta munu greiða
gjald í sín hverfi.

Gjald í vagna nyrðra???

Forkólfar leiðakerfisins nyrðra standa frammi fyrir áleitnum spurningunum þessi misserin. Ljóst er að leiðakerfið í höfuðstað Norðurlands þarf að bæta enda hefir dr. Gylforce verið tíðrætt um t.d. hví öngvin vagn gangi hvorki að flugvellinum né Hömrum. Hvað um það. 

Aukinheldur er leiðakerfið afar bágborið á kvöldin & um helgar. Má með nokkru sanni segja að nyrðra sannist hið fornkveðna að ef frítt er í strætó verður leiðakerfið aldrei gott. Margir kalla eptir því að gjaldfrjálst verði í vagnana á höfuðborgarsvæðinu en doksi kallinn er ekki hrifinn af því. Nema hvað.

Betra er að treysta á hóflega gjaldtöku vagnverja sem aptur geta þá gert kröfu um að fá almennilegt almenningssamgöngukerfi í staðinn.

Amen.

Prótest & piparúði ...

Prótestarar á pappakössum
með piparúð´ á kinn.
Á veginum var fullt af rössum
komst vagninn hringinn sinn?

Mótmæli eru eðlilegur hluti í lýðræðissamfélagi & ber að virða rétt fólks til þeirra. 

En plís, nenniði að hætta að mótmæla við Hlemm & leyfa vögnunum að halda áætlun???


Mynd: Visir/Vilhelm

Fok á ferð ...

Vagninn af veginum fauk
verjarnir geðþekku.
Draumarúnti þeirra lauk
í Draugahlíðabrekku.

Fok austur fyrir fjall

Leið 51 lenti í kröppum dansi í kvöld, hvar sá bláguli fauk af veginum í fárviðrinu sem nú geisar á Suðurlandi. Maður lifandi.

Góðu heilli virðist öngvin hafa slasast í ferð þessari & fengu vagnverjar far með einkabílum austur fyrir fjall & gátu komist leiðar sinnar.

Vagninn verður svá sóttur á morgun er veður lægir.

Yfir&út!




Myndir: visir.is

Svartur dagur í Svíaríki ...

Þarf að fá þá framselda
er framkvæma slíkt.
Að gjöra unað alelda
- algerlega sýkt.  

Unaðurinn alelda :(

Svartur dagur í Svíaríki, hvar liðvagn einn fuðraði upp í höfuðborginni & brann til kaldra kola. Góðu heilli var aðeins vagnstjórinn í vagninum & er hann ekki illa slasaður. Maður lifandi!

Vonandi er hér ekki um hryðjuverk að ræða en allar líkur eru á að svo sé reyndar ekki.

En ef ... þá verður dr.-inn brjálaður. Algerlega.

...