Samtal við samlag ...

Byggðasamlag samtal vill
sem hlýða á vér verðum.
Leiðakerfi sem lykill
að liðlegum ferðum.

Fundur með Strætó

Byggðasamlagið Strætó efnir til opins fundar um málefni strætós við oss vagnverja & alla þá sem hafa áhuga á málefnum er snýr að vögnunum, vinum vorum.

Þessi fundur er fagnaðarefni en hann verður haldinn í höfuðstöðvum Strætós að Þönglabakka fimmtudaginn 28. mars kl. 17:30.

Skyldumæting - allavega fyrir dr.-inn, maður lifandi! 

Bílahvíl ...

Sól, logn & mengunarlopt
leikur oss nú grátt.
Á næstunni atvikast opt
ef við gerum fátt.

Svifrykssvívirða

Svifrykið lætur nú á sér kræla á höfuðborgarsvæðinu & eru allir hvattir til þess að hvíla einkabílinn sinn & halda á vit unaðsferða meðal vagnanna. Nema hvað.

Illu heilli tókst dr.-num nú ekki að taka vagninn í morgun; karleplið svaf yfir sig & varð að notast við óvininn ógurlega, einkabílinn.

Doksi kallinn reyndi að lágmarka akstur & vonar að þetta komi ekki aptur fyrir í bráð. Maður lifandi.

Lúrt á leið ...

Í bössinum ég tók mér blund
bærilegan lúr.
Genginn næstum á feðra fund
í fínasta túr.

Líkt & endranær beið dr. Gylforce öngvra boða eptir að hafa fullmettað ungviðið af vizku & vísdóm í mennta- & menningarsetrinu við Kársnes & hélt á vit vagna. En ekki hvað???

Eitthvað hafa nú ungmennin sogað orkuna úr doksa kallinum, hvar hann var varla kominn inn í leið 3 við Mjódd okkar Breiðhyltinga er hann steinsofnaði!

Eptir góðan hring (eða hringi!) í unaðs Iveco Crossway vagni númer 157 rankaði dr.-inn úr rotinu rétt við Mjóddina, staulaðist út úr vagninum & líklega búinn að fara niður í bæ & aptur til baka!

Vesen fyrir vagnverja ...

Hjá verktökum eru verkföll senn
verjarnir lenda í klípu.
Verkalýðurinn & valdsmenn
verð´að fá sér friðarpípu.

Verkföll og vesen fyrir vagnverja

Hinn vergjarni en þó varkári dr. Gylforce líst lítt á boðuð verkföll, hvar það mun koma niður á unaðsferðum með vinum vorum, vögnunum. Nema hvað.

Ekki munu þó allar leiðir lognast út af. Einungis verktakar hjá Strætó eru á leið í skæruverkföll en þeir sjá um ca. 50% af öllum akstri á höfuðborgarsvæðinu. Hvað um það.

Til að mynda verður ekki feitan gölt að flá meðal hverfaleiða hjá Strætó ef af verkfalli verður. Leiðanúmer 21-44 munu verða fyrir barðinu á vinnudeilunni aukinheldur sem leiðir 11-17 koma til með að lenda í kröppum dansi.

Vonandi ná samningsaðilar að fá sér vöfflur í Karphúsinu svo ekki komi til þessara aðgerða. Hinsvegar eru nú ekki miklar líkur á því - maður lifandi!

Mislitt á leið ...

Í sælunni suðurfrá
sæmilegar leiðir.
Mislita minz þar sá
sem misskilning útbreiðir.

Hinn sólbrenndi & sótsvarti dr. Gylforce hefir nú séð betra strætókerfi en í Orlando borg. Maður lifandi!

Í borginni voru um 34 strætisvagnaleiðir en illu heilli náði doksi kallinn aðeins að komast í kynni við tvær þeirra, leiðir 8 & 42. Stakt fargjald var um 2 dollarar eða um 240 krónur. Vitaskuld var hægt að kaupa dagskort, 7 daga kort og 30 dagakort en dr.-inn hapði öngvin not fyrir þau þarna.

Tíðnin á leiðum 8 & 42 var svona ca. um 15-30 mínútur. Leið 8 var ágæt, brunaði um borgina þvera & endilanga & fór meðal annars að stórri verslunarmiðstöð sem kollegum doksa leiddist nú ekki.

Aukinheldur var sérstakt að alls konar litir geta verið á hverri leið. Þannig fór doksi kallinn í grænleita áttu, fjólubláa & eina gráa! Það er nokkuð svalt að gjöra þetta en heldur ruglingslegt fyrir nýjan & áttavilltan vagnverja eins & doktorinn! Hvað um það.

Dr.-inn sat í leið 8 töluvert en í hvert sinn sem hann ætlaði út, fara yfir götuna & taka leiðina tilbaka blasti við honum það sem sjá má á myndinni hér neðst.

Bílar. Akreinar. Fleiri bílar. Fleiri akreinar. Orlando stendur greinilega undir nafni sem bílaborg þótt hún sé nú ekki með þeim verstu þar vestra.

Yfir&út!

Flórídaferð!

Held nú í Flórídaferð
fokking olræt!
Bus-ar þar af bestu gerð
& but light.

Hinn útitekni & affæragóði dr. Gylforce ku alsæll vera þessa dagana hvar hann hyggur á vagnarannsóknir í henni Ameríku næstu daga.  Maður lifandi!

Dr. Gylforce ber niður í Orlando í Flórída að þessu sinni & verður fróðlegt mjög að sjá í landi einkabílsins hvurnig almenningssamgöngum reiðir þar af.

Spenna! 

Spánnýir ávallt spennandi ...

Með raunir mínar rogast
rata inn í vin.
Að spánnýjum ég sogast
sit þar auðfundinn.

Hinn gæfi en guðhræddi dr. Gylforce gekk til vina sinna - vagnanna - hvar hann hapði eigi hug á því að horfa á júrakeppnina á Rúv líkt & þorri vagnverja. Nema hvað.

Eptir góðan en stuttan rúnt með leið 4 sá doksi kallinn einn spánnýjan vagn á leið 11 í Mjóddinni sem ættaður er sunnan úr Firði. Málið var steindautt.

Inn vildi dr.-inn.

Dr. Gylforce sté stoltur inn í glænýjan & glæstan 221 Iveco Crossway á leið 11 við Mjóddina. Það eimir enn af nýju lyktinni inn í honum sem einkennir nýjar sjálfrennireiðar. Maður lifandi!

Dr.-inn hélt mjúkur & meyr með vagninum alla leið að Þjóðleikhúsinu hvar hann ákvað þar að skella sér í leið 13 en á leið þeirri eru líka nýir vagnar. Unaður.

Aukinheldur sást einn rafvagn á vaktinni á leið 4, 168 Yutong úr Austurvegi, en illu heilli náði dr.-inn ekki eiga unaðsþrásetu með honum að þessu sinni.

Yfir&út!

 

Samgönguráðherra stórhuga ...

Almenningssamgöngur fyrir landið allt

Það er óhætt að segja að ánægjuleg tíðindi berist úr ranni stjórnsýslunnar þessa dagana hvað almenningssamgöngur varðar.

Ráðherra málaflokksins, Sigurður Ingi, kynnti á dögunum að í bígerð sé að samræma allar almenningssamgöngur í landinu og setja á stofn einn samræmdan upplýsingavef. Það yrði afskaplega kærkomið fyrir vagnverja, flugverja & sæfarendur, maður lifandi.

Þá er aukinheldur stefnt að því að hafa fimm stærri skiptistöðvar á landinu þar sem huga þarf að skipulagningu á samgöngumiðstöðvum. Þær yrðu á höfuðborgarsvæðinu, Borgarnesi, Akureyri, Egilsstöðum og Selfossi. Sjö minni skiptistöðvar kæmu einnig til að vera í kerfinu fyrir afmarkaðri svæði.

Dr. Gylforce á eptir að skoða til hlítar stefnu þessa í samráðsgátt stjórnvalda en það sem komið er, líst honum afar vel á. 

Vitaskuld er skrýtið að árið 2019 sé enn verið að vinna að stefnu eins & þessari en eigi að síður vel gert hjá samgönguráðherranum og ráðuneyti hans.

Samgönguráðherra sýnir dug
sá mun verja kæta.
Allir vagnar, ferjur & flug
ferðalög munu bæta.

Hingað ég leita ...

Hingað ég leita & hér ég dvel
í hlýjum sætum þínum.
Glaður ég þér mína forsjá fel
með fallegum ljóðlínum.

Leiðakerfið úr skorðum ...

Kerfið út úr korti
kemur ei mín leið.
Paufast í þessu porti
pungsveittur ég beið.

Hinn glaði en guðhræddi dr. Gylforce fór ekki varhluta af seinkunum í hinu lostfagra leiðakerfi Strætós í gær, hvar hann þurfti að bíða lon & don í Mjóddinni. Nema hvað.

Dr. Gylforce var aldrei þess vant vopnaður snúru úr síma sínum, hvar hann langaði að nýta sér plöggin í rafvögnunum. Doksi kallinn sá aukinheldur að rafvagnarnir voru venju samkvæmt á leiðum 3 & 4 & vildi þar inn. Því beið hann & beið. & beið & beið. Öngvir komu vagnarnir enda háannatími & færð á vígvöllum veganna með heldur lakara móti. Hvað um það.

Dr.-inn þraut svá öreindið & tók einn af gömlu Citelisvögnunum á leið 2 & Karosa á leið 4 tilbaka frá Hamraborg. Ekki það sem til stóð en það gengur bara betur næst.