Fernd í grennd ...

Hinn fórnfæri & forkunnarfagri dr. Gylforce var nokk frekur til fjörsins í gær hvar hann tók sína alþekktu fernd. Nema hvað.

Í tímaþröng er gott að skáskjóta sér í aðeins fjórar ferðir meðal vinanna, vagnanna. En ekki hvað???

Dr.-inn tók hús á leið 35 & fékk sænskættaðan 302 Volvovagn að þessu sinni. Hinn engilsaxneski MAN 305 vagn fékk hvíldina góðu & var vel að henni komin. Doksi sat ekki lengi í þeim sænskættaða hvar hann hóaði svá í leið 4 við Efstahjalla. 

Eystur í Efstahjalla er ágætistenging á annatíma við leið 4 til þess að halda í Mjódd þeirra Breiðhyltinga.

Við Þönglabakkann var urmull vagna & leiða en dr.-inn varð illu heilli að halda rakleitt í mennta- & menningarsetrið við Kársnes & Kastala.

Doksi kallinn sté því inn í leið 4 áleiðis í Hamraborg & fékk í bæði skiptin hina glæstu & glænýju Crossway vagna sem reyndar eiga eins árs afmæli um jólin. Hvað um það.

Að lúkningu tyllti dr. Gylforce sér aptur í leið 35 í Hamraborg okkar Kópvæginga & var þá hinn engilsaxneski & funheiti MAN 305 vagn kominn á vígvelli veganna.

Doktorsins dálæti
drottinn & faðir.
Blótið hans & blæti
bus-ar gulnaðir. 

Eymd á Eyri ...

Hinn fjölfarni & firnasterki dr. Gylforce finnst nú meira matur en feitt kjöt & brá sér því af bæ & heimsótti Norðlendingafjórðung enn á ný. Telst honum svá til að þetta sé hans fjórða heimsókn nyrðra. Nema hvað.

Eyfirðingar hafa þann háttinn á hvað vagna varðar að bjóða oss vagnverjum upp á ferðir án greiðslu. Í fyrstu vakti það góða tilfinningu hjá hinum hávelborna dr. Gylforce hvar það er ávallt hagstæðara að borga með glöðu geði en peningum. Já, gott ef hinn síungi & glottandi sjónvarpsmaður syðra, Gísli Marteinn, var ekki aukinheldur gefinn fyrir þessar hugmyndir. Frítt í vagna - upp til agna.

Dr. Gylforce sté á Oddeyri þeirra norðanmanna eins fljótt & auðið var & vildi í vagna. En ekki hvað???

Á þeim sex árum síðan doksi fór fyrst í hina hlandgulu vagna norðan heiða hefir lítið breyst. Því miður. Til að mynda gengur öngvin leið enn að flugvellinum sem er alltaf jafn skrýtið. Hvað um það.

Eymdarlegt á Eyri
aum frammistaða.
Vantar ferðir fleiri
fyrir oss blessaða.

Um helgar sigla vagnverjar fráleitt á sælum sel frá vagnaferðum sínum. Einvörðungu ein leið með einum vagni er á ferð. Það er leið 3 & fer hún aðeins sex ferðir; byrjar laust eptir hádegið & hættir rétt rúmlega hálfsjö um kvöldið. Það var því fátt um fína drætti hjá doktornum nyrðra hvar hann dvaldi þar einmitt um helgina.

Það litla sem gladdi Gylforce-inn var hinn þýskættaði vagn á vaktinni; Mercedes Benz Citaro sem er þó aðeins kominn til ára sinna. 

Opt er þetta einkennandi á "ókeypis" almenningsþjónustu. Hún er augljóslega ódýr en að sama skapi léleg.

Vonandi gyrða Norðlendingar sig í brók því greiðfær er glötunarleiðin & glöggt er jú Gylforce´s augað.

Yfir&út!

 

Í strætónum ég staðar nem
stari, spyr & svara
veit þó eigi hvaðan ég kem
né hvert ég er að fara.

Langur & ljúfur Mercedes ...

Hinn djæfi & drottnandi doktor Gylforce hló dátt í gær hvar hann komst loksins í langan & ljómandi góðan Mercedes Benz vagn á leið 55. Nema hvað.

Dr.-inn lék sín stef í hinum kópvægska Vogi hvar hann síðan áði við Fjörð þeirra Gaflara. Þar beið hans lofandi langur 3ja hásinga MB vagn á leið 55. Hann var reyndar á leið til Reykjavíkur en ekki að Leifsstöð. Hvað um það. Inn vildi dr.-inn.

Það voru fáir í vagninum að þessu sinni. Það er að mörgu leyti skiljanlegt svona á miðjum degi. Leið 55 fer þrettán ferðir frá Leifsstöð að Firði virka daga. Níu af þessum þrettán eðalferðum enda svo í Reykjavík hvar vagninn ekur um Háskóla Íslands & nemur staðar við Umferðarmiðstöðina. 

Skemmst er frá því að segja að þetta var sannkallaður unaðsrúntur frá Firði að Umferðarmiðstöðinni. Það er öruggt að doksi kallinn mun prófa þetta aptur - maður lifandi!
 

Í vagninum ég friðinn finn
fer með honum víða.
Þar ég sit með símann minn
síðan dett ég í'ða.

Annar villuráfandi ...

Hinn þrýstni & þungvægi dr. Gylforce er í þungum þönkum eptir skrautlega ferð með leið 35 í gær. Í annað sinn á þessu ári upplifir dr.-inn vagnstjóra á leið 35 sem þekkir ekki leiðina & lendir í vandræðum. Maður lifandi.

Tveir strætisvagnar aka leið 35 á annatíma. Annar þeirra er frá Kynnisferðum. Þar á bæ þekkja vagnstjórarnir leiðina en nokkrum þeirra er ómögulegt að fylgja tímaáætluninni. Hvað um það.

Seinni vagninn kemur frá Strætó bs. Þar hefjast vandræðin því byggðasamlagið virðist senda menn út á örkina sem vita ekkert hvert þeir eru að fara. Ef Gylforce-inn hepði ekki verið í 156 vagninum sem fór frá Hamraborg kl. 15:52 er ekki gott að segja hvernig hepði farið.

Vagninn ók Nýbýlaveg & var kominn að Álfabrekku þegar dr. Gylforce tók eptir því að vagnstjórinn var í símanum. Doksi kallinn hugðist taka mynd af honum í símanum þegar hann tók líka eptir því að hann var á strætósíðunni að reyna að finna út úr því hvert hann ætti að fara! Aukinheldur hélt hann á möppu með mynd af leið 35. Það er ekki mjög traustvekjandi að sitja í strætisvagni & sjá vagnstjórann með símann í annarri hendinni & möppu í hinni!!!

Við Engihjalla stoppaði hann & þá sá dr.-inn að hann var alveg villtur. Hann fór því til hans & stóð við hlið hans alla leið & benti: "Beygja hægri, svo vinstri o.s.frv." Vagnstjórinn var greinilega af erlendu bergi brotinn & því hvorki kunnugur Voginum fagra né tungumálinu.

Augljóslega er þetta ekki boðlegt & hlýtur byggðasamlagið að tryggja að svona gerist ekki aptur. Bílstjórar með meirapróf eru eftirsóttir þessi dægrin & því kannski meiri starfsmannavelta á vagnstjórum en ella. Það breytir því ekki að það þarf að undirbúa mennina betur en þetta.


Villuráfandi vagnstjóri
var honum ekkert tjáð?
Þótt hann í kolli sér klóri
kunni hann öngvin ráð.

Sá þýski ...

Hinn göfugi & glitrandi dr. Gylforce hefir alltaf verið gagntekinn af hinum þýsku eðalvögnum sem eru illu heilli alltof fáir á vígvöllum veganna. 

Til þess að komast í tæri við þýska eðalmálminn - Mercedes Benz - þurfum vér vagnverjar að einhenda okkur inn í leið 11 á annatíma. Þar býður verktakinn suður í Firði upp á tvo þýska vagna, 222 & 223, sem forðum daga óku leið leiðanna, leið 1. Hvað um það.

Byggðasamlagið hefir á sínum snærum tvo þýska liðvagna, 170 & 171. Þeir eru aðeins aukavagnar á leið leiðanna (stundum á leið 6). Til stendur að festa fjár í fjórum liðvögnum á næsta ári sem að öllum líkindum verða í akstri á hinni fyrstu leið. Vonandi verða þeir af MB gerð.

Svo er vitaskuld hægt að taka leið 55 & komast þar í glæsilegan 3ja hásinga Mercedes Benz. Doksi hefir ekki komist í hann enn & vonast til þess að gera bragarbót á því á morgun.

Það verður magnað.

Nú skal byrja braginn á
Bensinum ríka.
Á þjóðvegunum þykir sá
þýður eins & p***.


Myndir: citybus.piwigo.com

Aukreitis yndið ...

Hinn snari en fráleitt snarbilaði dr. Gylforce hefir beint haukfráum augum sínum & rannsóknum að aukavögnum á leið 1 undanfarið.

Hin fyrsta leið, eða leið leiðanna eins & doksi kallar hana einatt, er fjölmennasta leiðin í leiðakerfinu. Nema hvað.

Nokkrir aukavagnar eru gerðir út af örkinni til að anna eptirspurn vagnverjanna & þá vitaskuld á annatíma. Þessir vagnar eru ekki af verri endanum; þýskur 3ja hásinga eðall (170-171), 3ja hásinga Volvo-vagnar (192-196) eða eini Scania Omnicity vagninn í flotanum (184 gamli). Maður lifandi.

Frá klukkan 14-16 er mikið um að vera hjá vögnunum & aka þeir einungis úr miðbænum í átt að Kópavogi. Vagnarnir hefja leik við Ráðhúsið & bruna svo upp í Hamraborg okkar Kópvæginga. Þar fara allir út & þeir sem ætla lengra skella sér í aðalvagninn á leið 1. 

Í sumum tilvikum dugar það ekki til & aðalvagninn verður að skilja vagnverja eptir í Hamraborginni. Það er ansi hvimleitt & vonast dr.-inn til þess að byggðasamlagið lengi ferð aukavagnanna suður í Garðabæ. Eða jafnvel lengra.

Það er fráleitt fyndið
fólkið er aumt
því aukreitis yndið
ekur of naumt.


Mynd: citybus.piwigo.com

Vagnabýsn ...

Hinn sefi & snari dr. Gylforce hefir tekið urmul vagna undanfarna daga hvar henn hefir ekki náð að festa slíkt hér á þessa unaðssíðu. Hvað um það.

Á laugardaginn hóaði Stútulautardoksi í vagna & áður en hann vissi af var hann kominn niður að henni Hörpu. Doksi hapði & unga vagnverjann sér til fulltingis sem er ávallt skemmtilegt.

Við Hörpu er aðeins eitt að gera; dobbeldekkerinn. Maður lifandi.

Hin fjórða ferð feðganna var unaðsleg með tveggja hæða rauðglóandi vagninum. Ferðir hans hafa verið framlengdar & mun hann ganga fram að gamlársdegi. Eiga þeir Kynnisferðarmenn miklar þakkir skildar fyrir þá ákvörðun.

Dr.-inn mælir hiklaust með ferð þessari & á ugglaust eptir að bjóða hinum unga aptur í góðan & rauðleitan hring.

Amen.


Doksi með fróðleiksfýsn
fer vagna á milli.
Rallandi í reiðinnar býsn
rósemd eða kvilli? 

Eðall á komandi ...

Hinn hótfyndni en fráleitt hótunargjarni dr. Gylforce hóf vagnarannsóknir sínar í gær um leið & hann kvaddi ungviðið hér við mennta- & menningarsetrið við Kársnes & Kastala. Nema hvað.

Hinn snipparalegi dr. Gylforce spókaði sig venju samkvæmt í leið 35. Doksi kallinn skemmti sér konunglega á hringleiðinni hvar hann svo sté út við hina bakkafullu Hjalla.

Dr. Gylforce sá glitta í Irisbus Karosa vagn á leið 24 við torg Smáranna & beið öngvra boða. Inn vildi dr.-inn.

Það gladdi hið gamla hró dr.´s hvar vagnstjórinn tímajafnaði vagninn grimmt & var vel meðvitaður um áætlun leiðarinnar. Þessu er ólíkt farið hjá þeim Kynnisferðarmönnum í Voginum sem virðast aka eptir sínum eigin hentugleika. Hvað um það.

Eptir góðan hring með leið 24 kom Gylforce-inn að Mjóddinni hvar hann lék fagurliga sín kunnuglegu stef til þess að komast í fegurstu laut jarðarinnar, Stútulautina.

Yndisvagnar síð & ár
eðall á komandi vetri.
Gylforce-inn græðir sár
& gerir heiminn betri.

Hættið þessu hangsi Kynnisferðir!!!

Hinn fráleitt pasturslitli & pestnæmi dr. Gylforce er nokk pirraður hvar hann hefir tekið þrásetu & langdvala með vinum vorum, vögnunum. Nema hvað.

Dr. Gylforce hefir einkum verið meðal félaga sinna á leið 35 hér í Voginum. Eins & kunnugt er er leiðin sú á hendi verktakans vestur á Kársnesi, Kynnisferða. Að þessu sinni virtist hinn funheiti & engilsaxneski 305 MAN vagn vera fjarri góðu gamni.

Stöðu hans tók hinn sænskættaði Volvovagn númer 301 & tók hringinn í gríð & erg. Það er orðið afar þreytandi hve illa vagnstjórum frá Kynnisferðum gengur að fara eptir tímaáætlun leiðar 35. Það er nánast hending ef vagninn leggur af stað 07 eða 37 mínútur yfir heilatímann. Til að mynda var doksi kallinn staddur í Hamraborg okkar Kópvæginga áðan. Vagnstjórinn var úti við í spjalli við kollegana. Hann álpaðist inn í vagninn klukkan 15:10 & lagði af stað mínútu síðar. Þá er hann orðinn heilum 4 mínútum of seinn!

Þetta er ólíðandi & ekkert annað fyrir dr.-inn að gera en að leggja inn kvörtun til Strætó bs. Að mati dr.´s er morgunljóst að byggðasamlagið þarf að efla innra eptirlit sitt til mikilla muna. Langt er um liðið síðan doksi sá síðast eptirlitsmann í vögnunum. Hvar eru þeir???

Þetta hangs verður að stöðva & setja vagnana - vini vora - af stað.

Að degi liðnum sólin sest
ég spái í aðgerðir.
Því við jú finnum flest
fíkn í vagnaferðir.

Að ánetjast neti ...

Tökum lagið með trompet
tjúttið má ei þagna.
Nú er komið þráðlaust net
í næstum alla vagna.

Byggðasamlagið Strætó heldur áfram að bæta þjónustuna við oss vagnverja & hefir nú skellt nettengingu í vagna sína. Haf fyrir þökk!

Reyndar er verktakinn vestur á Kársnesi, sem ekur leiðum 28 & 35, ekki kominn svo langt því ekki fann dr.-inn net í hinum funheita & engilsaxnesa 305 MAN vagni á leið 35 í gær. Vonandi verða verktakarnir ekki eftirbátar byggðasamlagsins.

Að mati dr.´s þarf nú Strætó bs. að hefjast handa við að setja upp betri merkingar, bæði í vögnunum & í biðskýlum. Byggðasamlagið þarf að halda áfram að festa vagna á ákveðnum leiðum & setja upp mynd af þeirri leið, öllum biðstöðvum & tengimöguleikum. 

Þá þarf að setja upp skilti í biðskýlum sem sýna hve langt er í vagninn. Vonandi koma þau á næstu misserum.

Koma svo byggðasamlag - þið getið þetta! 

http://www.straeto.is/um-straeto/frettir/nr/889