Fjarkinn færir ...

Unaðurinn ærir
inn í vagna vil.
Fjarkinn mig færir
frá - & líka til.

Hinn hugljúfi dr. Gylforce hefir lagt leið sína í vagnana í dag, hvar hann að þessu sinni tók aðeins eina leið, fjarkann. Merkilegt nokk!

Dr. Gylforce man tímana tvenna, eins & sjá má á grönum hans gráu, hvar yfirleitt ekki voru margir vagnverjar um borð í vögnunum á laugardagseftirmiðdögum svona fyrir 15-20 árum síðan. Nema hvað.

Nú er öldin önnur, góðu heilli. Dr. Gylforce var á þvælingi í leið 4 milli Mjóddar, Hamraborgar & Hlemmtorgs & ávallt var urmull vagnverja með í för. Wú-hú! 

Fjölmennasta ferðin var efalítið för doksa kallsins frá Mjódd upp í hverfi en þá var hvert sæti skipað. Sumsé, um 35 vagnverjar í vagninum & líf & fjör. 

Að því tilefni tók dr.-inn vitaskuld lengri hringinn á leið sinni í Stútulautarselið & verður því leið 3 að bíða betri tíma.

Unaður, alveg hreint.

Stútfull sexý sexa ...

Til veggja er vítt
við Hlemminn bíðum.
Allt pláss næstum nýtt
nálægt Hlíðum.

Hinn þrautseigi & nokk vel þenkjandi dr. Gylforce þaut af stað síðdegis & beið öngvra boða, hvar hann kom sér dægilega fyrir í leið 6 við Hlemmtorgið.

Leið 6 breytist í tíu mínútna tíðni klukkan tvö virka daga & var ferð doksa einmitt um það leytið. Doksi kallinn sat meðal fárra vagnverja í 180 Crossway vagninum er hann lagði úr vör við Hlemminn. Það átti þó eptir að breytast - maður lifandi!

Góðu heilli kom urmull verja inn í vagninn við Ráðhúsið, Háskóla Íslands, Landspítala & Hlíðarnar. Vagninn varð kjaftfullur þrátt fyrir þessa öru tíðni & silaðist áfram að Ártúninu, hvar loks heldur fækkaði.

Dr.-inn hélt ótrauður áfram með leið 6 & vildi taka hús á Grafvægingum. Sem & hann gerði.

Eptir góðan spöl & gæfuríkt spjall við Grafvæginga skáskaut dr. Gylforce sér inn í leið 24 við Spöngina & hélt að Mjódd okkar Breiðhyltinga. En ekki hvað???

Yfir&út!

Inn á Hlemm ...

Í eðal-ási inn á Hlemm
eta böku góða.
Með verjunum vera memm
í vagninum hljóða.

Hinn stórgóði en steigurláti dr. Gylforce var fljótur að stíga á stokk, hvar hann hóaði í leið leiðanna, leið 1, í Hamraborginni háu & fögru. Nema, nema hvað!

Dr. Gylforce fékk sér til fulltingis vagn sem kominn er á sjötta ár, Iveco Crossway & skundaði með honum ásamt 10 vagnverjum um hádegisbilið alla leið að Hlemmi. En ekki hvað???
Við hið huggulega Hlemmtorg var ys & þys; vagnverjar í leit að vögnum, matverjar inn í Mathöll & túristar að láta taka sig í bakaríið inn í 10-11. Hvað um það.

Dr. Gylforce skeytti því öngvu heldur hoppaði hnarreistur & sannkristinn inn í tvistinn & hélt sína leið að Hamraborg þeirra Kópvæginga. 

Amen.

Langholt á laugardegi ...

Á laugardegi er ljúfur
langar að magna seið.
Held af stað með húfu
& haska mér á leið.

Hinn vel lukkaði & lostfengni dr. Gylforce hefir leiðst heldur, hvar leiðavalið hefir verið heldur einhæft hjá honum undanfarna daga. 

Doksi kallinn hefur skottast milli leiða 3 & 4 & svá vagnana í Voginum fagra. Dr.-inn einhenti sér því í leið 14 við Verzlunarskólann í gær (tók reyndar leið 4 að Kringlu) & hugðist labba um lendur við Langholtið. En ekki hvað???

Dr. Gylforce fýsti í flunkunýju vagnana (Iveco) en varð að gera sér að góðu Hollendinginn bilandi (VDL-vagnana). Fyrstur þar var 312 vagninn sem átti að leggja af stað kl. 16:45 frá Verzló.

& það gerði hann - maður lifandi!

Vagnstjórinn rykkti af stað & ók sem óður væri að Menntaskólanum við Sund. Hann fór yfirleitt yfir á rauðu ljósi á Grensásveginum enda var hann 3 mínútum á undan áætlun.

Við MS virtist vagnstjórinn ætla að jafna tímann en brunaði svo enn of snemma af stað. Doksi kallinn fékk nóg af þessu & hoppaði út á Langholtsveginum.

Þar sá dr.-inn í fyrsta sinn flott skilti á staur af Mótmælanda Íslands, Helga Hóseassyni. Það er vel við hæfi enda stóð hann þarna rétt hjá í mörg ár með sín skrautlegu skilti. Hvað um það.

Dr.-inn spásseraði um Langholtið um stund en hóaði svá í 306 VDL-vagninn á leið 14 sem færði hann á Hlemm með mun rólegri hætti en sá fyrri. 

Við Hlemmtorg lék dr.-inn kunnuglegt stef & hélt með þristinum í átt að Stútulautarseli sínu.

Amen.

Drullusvekktur doksi ...

Dr. Gylforce þaut vitaskuld til vina sinna - vagnanna - á hinum þjakaða þjáningardegi sem var í gær. Nema hvað.

Dr.-inn gerði sér far með leið 4 neðan úr sel & laut, líkt & vera ber, & áði við Hamraborg þeirra Kópvæginga.

Meðal kópvægskra vagna gaf að líta hinn spánnýja & spennandi 347 Iveco Crossway vagn. Hann er einn þessara tíu nýju vagna sem eru frá verktakanum inn við sundin.

Þetta var ekki spurning; inn vill dr.-inn!

Hinn glænýi & gagntakandi vagn var á leið 28 & arkaði doksi kallinn inn fullur eftirvæntingar. Dr.-inn tyllti sér tignarlega & fann að enn eimir af þessari yndislegu lykt sem einkennir nýja eðalvagna.

En þá gerðist það. Dr.-inn sá hryllinginn. Sætisbökin voru nánast flest öll haugskítug!

Hvernig má það vera í þriggja vikna gömlum vagni???

Skítur í vagni, er ei skemmt
skjótt um hann ég hnýt.
Finnst þetta vera fullsnemmt
fyrir drulluskít.

Ágætis upplýsingatöflur ...

Byggðasamlag bætir sig
með mun betri skiltum.
Rafrænar töflur vil einnig
með rosa stöfum gylltum.

Byggðasamlagið Strætó heldur áfram að bæta merkingar til okkar vagnverja. Það er vel.

Í Mjódd okkar Breiðhyltinga - & sjálfsagt víðar - blasa við stór skilti þar sem viðkomandi leið stoppar & aðal stoppistöðvar þeirrar leiðar eru tíundaðar.

Allt er þetta gott & blessað. En doksi kallinn hyggur að vagnverja sé farið að lengja eptir rafrænum upplýsingatöflum sem sýna hve langt er í næsta vagn. Við erum jú kominn nokk á veg inn í 21. öldina - er það ekki???

Hve langt er í þær???

Blíðlátur bænadagur ...

Á bænadeg´er blíðlátur
bljúgur í vagna skríð.
Fæturna þvæ fálátur
fæ mér svo máltíð.

Hinn sannkristni & síkáti dr. Gylforce hefir vitaskuld setið þrásetur góðar í vinum vorum, vögnunum, þennan fallega & bjarta skír- & bænadag. Nema hvað.

Eins & Kristur forðum gjörði við lærisveina sína, hefir dr.-inn þrifið á sér tærnar & er reiðbúinn í máltíð sem vitaskuld var í námunda við Hlemmtorg - en ekki hvað???

Dr.-inn tók fyrsta vagn á leið 4 hér við sel & laut um kl. 9:40 & fylgdi um 14 vagnverjum í Mjódd okkar Breiðhyltinga.

Þá hefir doksi kallinn tekið hús á leið 36 við Hamraborgina & furðaði sig á því að byggðasamlagið kallar leið 35 "réttsælis UM Hamraborg" en leið 36 "rangsælis AÐ Hamraborg." Humm, humm???

Að lúkningu hóaði dr.-inn í þristinn við Mjóddina & sagði líkt & meistarinn sjálfur: Tvistur, þristur - Jesús Kristur.

Amen. 

Rafvagnar á reinar senn ...

Hljóðlátir verða hérlendis
með hleðsluna fína.
Umhverfisvænir allsendis
unaður frá Kína!

Hinn einarði & upplitsdjarfi dr. Gylforce er afar ánægður, hvar hann fékk sendar þessar yndislegu myndir af rafvögnunum sem loksins eru komnir frá Kína. Maður lifandi!

Enda þótt myndirnar sýni einungis þrjá vagna eru þeir fjórir sem verða senn tilbúnir á vígvelli veganna. Þegar árið er liðið má búast alls við fjórtán slíkum eðalvögnum. Spennandi!

Allir strætisvagnar hafa raðnúmer & fá þessir nýju gæðingar númerin 190, 191, 194 & 196.

Doksi kallinn hefir ekki tekið eptir hleðslustöð við Hlemm fyrir vagnana en einhvers staðar verða þær. Drægni vagnanna er um 320 km ef dr.-inn man rétt & því gott að hafa möguleika á að hlaða vagnana í tímajöfnun.

Rafvagnarnir voru dýrir í innkaupum en eiga að vera ódýrir í rekstri. Þeir eru afar hljóðlátir & er vistspor þeirra mun minna en vagna sem brenna jarðefnaeldsneyti.

Þetta verður spenna - rafmögnuð spenna!

Kostar í klósett að kúka ...

Ef þér verður brátt í brók
& borunni vilt strjúka.
Gríptu með þér klink án djóks
& greiddu fyrir að kúka.

200 kall að kúka

Hinn borubratti & blíðláti dr. Gylforce brölti í hægðum sínum í Mjódd okkar Breiðhyltinga, hvar hann rak glyrnur sínar í hið nýja hlið sem gætir úrgang okkar verjanna. En ekki hvað???

Dr.-inn fagnar því vitaskuld að hægt sé að komast á snyrtingu í þessari miklu tengistöð, hvar um fjórar milljónir vagnverja fara þarna um á hverju ári.

Reyndar fór doksi kallinn opt & iðulega á settið í verslunarmiðstöðinni sem er smá útúrdúr. Hvað um það.

Það vekur aukinheldur athygli að einkafyrirtæki setur þetta upp & starfrækir salernin. Ein ferð í herlegheitin kostar litlar 200 krónur & hlakkar dr.-inn til að prófa að tefla þarna við páfann. 

Yfir&út!



Myndir: visir.is & mbl.is

Hlemmtorg ...

Hinn draumkenndi & duttlungafulli dr. Gylforce hefir verið drífandi & dugmikill í vinum vorum - vögnunum - undanfarið en haldið sig við leiðirnar við lautina, leiðir 3 & 4. Nema hvað.

Báðar leiðirnar hafa endastöð við Hlemmtorgið huggulega sem hefir tekið stakkaskiptum á stuttum tíma; hótelbyggingar í flestum háhýsum & Mathöll í sjálfu Mekka. 

Urmull ferðamanna leggur leið sína um torgið & þurfa þeir ekki að óttast skerðingar yfir sumarið á ferðum vagnanna - góðu heilli!


Meðan vagninn leggur
í laust stæði
við undirspil
umferðar stræta
þjórar túristinn
á torgi
í miðri borg

Skimar svo í átt
að Skólavörðu