Sexí sveim ...

Hinn kyntöfrandi & kynþokkafulli dr. Gylforce hefir komist í álnirnar sjúklegu undanfarna daga þrátt fyrir að vera hálfblindur á öðru auga vegna lithimnubólgu - aptur. Hvað um það. 

Dr. Gylforce hefir hoggið eptir því að hvergi er jafn unaðslegt að vera en við Umferðarmiðstöð BSÍ um kl. 14:20-14:30 virka daga. Hví???

Jú, á þessum fagra punkti getur dr.-inn - & aðrir vagnverjar - valið úr þremur unaðsvögnum sem gefa góða þrásetu; um kl. 14:23 lagði úr vör blágulur vagn á leið 55 áleiðis í Garðabæ, Hafnarfjörð & svá auðvitað upp á Leifsstöð. Sá blái vekur ávallt dásemdar kenndir hjá doksa kallinum.

Stuttu síðar kom aðvífandi liðvagn á leið 1 sem er aukavagn. Hver vill ekki komast í dýrðar Mercedes Benz vagn & halda með honum suðureptir??? Dr.-inn hjó aukinheldur eptir því að aukavagninn ekur nú lengra en bara upp í Hamraborg. Það er vel gert hjá Strætó bs. & öngvin vanþörf á því. Nema hvað.

Síðast en alls ekki síst kom stundvíslega klukkan 14:30 hinn rauðbirkni doubledecker "sightseeing" vagninn. Fyrir litlar 3500 krónur kemst maður á annað "level" um vígvelli veganna. En ekki hvað???

Hinsvegar fékk hinn glámskyggni Gylforce tveggja tíma pásu hjá Gláka augnlækni í gær & var ekki lengi að halda á vit vagna. Hann valhoppaði frá augndeild Landspítalans við Eiríksgötu að Hlemmtorgi & hoppaði inn í leið 18. Nú skyldi Grafarholtið njóta gjörhygli Gylforce-ins - & hananú! 

Með auga sjúkt en ekki skolt
út um hvipp & hvapp.
Gylforceinn um Grafarholt
með gjörhyglina skrapp.

Dr.-inn fékk hinn tveggja ára gamla 141 Crossway vagn á leið 18. Fáir vagnverjar voru á ferli nema að við Veðurstofu Íslands kom ung kona inn með barnavagn. Stuttu síðar sté inn í vagninn maður með fákinn sinn. Eitthvað fór það í taugarnar á vagnstjóranum & tönglaðist á því að ekki ætti barnavagn & reiðfákur að vera samtímis í vagninum. Þetta var á miðjum degi & lítið mál í sjálfu sér að hafa þetta tvennt. Furðulegt hvað sumir hlutir trufla. Hvað um það.

Doksi kallinn brá sér aukinheldur í leið 26 & hina sjöttu leið. Hann hefir áður farið í leiðir þessar en um að gera að velta vöngum yfir hinu lostfagra leiðakerfi í Grafarvogi & Grafarholti. 

Í lostfögru leiðakerfi
leikur doksi sér.
Akandi í öll hverfi
unaðslegt það er.

Gestrisni Gaflara ...

Hinn gleðilegi dr. Gylforce gekk fráleitt fyrir gafl í gær hvar hann dvaldi meðal Gaflara. Doksi kallinn fór á fjörurnar við fagrar leiðir suður í Firði & fetaði sig svo áfram að Mjódd þeirra Breiðhyltinga. Nema hvað.

Doktorinn í Fjörðinn fór
feiknastuð á gafli.
Í vagni eigi sat órór
enda alheimsnafli.

Dr. Gylforce tók sér bólfestu í blíðum 149 Crosswayvagninum á leið leiðanna, leið 1, & brunaði með honum suðureptir. Vagnverjarnir voru margir þennan morguninn, vagnstjórinn viðmótsþýður að vanda & virkilega gaman að vera um borð. Hvað um það.

Í Firði aka leiðir 22 & 33/34 á morgnana en svá skiptir um gír eptir hádegið & þá eru leiðir 43 & 44 með aukinni tíðni. Þá er leið 21 & 55 í Firðinum svo það er ekki hægt að láta sér leiðast!

Dr.-inn fór ekki langt með leið 33 að þessu sinni en hitti fyrir hinn stutta 250 Heuliez vagn þeirra Fjarðarmanna. Yfirleitt eru 250 & 251 að þjónusta Gaflara en doksi hugsaði lítt um það & einhenti sér inn í 241 vagninn á leið 21.

Fjarðarmenn hafa ákveðið að vera með vagni í fullri lengd á leið 21. Það var nú ekki svo fyrir nokkrum misserum. Nú sjá 217 & 241 vagnarnir um leiðina sem eru hinu þokkalegustu Irisbus Crossway LE vagnar. Nema hvað.

Dr. Gylforce var í hepðbundnum málum frá Mjódd þeirra Breiðhyltinga. Gjörhygli Gylforceins greindi hinsvegar að það voru tvær hvítar rútur á leið 51/52 sem er alltaf jafndapurt að sjá. Þar eiga vagnarnir að vera blágulir - en ekki hvað???

Gloppandi glompa ...

Hinn gloppótti en þó ávallt glaði dr. Gylforce hefir eyðu í skipulagi dagsins hvar hann ætlar heldur betur að nýta það til vagnarannsókna. Maður lifandi.

Nú er bara að leggja á ráðin; hvert skal haldið???

Haldið senn á vagnavit
vit er ekk´í öðru.
Með sælu í þaula sit
með signa þvagblöðru.

 

Kópvægsk kringla ...

Hinn sálargöfgi & skörunglyndi dr. Gylforce skundaði meðal vagna nú í hæsta degi dags hvar hann hitti fyrir hina funheitu & engilsaxnesku 304 & 305 MAN vagna Kynnisferða. Nema hvað.

Dr. Gylforce fetaði sig inn í 304 vagninn á leið 35 & hélt með vagninum eystur að hinum kópvægska Epstahjalla. Á leiðinni lenti vagnstýran í talsverðum töfum vegna framkvæmda við Biðskýlið vestur á Kársnesi. Leiddist henni þófið & þandi hún hornið af mikilli áfergju. Hvað um það.

Dr. Gylforce hugðist heilsa upp á hinum glæstu 177-179 Irisbus Crosswayvagna á leið 4 þarna eysturúr en að þessu sinni hapði hann eigi heppnina með sér. Doksi kallinn varð að láta sér lynda leið 35 aptur að Hamraborginni hvar hann sá þar 305 MAN vagninn. 

Það er gott til þess að vita að báðir MAN vagnar Kynnisferða eru nú til taks & skiptast á að taka vaktirnar þrjár yfir daginn.

Enn skal brölt í unaðshring
sem ætíð gleði vekur.
Dvölin er sem endurfæðing
- algjör nautn & dekur.

Hvíld & hlé ...

Hinn lempni & liðlegi dr. Gylforce lagði í langa ferð í gær meðal vina sinna - vagnanna - hvar hann tók lærlinga sína með úr valáfanganum "Allir með strætó" frá mennta- & menningarsetrinu hér við Kársnes & Kastala. Nema hvað.

Markmiðið var að kynna ungviðinu hvernig komast má í Framhaldsskólann í Mosfellsbæ & Borgarholtsskóla í Grafarvoginum. Hvað um það.

Dr. Gylforce þrælaði mannskapnum upp í Hamraborg hvar þau síðan hóuðu í 3ja hásinga 198 vagninn á leið 1. Viljandi hugðist doksi ekki velja stystu leið upp í Mosó heldur skemmtilega & góða leið með eðalvögnum. En ekki hvað???

Við Landspítalann vonaðist dr.-inn eptir hinum glæstu Crossway 181-185 vögnum eða hinum sænskættuðu Volvo 188-191 vögnum á leið 15. Hvorugt kom þá upp úr hattinum að þessu sinni - illu heilli.

Doksi sté inn ásamt lærlingunum inn í hinn 10 ára gamla Irisbus Karosa 166 vagn & sátu við í ágætisferð alla leið að Háholti í Mosfellsbæ, rúmlega 40 mínútna leið.

Þar beið eptir oss hinn sænskættaði 107 Omnilink á leið 6 & færði okkur framhjá F Mos eins & framhaldsskólinn þar er gjarnan kallaður aukinheldur sem vagninn sá sýnir okkur vel Borgó í Grafarvoginum. 

Þessir skólar komu ungviðinu spánskt fyrir sjónir en hver veit nema að þau endi þar á næsta ári???

Við Kringluna skáskutum við okkur svo úr leið 6 yfir í leið 4 & gekk sú skipting algerlega upp. Leið 4 kemur mínútu síðar en hinn sjötta leið & héldum við með 177 Crossway vagninum að Hamraborg okkar Kópvægina.

Þaðan var leiðin greið með leið 35 að mennta- & menningarsetrinu. Maður lifandi. 

Gylforce-inn í langa leið
með lærlingana sína.
Blíðlega þar sexan beið
með bílstjórann fína.

Hin fyrsta leið ...

Hinn fráleitt timbraði en þó taktfasti dr. Gylforce var lítt meðal vina sinna - vagnanna - helgi þessa hvar hann baksar nú við að timbra heimavið. Nema hvað.

Leið leiðanna, leið 1, er dr.-num ávallt hugleikin. Þessi fjölfarnasta leið í hinu lostfagra leiðakerfi þarf á mörgum aukavögnum að halda á annatíma sem þó aka aðeins hluta af leiðinni síðdegis.

Dr.-inn hepði nær haldið að auka þyrfti tíðnina á leið 1 í stað allra þessa aukavagna. Það hefir ugglaust kostnaðarauka í för með sér en væri betra fyrir oss vagnverja & í raun eðlilegra á margan hátt. 

Það er ekkert athugavert við það þótt ein leið í kerfinu sé ekin með t.d. 10-12 mínútna tíðni á morgnana meðan aðrar gera það ekki.

Tilsetja nú tíðni þarf 
á tíðfarni leið.
Ætti að vera auðvelt starf
svo áætlun sé greið.

Samgöngukort ...

Hinn samhaldssami & samgönguglaði dr. Gylforce frá Stútulaut hefir fallið í stafi & verið nokk hissa á Strætó bs. hvað samgöngukortið varðar.

Á annað hundrað fyrirtækja & stofnana hafa mótað sér samgöngustefnu & hvatt starfsfólk sitt til að ferðast til & frá vinnu með vistvænum hætti.

Starfsfólkinu býðst samgöngukort frá Strætó sem er árskort í vagnana á höfuðborgarsvæðinu & kostar eitthvað um 60.000 kr. eða um 5000,- kr. á mánuði. Efalítið geta töluvert margir lagt bíl númer tvö & eða jafnvel þrjú á heimilum, fengið sér kort þetta & sparað sér mörg hundruð þúsund krónur á ári.

Að mati dr.´s þarf Strætó bs. að sækja fram í þessum fyrirtækjum & stofnunum & kynna samgöngukortið með myndarlegum hætti. Við mennta- & menningarsetrið hér við Kársnes & Kastala þekkir t.a.m. öngvinn kortið & býður doksa kallinum í grun að svipuð staða sé á fleiri vinnustöðvum.

Í unaðsferðir kortið er
& allir spara.
Nýtið ykkur í nóvember
- njótið kostakjara!

Fénýting ferða ...

Hinn nýtilegi & nothæfi dr. Gylforce hefir setið í hægindastól sínum heimavið í fegurstu laut jarðarinnar, Stútulautinni, hvar hann hefir velt vöngum yfir stofnleiðunum þremur; 1, 3, & 6.

Fjölmennustu leiðirnar í hinu lostfagra leiðakerfi eru leiðir 1 & 6. Þar er bætt við mörgum aukavögnum á annatímum til þess að koma okkur vagnverjum á áfangastað. Leiðir 1, 3, & 6 aka allar frá Lækjartorgi að Hlemmi en tiltölulega fáir vagnverjar fara út á þeim spotta. Það sýnir væntanlega vagnverjatalning byggðasamlagsins sem það framkvæmir í október ár hvert & eru gríðarlega mikilvæg gögn að mati dr.´s.

Það væri gott að skoða hvort ekki mætti fækka þessum ferðum og láta eina eða jafnvel tvær af þessum leiðum enda við Lækjartorg. Með því sparast mikill akstur um Sæbrautina fyrir ekki svo marga vagnverja í raun.

Aukinheldur er mikill samgangur með leiðum 3 & 6 frá Hlemmi út í hverfi. Þar mætti líka velta vöngum yfir því hvort ekki sé hægt að nýta vagna & fé byggðasamlagsins betur.

Bara pæling!

Frá Lækjartorgi leiðir þrjár
liggja þétt við steina.
Eigi eru það ferðir til fjár
fækka ætti í eina.

Breytinga er þörf í efri byggðum ...

Hinn vel byggði & fráleitt brjóstumkennanlegi dr. Gylforce vonar svo innilega að byggðasamlagið, Strætó bs., taki sig til á næsta ári & breyti hinu lostfagra leiðakerfi í efri byggðum Kópavogs. Nema hvað.

Það færi betur á því að leið 2 aki í gegnum linda-, sala-, kóra- & hvarfahverfi & endi ferð sína niður í Mjódd þeirra Breiðhyltinga í staðinn fyrir leið 28.

Þess í stað væri skynsamlegra að láta leið 28 þjónusta salahverfið betur með því að aka upp hjá Ársölum & taka þar hringinn sem stofnleiðin leið 2 sér um. Hverfaleiðin 28 gæti hæglega ekið að Salalaug, snúið þar við & tekið þennan hring sem nú er í höndum stofnleiðarinnar.

Það "meikar meiri sens" að stofnleiðir aki á milli stórra biðstöðva með tengimöguleika líkt & Mjóddin er frekar en hverfaleið á borð við 28 geri það. Hvað um það.

Í efri byggðum breyta þarf
brautum vina minna.
Löðurmannlegt & létt starf
- lítið mál að sinna.

Hinn lauflétti dr. Gylforce hélt í fjórar ferðir í hádegi daxins & náði góðri - en stuttri - setu í þremur vögnum. En ekki hvað???

Við mennta- & menningarsetrið við Kársnes & Kastala er aðeins um einn vagn að ræða utan annatíma, hinn funheita & engilsaxneska 305 MAN vagn á leið 35. Eptir að hafa kastað á hann góðri kveðju kynntist doksi kallinn tveimur nýjum Crossway vögnum 177 & 179.

Báðir eru þeir á leið 4 sem á alltaf jafn erfitt með að halda áætlun frá Mjódd að Hamraborginni, líka utan háannatíma. 

En það er önnur saga.

Villigötur Vesturbæjar ...

Hinn spraðabassa- & spjátrungslegi dr. Gylforce spókaði sig meðal vagnanna í gær hvar hann sat í þeim nokkrum & leið - nú sem endranær - vel á leið. Nema hvað.

Doksi kallinn hjó eptir einu í ferðum sínum um vesturbæ þeirra Reykvíkinga að þessu sinni. Þar aka um leiðir 11, 13, 14 & 15 en dr.-inn var aðeins í leiðum 13 & 14. Hvað um það.

Það vantar tilfinnanlega tengingu milli Seltjarnarness & Grandahverfisins. Öngvinn vagn fer um Ánanaustið frá Hringbraut að Fiskislóð. Vagnverjar, sem búa út á Nesi & vilja nýta sér þjónustu margra aðila við Granda, þurfa annaðhvort að þvælast í kerfinu ellegar ganga langan spotta.

Strætó bs. gerir breytingar á hinu lostfagra leiðakerfi sínu tvisvar á ári; janúar & ágúst. Vonandi eru leiðakerfisspekúlantar þeirra með lausn á þessu á teikniborðinu.

Dr.-inn bíður spenntur.




Gylforce-inn með gleði hér
glauminn vill opt treina.
Doksi veit að vagninn er
verðmætastur steina.