Vangá verktaka ...

Hinn skinnpokalegi en þó skynugi dr. Gylforce skrapp vitaskuld á vit vagna í rigningarsuddanum. Nema hvað.

Doksi kallinn hefir verið tíður gestur - eilífur augnakarl - í leið 35 síðustu daga & gefið vögnum, vagnstjórum & vagnverjum góðan gaum. En ekki hvað???

Það hafa tveir vagnar séð um hinn kópvægska hringrúnt undanfarna daga. Þetta eru stuttu vagnarnir Heuliez 156 & hinn funheiti MAN 305. Það er vel & hafa vagnverjar tekið vel við sér enda þjóðfélagið komið á blússandi siglingu eptir sumarleyfi. Hvað um það.

Eitt er áberandi og leitt. Það er munur á þrifum, umgengni & viðhaldi á vögnunum, þ.e. hvort um er að ræða vagn frá Strætó bs. eða verktaka.

Til að mynda er hinn kópvægski verktaki Kynnisferðir, sem ekur leiðum 28 & 35, lítið fyrir að taka úr umferð vagna sem eru með ónýt sæti svo dæmi séu tekin. Þetta myndi ekki sjást hjá byggðasamlaginu. Kannski er vagnahallæri um að kenna en það breytir því ekki að þetta setur heldur leiðinlegan svip á þjónustuna & gerir hana ekki jafn fagmannlega & góða.

Vér vagnverjar eigum betra skilið - & hananú!

Komið er í bátinn babb
hjá bágum verktaka.
Óhirða & algjört drabb
sem ætti að rannsaka.



Neðri mynd: citybus.piwigo.com

Guðlast & goðgá ...

Hinn guðdómlegi & glysgjarni dr. Gylforce gekk til vagnarannsókna í hádeginu hvar það gekk afar vel & allt eins & best verður á kosið. Nema eitt. Nema hvað.

Í Mjódd þeirra Breiðhyltinga kom dr.-inn með hinum glænýja & glæsta Crossway vagni á leið 4. Rak þá doksa kallinn í rogastans hvar hvít rúta blasti við honum á leið 51. Hún var aukinheldur illa merkt & ljóst að forvígismenn byggðasamlagsins verða að gera betur en þetta. Hvað um það.

Dr.-inn gaf sig vitaskuld á tal við vagnverja sem að þessu sinni voru ferðamenn. Furðuðu þeir sig á því að hvíta rútan væri leið 51 enda fengið upplýsingar um annan lit á vögnum sem færu um landið. En ekki hvað???

Hvíta rútan klúður er
sem komast má hjá.
Byggðasamlaginu ber
að bæta úr goðgá!

Vagnverjar - samherjar ...

Hinn hjáleiti en þó eigi hinsegin dr. Gylforce hugði strax að vagnaferðum í blæðandi morgunsárinu. Nema hvað.

Hinn aldni vagnverji valhoppaði vitaskuld út í skýlið sitt hvar hann hitti fyrir hinn stutta Heuliez 156 vagn á leið 35. Allt er það þekkt & gott & blessað.

Það hefir hinsvegar ávallt vakið gjörhygli Gylforce-ins að vagnverjar í grennd við götuna Skálaheiði hér í Voginum eru afar vel settir hvað vagna varðar. Ugglaust þekkja ekki margir heiði þessa sem er vestan við Digranesskóla. Þar aka leiðir 28 & 35 með 15 mínútna millibili á annatíma & svo er ekki langt í leið 4 ef út í það er farið.

Meðan megum vér vesturbæjarvagnverjar láta okkur nægja einungis leið 35 sem þó er nú komin með korterstíðni milli kl. 7-9 árdegis & svo aptur frá kl. 14-18 síðdegis.

Vonandi upplifir doksi kallinn upprisu leiðar 36 einhvern tíma.

Virðulegir vagnverjar
vagninn ávallt taka.
Í samfélögum samherjar
sitja þétt & slaka.

Reykvískur rúntur ...

Hinn velmegandi & virðulegi dr. Gylforce var heldur betur í góðum gír á laugardaginn hvar hann stóðst ekki stuðið. Ekki frekar en fyrri daginn.

Doksi kallinn reis upp við dogg & spurði hinn unga vagnverja: "Hvað vilt þú gera í dag???" & hann svaraði að bragði: "Fara í tveggja hæða strætóinn." Vitaskuld, vitaskuld.

Feðgarnir héldu því á vit vagna & hugðust enda sæluna með "sightseeing" um Reykjavík. Það fer líka hver að verða síðastur að skella sér í dobbeldekker þeirra Kynnisferða því þessar eðalferðir hætta 15. september nk.

Það er ekki alveg ókeypis að taka sér rúnt með tveggja hæða vagninum. Ein ferð um reykvískar lendur kostar litlar 3500,- kr. & gildir miðinn í sólarhring. Reyndar er þessi prís alveg sambærilegur við það sem gerist & gengur í öðrum löndum. Dr.-inn þurfti t.a.m. að punga út tæpum 5000 kalli er hann fór svona eðalferð um Kaupmannahöfn í fyrra. Hvað um það.

Við Háskólann stöðvaði vagninn & tók inn vagnverja. Það vakti athygli doksa að fyrir aptan þann rauða var leið 6, 152 vagninn. Eitthvað var vagnstjórinn óþolinmóður & flautaði í gríð & erg. Rauk hann svo fram úr & flautaði enn.

Vagnstjórar þurfa að hafa í huga að vagninn rauði getur verið lengi að koma sér af stað; ferðamennirnir eru spurulir & svo má benda á það að vagninn gefur til baka! Það er nú sem byggðasamlagið ætti að athuga þótt vissulega komi það til með að tefja vagnana. 

Enn í dobbeldekkerinn
í dýrðlegan rúnt.
Verður þó vagnverjinn
að vera með seðlabúnt.









Efri mynd: footage.framepool.com/shotimg/829126707-harpa-henning-larsen-architects-olafur-eliasson-reykjavik.jpg

Fræðsla fyrir ungviðið ...

Hinn uppfræðslusami & ábendingarglaði dr. Gylforce er í óðaönn að undirbúa áfangann sinn "Allir með strætó", sem hann hefir yfirumsjón með í mennta- & menningarsetrinu við Kársnes & Kastala. Nema hvað.

Það er brýnt að börnin kunni að umgangast vagnana & sýni hvarvetna kurteisi í hvítvetna. En ekki hvað???

Hér er tvö myndbönd sem þau horfa á áður en þau arka út í hið lostfagra leiðakerfi vagnanna.

Glóðheitur Gylforce-inn ...

Hinn voti en viðfelldni dr. Gylforce var vitaskuld eins & eilífur augnakarl meðal vinanna - vagnanna - í gær & í fyrradag. Nema hvað.

Báða daga þessa var afar heitt í veðri á höfuðborgarsvæðinu & því tilvalið að grafa upp léttan klæðnað & halda á vit vagna. En ekki hvað???

Dr.-inn hefir ávallt ferðir sínar með leið 35 úr laut sinni. Venju samkvæmt kom aðvífandi hinn engilsaxneski & funheiti MAN 305 vagn & fór dr.-inn hringinn um Voginn.

Vagninn ber opt heitið "hinn funheiti" hjá doksa vegna þess að hitastigið inn í honum er hátt & er það mjög notalegt á nöprum vetrardögum. Enda kom það upp úr dúrnum að vagninn var logbrennandi heitur sem á alls EKKI við þessa dagana. Kannski eru bara tvær stillingar á miðstöðinni í vagninum; heitt & funheitt.

Það lak svitinn af Gylforce greyinu & var hann aldrei þess vant manna fegnastur að komast út úr vagninum við Hamraborg & halda í aðrar leiðir. Ugglaust hefir ekki verið gaman að sitja við hlið Gylforce-ins á öðrum leiðum hvar hann var gegnblautur af svita. 




Sá funheiti, hann doksa fékk
til að farast úr hita.
Gylforce-inn úr vagninum gekk
gegnblautur af svita.



Neðri mynd: citybus.piwigo.com

Tómt mál að tala um ...

Hinn tónaljóðelski & taktfasti dr. Gylforce tók vagnavachtina alvarlega - líkt & venjulega - milli sunnudags & þriðjdags hvar hann hélt vitaskuld á vit urmul vagna. En ekki hvað???

Það var einmunablíða & indælt veður í borginni & fóru vagnarnir ekki varhluta af því. Doksi kallinn sté inn í hvern vagninn á fætur öðrum & alltaf reyndist hið sama vera uppi á teningnum; gripið í tómt. Nema hvað.

Dr.-inn gerði sér dælt við leiðir 4, 21, 28 & 35. Vagnarnir ráku nefið í nóttina & ráfuðu um í reiðileysi.

Svo er spurning hvað gerist í dag hvar doktornum sýnist að dagstjarnan sé enn í miklu stuði. Illu heilli. Hvað um það.

Vagnverjar á bak & burt 
í blíðunni dvelja.
Doksa finnst það dapurt
& djöfulsins elja!

Enn í amli ...

Hinn blíðláti & bernskulegi dr. Gylforce brá sér vitaskuld aptur í vagnana í gærkveldi á afmælisdegi sínum. En ekki hvað???

Dr. Gylforce brokkaði í blíðunni að Hamraborginni & sá 144 Crossway vagninn á leið 1. Það er óvenjulegt því hann keyrir aðallega aðra leið. Doksi kallinn settist aptast & hélt í Fjörð þeirra Gaflara. 

Í Firði stóð valið milli leiða 21, 43 & 44. Fyrst ætlaði doksi að kynna sér leiðir 43 & 44. Þegar hann sá að þetta var síðusta ferð dagsins hjá leið 21 ákvað hann að gera sér far í Mjódd þeirra Breiðhyltinga.


Verktakinn í suðri sér um akstur á hinni 21. leið. Síðasta vetur brúkaði hann styttri vagnana við akstur en í sumar hefir lengri týpað ráðið ríkjum. Vagn númer 241 var á stæði en vagninn sá er merkilegur fyrir þær sakir að það vantar á hann öptustu hurðina. Í staðinn eru fleiri sæti. 

Ekki veit ég hverju þetta sætir en dr.-inn fékk nánast sérferð frá Firði að Mjódd með þessum höfrungarvagni.

Föngulegur Fjörður er
fyrirmyndarstaður.
Dvel með vögnum hist & her
hrokalaus & glaður.

Akstur afmælis ...

Hinn helgi & heilagi dr. Gylforce hellti sér vitaskuld í afmælisrúnt meðal vina sinna í hádeginu. Nema hvað.

Dr.-inn hapði illu heilli ekki mikinn tíma aflögu að þessu sinni. Hann hóaði venju samkvæmt í 305 vagninn á leið 35 & tók eðalhring um kópvægskar koppagrundir. En ekki hvað???

Dr. Gylforce lét glepjast af hinum glæstu & glænýju Crossway vögnum í Hamraborginni & gekk hnarreistur inn í 177 vagninn á leið 4. 

Dr.-inn komst í tæri við vagninn við Hálsatorgið & lét sér ekki muna að taka góðan hring um lendur þeirra Breiðhyltinga.

Takk fyrir mig vagn númer 177 - svona eiga afmælisrúntar að vera!

Þótt doksi einatt dæli
drjúgt í sig Maxi,
á hann í dag afmæli
- innilega lagsi!




















Dr.-inn var í skýjunum með afmælisrúntinn.

Bíðum við ...

Doksa rak í rogastans áðan hvar hann sá að leið 35 kl. 9:26 við mennta- & menningarsetrið við Kársnes & Kastala.

Það virðist sem svo að hún hafi lagt af stað frá Hamraborg kl. 9:22.

Það er fagnaðarefni en skv. leiðabók er síðasta aukaferð á annatíma kl. 8:52.

Svá hefst hin hepðbundna áætlun, lagt af stað 07 & 37 yfir heila tímann þangað til klukkan 13:52.

Ætli vagnstjórinn hafi eitthvað skriplað þarna á skötu???