Kynnisferðir í kröppum dansi ...

Gylforce-inn með höppum & glöppum
í Grafarvogi beið.
Kynnisferðir í dansi kröppum
keyrt á sjöundu leið.

Keyrt á leið 7

Í marsmánuði tóku Kynnisferðir við leið 7 af Strætó bs., hvar leið sú ekur frá Grafarvogi yfir í ný hverfi þeirra Mosfellinga. Nema hvað.

Í kvöld lenti annar vagninn á leiðinni í kröppum dansi rétt hjá Egilshöllinni.

Góðu heilli urðu ekki slys á fólki & ekki er annað að sjá en að Crosswayvagninn sé lítið skemmdur.

Vonandi kemst hann fljótt út á vígvelli veganna enda lítið um varavagna á þeim bænum.

Yfir&út!

Börger í Bítlabænum ...

Keflvízki vagninn er jú kúl
kneyfði öl við setrið.
Rokksafn, Olsen & Rúni Júl
ríf´upp sálartetrið.

Dr. Gylforce tók á sig rögg hvíldardag þennan, hvar hann loksins einhenti sér í leið 55 suður í Bítlabæinn. En ekki hvað???

Hingað til hefir doksi kallinn aðeins tekið leið þessa frá BSÍ í Fjörðinn - & öfugt - en nú sá hann dýrðina eina & hélt sunnan Straums eins & innfæddir segja. Nema hvað.

Dr.-inn hjó eptir því að leið 55 leggur einungis í hann frá Firðinum á sunnudögum sem skipti hann reyndar öngvu máli að þessu sinni.

Doksi kallinn lét innanbæjarvagna þeirra Bítlbæinga vera. Í staðinn gæddi hann sér á safaríkum börger & kneyfaði ölið af áfergju eins & vera ber í afar góðra vagnverja hópi.

Dr. Gylforce mun svo efalítið smjatta á keflvízkum innanbæjarvögnum þegar enn hlýnar í veðri hér á Fróni.

Yfir&út!

Gagnavagninn ...

Doktorinn vildi í Daðann
& dreif sig á hans fund.
Vagninn mig gerir glaðan
ég gleymi stað & stund.

Öll við sællega syngjum
sönglar hann næsta stopp.
Leitaði dyrum & dyngjum
djöfulsins þetta flopp!

Dr. Gylforce hélt rakleitt á vit vagna hér í gettóinu, hvar hann vildi að sjálfsögðu næla sér í Gagnavagninn hans Daða á leið 4. En ekki hvað???

Venju samkvæmt valhoppaði doksi kallinn af eftirvæntingu út í næsta skýli. Ekki reyndist vagn dr.´s vera Gagnavagninn geðþekki & því lítið annað að gera en skunda með honum í Mjódd okkar Breiðhyltinga & sjá hinn fjarkann.

Ekki var það Gagnavagninn & því fátt annað í stöðunni en að halda í Hamraborgina & athuga með þriðja vagninn á leið 4.

Enn bólaði ekkert á Gagnavagninum & þraut Gylforceinn hér öreindið & einhenti sér í leið 2 & hélt um lendur Vatnsendans.

Vonandi nær dr. Gylforce í skottið á Gagnavagninum á morgun. Koma svoooooo!!!

Yfir&út!

Í dag boðar dr.-inn mikinn fögnuð ...

Aukin er tíðnin - unaður
á mér ekki stendur.
Mjúklega líður - munaður
um mikillegar lendur.

Aukin tíðni á ný

Mínir virðulegu vagnverjar!

Í dag verið óhræddir, því, sjá, dr.-inn boðar ykkur mikinn fögnuð sem veitast mun öllum verjum:

Yður er í dag frelsið fætt, sem eru vagnar á vígvöllum veganna, í borg hins skeggjaða Dags.
Og hafið þetta til marks: Þið munuð finna rafvagna, hljóðláta, akandi um götur (með þéttri tíðni).

Dýrð sé vögnum á vígvöllum
& friður á jörðu og velþóknun vagnstjóra yfir oss vagnverjum.

Amen.

Ekki á vígvöllum veganna ...???

Sunnudagurinn feitan sökk-
aði - sá hann ekki.
Fékk í háls ekki bara kökk
heldur líka kekki.

Dr. Gylforce varð frá að hverfa ásamt litla vagnverjanum þennan annars fyrirtaks hvíldardag hvar þeir náðu ekki að finna Gagnavagninn geðþekka með Daðaröddinni. Illu heilli.

Dr.-inn gerði nokkrar tilraunir á leið 4 en varð eigi kápan úr því klæðinu. Fjórir vagnar sjá um aksturinn á leið 4 um helgar & því miður rakst doksi kallinn einungis á 174, 176 & 187 Crossway vagnana á vappi hér um breiðhylsk börð & stræti. Einn vagn vantaði í sarpinn & mögulega var það Gagnavagninn - hvur veit???

Það gengur bara betur næst.

Amen.

Langdvalir með Daða ...

Vagn þessi er eðalgrænn
engin keppni - kræst!
Í honum Daði kyrjar kænn
hvar hann stoppar næst.

Skotmark fyrir hinn unga & aldna vagnverja er komið. Vitaskuld er það hinn glæsilegi Gagnavagn er kemur vonandi til með að aka leið 4 um helgina.

Feðgar munu efalítið eiga langdvalir & þrásetur með honum þessum næstu daga - maður lifandi!

Yfir&út!



Myndir: Strætó

Sumaráætlun innan seilingar ...

Átjánda er áætlun ný
öll við þá fögnum.
Förum út um borg & bý
brunandi í vögnum.

Sumaráætlun

Hið þrælmagnaða þríeyki Almannavarna hefir tekist að halda hinum skæða faraldri það vel í skefjum undanfarna daga að byggðasamlagið hefir loksins ákveðið að fjölga ferðum vagnanna. Góðu heilli.

Í mörgum fjölmiðlum er talað um að óskert tíðni verði frá & með 18. maí næstkomandi. Það er ekki alveg rétt því í sumaráætluninni aka þrjár leiðir, 18, 24 & 28 á hálftímafresti en ekki korters.

Hvað um það. Dr.-inn hlakkar mikið til að fá vini sína - vagnana - aptur á almennilega tíðni aukinheldur sem það hentar honum líka betur að láta ekki leiðir 35 & 36 leggja af stað á sama tíma úr Hamraborginni háu & fögru.

Yfir&út!
 

Magnað raf & metan ...

Það bar vel í veiði hjá dr. Gylforce dag þennan hvar hann komst bæði í rafvagn úr Austri & metanvagn frá Svíaríki. Góður dagur þetta - maður lifandi!

Hinn hreyfingarlétti & kviki dr. Gylforce ráfaði um í reiðileysi við Hlemmtorgið & var vart á þeim buxunum að sogast inn í unaðinn. Öðru nær.

En þegar dr.-inn sá hins vegar hvíta víkinginn á leið 18 valhoppaði hann í snarhasti að aptari hurð vagnsins & skundaði rakleitt inn. En ekki hvað???

Skipti þá öngvu hvurt haldið skyldi. Ó-nei.

Við Ártúnið tók dr. Gylforce ákvörðun um að skipta um vagn, gekk að rennu vagna er í miðborgina ætluðu & kom sér í rafvagn.

& viti menn - líka á leið 18. Þvílíkur eðaldagur!

Magnað raf & metan
magnað tvíeyki.
Hér er sæl setan
sannur tærleiki.

Klappað & klárt ...???

Klappað & klárt verður senn
greiðslukerfi vagna.
Viðmót fínt & viti menn
verjar munu fagna.

Klappað og klárt

Strætó bs. hefir kynnt & ákveðið nafn á nýtt greiðslukerfi í vini vora - vagnana - sem ráðgert er að hleypa af stokkunum í upphafi næsta árs. 

Nafnið á greiðslukerfið er stutt, grípandi & skemmtilegt; einfaldlega Klapp.

Með Klappinu verður jafn einfalt að greiða í vagnana eins & þegar maður fer út í búð. Aukinheldur verður það ekki verkefni vagnstjóra að fylgjast með greiðslum heldur eiga þeir fyrst & fremst að huga að akstrinum & halda áætlun.

Dr.-inn fagnar því ógurliga enda fátt meira sem hefir farið í taugarnar á honum & vagnstjórar sem tefja vagninn með því að tuða í vagnverjum yfir því að það vanti eitthvað smá klink upp á greiðslu. Nema hvað.

Þetta er þó ekki í fyrsta sinn sem byggðasamlagið ýtir greiðslukerfi úr vör. Ó, nei. Fyrri tilraunir hafa mistekist hrapallega & umtalsverðu almannafé verið kastað á glæ. Illu heilli.

Klappið er hinsvegar að skandinavískri fyrirmynd & mun efalítið reynast vel enda hefir það verið raunin á hinum norðurlöndunum. 

Vagnverjar geta því farið að taka gleði sína & hlakkað til næsta árs þegar þeir hafa í lófa Klappið.

Eitt lófaklapp fyrir því!

Undanþága fyrir almenningssamgöngur ...

Við undanþágu þiggjum nú
& þjótum með vagni.
Aukin tíðni upp úr þrjú
með unaðsrafmagni.

Undanþága

Gleðifregnir berast nú frá ráðuneyti heilbrigðismála hvar byggðasamlagið hefir fengið undanþágu frá fjarlægðartakmörkunum - hinni svokölluðu tveggja metra reglu - frá & með 4. maí næstkomandi.

Enn eru þó fjöldatakmarkanir í vögnum vorum en miðast nú við þrjátíu vagnverja. Aukinheldur verður fremsta hurðin lokuð enn um sinn & vagnverjar beðnir um að sýna kort sín með sama hætti & áður.

Aukin tíðni verður á leið leiðanna, leið 1, á annatíma bæði morgna & síðdegis. Verður leið þessi þá á 15 mínútna tíðni sem er gleðilegt þótt venjulega komi hún á tíu mínútna fresti. Hvað um það.

Leik- & grunnskólakort verða ekki í gildi enda erfitt að koma stórum hópum í vagnana þegar einungis 30 mega vera þar samtímis. En ekki hvað???

Vonandi taka vagnverjar við sér enda virðist faraldurinn í nokkurri rénun sem er einkar ánægjulegt. Kannski verður hægt að koma leiðakerfinu í eðlilegt horf í sumar - hvur veit???