Gerbreytt hjá Göflurum ...???

Gaflarar nú gerbreyta
Gylforce fagnar því.
Allra leiða munu leita
svo leiðir verði fönkí.

Það verður stefnt að töluverðum breytingum á innanbæjarleiðum í Firðinum frá & með næstu áramótum. Að mati doksa er það löngu tímabært enda öngvu líkara en hin yndislega óreiðukenning hafi algerlega tekið völdin þar í bæ.

Til stendur á koma á fót nýrri leið, leið 41, aukinheldur sem leið 21 mun ekki enda akstur í Firði, heldur halda um holtin & eiga endastöð í iðnaðarhverfum Vallanna.

Nú um stundir er kerfið skrýtið; leið 22 ekur eins & hrein mey í limgerði að morgni til virka daga & breytist svá í furðulega pöntunarþjónustu seinni part dags; leið 33 & 34 ráfa um eins & í reiðileysi, einnig á morgnana & svo taka leiðir 43 & 44 við eptir hádegið með aukinni tíðni sem er reyndar vel. 

Ofan á þessi furðulegheit ekur leið 21 frá Firði að Mjódd & leið 55 hefir afdrep í Firði á leið út á flugvöllinn suður með sjó.

Að lúkningu fer um Fjörðinn leið leiðanna, leið 1, sem gagnast vitaskuld afar vel þeim vagnverjum sem eru í námunda við hana.

Vonandi ná Gaflarar - ásamt sérfræðingum Strætó - að koma leiðakerfinu í gott horf þarna suðurfrá svo unaður verði að fara um lendur þeirra á nýju ári.

Amen.

Guð blessi Gylforce ...

Nú þegar tíu ár eru liðin frá gjaldþrota hugmyndafræði sem m.a. hvatti til 3-5 ökutækja á hvert heimili, gæti farið á næstu árum að hilla undir nýtt & mun betra samgöngukerfi á höfuðborgarsvæðinu, Borgarlínuna. Ef & þegar línan sú kemst á legg eru menn í dauðafæri að láta draum þennan aka á sjálfkeyrandi rafvögnum & hefja þar með það ferli. En ekki hvað???

Í tilefni af þessum merku tímamótum einhenti dr. Gylforce sér í vagnana & einskorðaði ferðir sínar við rafvagnana níu sem komið hafa úr Austurvegi á undanförnum vikum og mánuðum. Nema hvað.

Vitaskuld voru þetta unaðsferðir; þrásetur & langdvalir. Doksi kallinn gerði hosur sínar gular fyrir rafvögnunum sem óku á leiðum 2 & 4.

Illu heilli var hvörgi neina virka upplýsingatöflu að sjá inn í vögnunum. Hvurnig stendur á því? Dr.-inn hélt nú bara að um byrjendaörðugleika væri að ræða.

Hér þarf byggðasamlagið að gyrða sig í brók. Núna. Strax.

Upplýsingagjöfin gleymst
Gylforce ekki sáttur.
Ekkert hefir endurheimst
endalaus fyrirsláttur!

Vetnisviðbót ...

Styrk að öðlast stórgott er
stefnt á vetnisvagna.
Rafvagnar eru einnig hér
ástæða til að fagna!

Vetnið í vagnaflotann

Hinn síspennti & sjálfumglaði dr. Gylforce er sem sigri hrósandi hvar daglega berast dágóð tíðindi úr ranni byggðasamlagsins Strætó bs.

Nú hefir Strætó fengið styrk frá Evrópusambandinu til þess að kaupa fimm vetnisvagna sem eiga að vera komnir á vígvelli veganna fyrir lok næsta árs.

Þá verða 14 rafvagnar úr Austurvegi á ferli, 5 vetnisvagnar & jafnvel gömlu metanvagnarnir tveir frá Scania. Aukinheldur verða þrír af fjórum vögnum nyrðra líka metan í lok árs 2019. 

Dr.inn hyggst einmitt heimsækja Norðlendingafjórðung fljótlega. Maður lifandi!


Dr.-inn man eptir gömlu vetnisvögnunum sem komu frá Mercedes Benz & fengu númerin 86-88. Doksi kallinn kunni alltaf vel við þá en nokkrir byrjunarörðugleikar voru en að lúkningu náðu þeir ágætis siglingu.

Aukin tíðni ...

Vagnarnir nú skína skært
skjólshús vagnverja.
Að auka tíðni er tímabært
okkur til að ferja.

Aukin tíðni

Það heyrast fagnaðarfréttir úr ranni borgarstjórnar hvar hún leggur til að auka tíðni á þremur leiðum & hafa hana 7 & 1/2 mínútu á annatíma virka daga.

Um er að ræða leiðir 1, 3 & 6 sem eru efalítið fjölförnustu leiðirnar. Stefnt er að því að breytingin taki gildi í upphafi ársins 2020.

Ástæða þess að þetta kemur ekki til með að gerast fyrir en eptir rúmt ár, er að ferli breytinga er heldur þungt í vöfum hjá byggðasamlaginu.

Öngvu að síður eru þetta gleðifregnir sem vonandi verða að veruleika!

Þristur & þjór ...

Bjórdrukkinn & blekaður
brölti inn í vagn.
Í þristinum góðglaður
eptir gott magn.

Dr. Gylforce lætur ekki sitt eptir liggja hvað varðar djamm & djús helgi þessa. & vitaskuld heldur doksi kallinn í sollinn með vögnunum, vinum vorum - en ekki hvað???

Dr.-inn var meðal vagnverja í leið 3 í gærkvöldi. Það var gleðilegt hve margir voru með í för en vagninn var þéttsetinn um hálf ellefuleytið hvar hinn evrópski Iveco Crossway hélt úr gleðinni í miðbænum yfir í gettó okkar Breiðhyltinga.

Amen.

Sullumbull í síðustu ferð ...

Í síðustu ferð eptir sull
settist ég í tvistinn.
Fáir á ferli, ég með bull
- fín var annars vistin!

Dr. Gylforce vantaði unaðslegar vagnaferðir frá Stútulautarseli sínu niður í dal þeirra Kópvæginga í gærkvöldi. Nema hvað.

Dr.-inn skokkaði í Voginn fagra um áttaleytið & tók hús á hollenskum VDL vagni á leið 28. Biðstöð hans við Hvammsveg er með staur & erum vér vagnverjar ill sjáanlegir þar í skammdeginu. Góðu heilli tók vagnstjórinn eptir doksa & fékk hann stuttan rúnt að smárunum í dalnum.

Dr. Gylforce stóð vaktina stórmannlega í staupaþinginu þetta haustlega frjádagskvöld.  Að lúkningu læddi hann sér í síðustu ferð leiðar 2, hélt í salahverfið & gekk þaðan hröðum skrefum í fegurstu lautarsel jarðarinnar, Stúlautarselið.

Unaður.

Stælar í stjóra ...

Bíllaus dagur dýrlegur
dásemd er sú sæla.
Vagninn ávallt vænlegur
en vagnstjóri með stæla.

Dr. Gylforce valhoppaði af gleði út í næsta skýli á þessum fallega en heldur svala degi. Ástæðan var vitaskuld bíllausi dagurinn & sú staðreynd að fríkeypis var í alla vagna. Maður lifandi.

Dr.-inn hapði sér til fulltingis tvo unga vagnverja í ferðum sínum. Annar þeirra tók fák sinn með sem var auðvitað hið besta mál. Leiðir doksa & drengja var velþekkt; þristur & fjarki. Nema hvað.

Þríeykið skellti sér í leið 4 við Efstahjallann í Kópavoginum. Kom þar 174 Iveco Crossway vagninn askvaðandi. Doktorinn beindi ungviðinu að taka fákinn & fara með hann inn að aptanverðu. Sjálfur hugði hann á inngöngu á venjubundnum stað. Beið doksi nokkra stund en ekki opnaði vagnstjórinn hurðina. Dr.-inn horfði á hann loksins & benti hann doksa með þumli & þjósti á að fara líka inn að aptan.

Vagnstjóranum var í lófa lagið að opna fyrir dr.-num að framan. Þess í stað ákvað hann að sýna stæla & hroka & það á sjálfum bíllausa deginum! Vissulega var frítt í vagninn & því kannski allt í lagi að ganga inn um allar dyr. Samt sem áður, dr.-inn stóð fyrir framan fremstu hurð eins & vera ber & bað um það eitt að gaurinn myndi opna hurðina.

Vonandi breytir stjóri þessi "stælahátterni" sínu ellegar finnur sér annan starfsvettvang.

Punktur. Basta. 

Fríkeypis fjör ...

Fögnuður, nú verður frítt
fyrirtak ég segi.
Eitt er þó aðeins of skítt
að hafa það á laugardegi.

Á morgun er fríkeypis í vagnana mínir virðulegu vagnverjar!

hipp-hipp-húrrey!

Evrópsk samgönguvika

Uppbygging nær örugg ..

Framgangan nær örugg nú
á nýrri Borgarlínu.
Verkefnið fær von & trú
vel gert þið framsýnu!

Uppbygging Borgarlínu tryggð

Dr. Gylforce hoppaði hæð sína í lopt upp - margopt - hvar hann las fréttir frá borgarstjórn Reykjavíkur um að framganga Borgarlínu sé nú væntanlega tryggð. Vel gert!

Enda þótt dr.-inn sé talsmaður línunnar hvetur hann þó til þess að varlega verði stigið til jarðar hvað uppbyggingu varðar. Mesta þörfin er væntanlega línur milli Valla í Hafnarfirði og niður í miðbæinn & svá frá Mosfellsbæ að miðborginni. Þetta eru einmitt leiðir 1 & 6 í strætisvagnakerfinu.

Líklegt má telja að fyrst verði hafist handa við þessar línur en stefnt er að því að opna fyrir útboð á verkinu árið 2020.

Ruglingur & riðl ...

Strætófarþegar stynja & dæsa
staðsetning á vögnum er
flunkuný því verið er að fræsa
fyrir vagna á Hlemmi hér.

Það var heldur betur handagangur í öskjunni í gærkvöldi þegar dr. Gylforce gekk hnarreistur, hár & brattur um Hlemmtorgið. Nema hvað.

Vegna fræsingar urðu vagnarnir að stoppa á furðulegum stöðum & hapði byggðasamlagið útbúið fínar skýringarmyndir á þessari breytingu aukinheldur sem fréttatilkynning hapði ugglaust verið send á flesta fjölmiðla. Hvað um það.

Öngvu að síður sá dr.-inn villuráfandi vagnverja um allt torgið þetta kvöld enda margir vagnar að stoppa við Rauðarárstíg & plássið ekki mikið þar til að athafna sig. 

Dr. Gylforce hapði hug á huggulegri ferð með leið 4 úr gettói sínu að Hlemmtorginu góða. Í Hamraborginni sá doksi kallinn hinn sænskættaða Volvovagn á leið leiðanna & var ekki lengi að svissa yfir & halda með honum alla leið að endastöðinni.