Reitur & hæð ...

Fólki á hæðinni fínu
fjölgar saman smám.
Betra fyrir Borgarlínu
bölvað fyrir nám.

Sjómannaskólareitur & Veðurstofuhæð

Reykjavíkurborg heldur áfram þéttingarstefnu sinni & hyggst á næstu misserum breyta Sjómannaskólareitnum og Veðurstofuhæðinni í byggð. Nema hvað.

Nú hefir verið samþykkt breytingartillaga við aðalskipulag svæðisins hvar gert verður ráð fyrir enn fleiri íbúum á svæðinu en í fyrstu.

Það mun hafa góð áhrif á fyrirhugaða Borgarlínu sem verður að öllum líkindum allt þarna í kring. Hvað um það.

Aukinheldur hefst nú Strætó bs. á næstunni handa við að aðlaga leiðakerfi sitt að að Borgarlínunni & hefir sett starfshóp á laggirnar. 

Spennandi - en ekki hvað???

Meira af metan ...

Gylforce brenndur & bitur
böðlast samt á leið.
Fráleitt er verjinn vitur
sem væflast í bifreið.

Hinn sívali & síþreytti dr. Gylforce sá í gögnum byggðasamlagsins að gert er ráð fyrir um 300 milljónum króna til vagnakaupa árlega á næstu fimm árum. Máske þykja mönnum það dágóð upphæð en er það svo???

Ef festa á fjár í umhverfisvænum vögnum, eins & fleiri rafvögnum úr Austurvegi, fást um fjórir vagnar á hverju ári. Það eru nú öll herlegheitin aukinheldur sem ólíklegt þykir að fleiri komi þaðan; bíða skal & sjá hvernig þessir fjórtán sem þegar eru hér, reynast á vígvöllum veganna.

Líklegt má telja að eigi fleiri rafvagnar komi í bili enda hefir Strætó bs. gefið það út að ætlunin sé að kaup metanvagna í ár. Jibbíkóla!

Dr.-num líst afar vel á það. Akureyrarbær er með þrjá slíka í rekstri - & gengur vel - aukinheldur sem verð á einum slíkum er umtalsvert lægra en á rafvagni. Kaupa má um sjö metanvagna fyrir um 300 milljónir króna í stað fjögurra rafvagna.

Vonandi verður umboðsaðili Scania hlutskarpastur í útboði sem nú stendur fyrir dyrum & vér vagnverjar komum til með að sjá nýja sænskættaða metanvagna á vígvöllum veganna hér syðra á þessu ári.

Maður lifandi!!!

Amen. 

Ömurð Oddeyringa ...

Dagar tveir ömurð ein
öngvinn er þá vagn.
Endalaust vol & vein
virkilegt bölv & ragn.

Undirskriptir um breytingar

Það er ljóst að tíðni vagna hér nyrðra skorar ekki hátt hjá hinum létta & netta dr. Gylforce. Maður lifandi!

Á þjáningardeginum mikla hugði dr. Gylforce taka leið 6 við Hafnarstrætið. Nema hvað.

Vagninn á að koma þar ca. 55 mínútur yfir heila tímann. En ekkert gerðist.

Dr. Gylforce beið & beið - & beið & beið. Þá fékk hann uppljomun & uppgötvaði; líklega er öngvinn akstur hvorki á föstudaginn langa né páskadag hér nyrðra.

Illu heilli.


Sem betur fer var dr. Gylforce sem eilífur augnakarl í metanvagninum á skírdag & tók nokkra unaðshringi. En ekki hvað???

Þessi tíðni nyrðra - maður minn! Hér verður að gera betur enda öngvu líkara en að hluti af íbúum vilji aukna þjónustu eins og sjá má í slóðinni efst.

Amen.

Lærum að met´ann ...

Vellíðan vel streymir 
vagnar á parti sér.
Doktorinn opt dreymir
um dýrðina hér.

Það er eigi ofsögum sagt að ánægjan & unaðurinn umvefji dr. Gylforce meðal Oddeyringa. Maður lifandi!

Ástæðan er efalítið metanvagnarnir sem eru í ofanálag frá fyrirmyndarríkinu Svíþjóð. Gerist vart betra!

Eina sem angrar hið gamla hró doktors er vitaskuld tíðni vagna - ef tíðni skyldi kalla - um helgar & á helgidögum; einvörðungu leið 6 er í boði & ekur frá kl. 12:18-18:18!!! WTF!!!

Gaman væri að vita hvað liggi að baki þessari furðulegu ákvörðun; hafa aðeins eina leið af sex í gangi um helgar & sleppa öllum akstri á morgnana & kvöldin. Var gerð skoðanakönnun meðal bæjarbúa hér nyrðra??? Vilja þeir virkilega hafa þetta svona??? Hvað um það.

Vagnverjarnir ungu & öldnu hafa vitaskuld tekið nokkra hringi með sexunni enda ekkert annað í stöðunni. Vonandi ber Strætó bs. gæfu til þess að velja þessa sænskættuðu Scania vagna þegar keyptir verða metanvagnar síðar á þessu ári fyrir höfuðborgarsvæðið.

Yfir&út!

Sautján ára sæla ...

Gamli jálkur göslast enn
gæði hrein frá Svíum.
Vonandi þó vagninn senn
víki fyrir nýjum.

Dr. Gylforce hélt ótrauður á vit vagna í gær, hvar hann var óðara kominn að okkar Frónbúar Mekka, Hlemmtorgi. Nema hvað.

Dr.-inn gaut augum sínum að sænskættuðu stáli á leið 2 en vagnar frá fyrirmyndarríkinu virðast óðum týna tölunni hér á höfuðborgarsvæðinu. Illu heilli.

Á þessu ári hyggst byggðasamlagið Strætó festa kaup á metanvögnum. Vonandi verða þeir sænskættaðir en Norðlendingar hafa einmitt tekið þrjá slíka í notkun sem dr.-num líst afar vel. á. Svo vel raunar að í næstu viku vill hann óður taka hús á þeim. Hvað um það.

Dr. Gylforce gat eigi setið á sér & settist inn í þennan 17 ára gamla vagn á leið 2 & tók sér 50 mínútna rúnt frá Hlemmi að Mjódd okkar Breiðhyltinga í gegnum Grensás, Hamraborg, Smáralind & efri byggðir Kópavogs & leið þetta líkt & um 5 mínútur væri að ræða.

Unaður.

Dropinn holar ...

Dropinn holar harðan stein
hægt mun bílum fækka.
Í unaði á sér akrein
öll mun streita lækka.

Fleiri nýir vagnverjar

Vel á sjötta þúsund einstaklingar gjörðust nýir vagnverjar eða endurnýjuðu kynnin sín við unaðinn - vagnana - á gráum gærdegi. Maður lifandi.

Dropinn holar steininn segir einhvers staðar & á það vel við í viðleitni Strætó bs. til þess að sporna við svifrykinu. 

Strætó áætlar að hver frír dagur í vögnunum kosti byggðasamlagið um þrjár milljónir króna sem er vitaskuld ekki há fjárhæð í stóra samhenginu.

Vonandi verður áframhald á fríum ferðum ef fleiri gráir dagar eru framundan.

Amen.

Fundur með forkólfunum ...

Fokkaðist upp fundurinn
með forkólfum leiða
í djöfuls rugli doktorinn
dæmalaus bleyða!

Strætó hélt opinn fund á dögunum með hagsmunaaðilum sínum. Fundur sá var einkar vel til fundinn & sýnir að byggðasamlagið hyggst hlusta á ábendingar okkar vagnverja. Nema hvað.

Dr. Gylforce hapði vitaskuld hug á að mæta á fund þennan, var meira að segja á leið á fundarstaðinn við Þönglabakkann hvar honum varð brátt í brók & slapp hann með naumindum til síns heima.

Skelfing mig nú skók
úr skólanum mínum.
Varð svo brátt í brók
í bus-i fínum.

Verkfall vagnstjóra ...

Vagnstjórar í verkfall
vilja meiri aur.
Upphefja sitt ákall
orðnir alveg staur.

Verkfall vagnstjóra

Í morgun hófst verkfall meðal vagnstjóra Kynnisferða sem ku hafa áhrif á 10 strætisvagnaleiðir. Eptir að verkfallið hófst sátu þeir þó ekki auðum höndum, heldur þrömmuðu fylktu liði um Hlemmtorgið í kröfugöngu.

Verkfall þeirra er frá 1.-30. apríl frá kl. 7-9 & 16-18 virka daga. Sumsé, á annatíma þegar flestir eru að nota vagnana.

Enda þótt dr. Gylforce sé leiður yfir því að vita til þess að vagnarnir séu stopp, styður hann vagnstjórana & vonar svo innilega að samningar takist um sanngjörn kjör.




Mynd: Benjamin Julian, tekin (án leyfis :( )af FB síðu samtaka um bíllausan lífsstíl.

Fimm & fimmtán ...

Bus-ar bregða af leið
brautin er of þröng.
Á Barónsstígnum beið
blístraði & söng.

Hinn bljúgi & bænheyrði dr. Gylforce var ekki lengi að böðlast á leið eptir að hafa blessað börnin í mennta- & menningarsetrinu við Kársnes. Nema hvað.

Dr.-inn hapði vitaskuld mikinn hug á að kynna sér leiðir fimm & fimmtán, hvar þær aka nú um Barónsstíg, Egils- & Bergþórugötu vegna framkvæmda við nýjan Landspítala. En ekki hvað???

Hart sækir hægðartregða
helsár - nema hvað!
Af leið nú bus-ar bregða
bölvanlegt er það!

Að þessu sinni náði hinn geðþekki Gylforce einungis að klófesta leið 15 í blástri miklum við Barónsstíginn.  Karleplið varð að gera sér að góðu að skella hettunni upp - maður lifandi!

Fyrsta upplifun doksa kallsins á þessari nýju leið var sú að þrengslin eru mikil enda götur þessar ekki gerðar fyrir níu metra langa vagna. Allt slapp þetta svo sem í þetta sinn en gert er ráð fyrir því að leiðirnar tvær, 5 & 15, aki þarna um næstu sex árin vegna framkvæmda við hátæknisjúkrahúsið.

Takk fyrir túkall!

Það verður eitthvað!

En, meira síðar mínir virðulegu vagnverjar!






Miðmynd: frettabladid.is

Lúalegt á leið ...

Í kuldanum mig klæddi
kúldraðist inn í vagn.
Í lítinn rúnt mér læddi
er lofaði bölv & ragn.

Dr. Gylforce átti skyndilega örfáar mínútur aflögu þennan laugardag sem efalítið var til lukku. Dr.-inn var ekki lengi að einhenda sér á leið meðan tími gafst til & valhoppaði hinn vel klæddi vagnverji að Mjódd okkar Breiðhyltinga.

Dr.-inn settist í eðal Iveco Crossway vagn en brá fljótt í brún. Vagnstjórinn hapði útvarpsstöð eina úr Þverholtinu í botni hvar fúkyrðaflaumurinn & hatursorðræðan í garð innflytjenda, hælisleitenda & flóttamanna hreinlega vall út úr viðtækinu.

Dr.-inn meikaði þetta vitaskuld ekki & ýtti þéttingsfast en þó fimlega & umfram allt tímanlega á stanz rofann & hoppaði í næsta vagn. Þar var öngvin útvarpsstöð í gangi & bara hugarró & huggulegheit.

Maður lifandi!